အကြောင်းအမျိုးမျိုးနဲ့ ပြစ်ဒဏ်ကျခံရပြီး တဲ့ မြန်မာ ရွှေ့ပြောင်းလုပ်သား ၁၃၁ ဦး ကို ရနောင်းထိန်းသိမ်းရေးစခန်းမှ တစ်ဆင့် ကော့သောင်းဘက်သို့ ထိုင်းအာဏာပိုင်တွေ က ပြန်လည်ပို့ဆောင်ပေးခဲ့တယ်လို့ ရနောင်းမြို့လဝကရုံးထုတ်ပြန်ကြေငြာချက်အရသိရပါတယ်။
ဇွန်လ ၂၅ ရက် နံနက်ပိုင်းက မြန်မာရွှေ့ပြောင်းလုပ်သား ၁၃၁ဦး ကို ရနောင်းဆိပ်ကမ်းကနေ ကော့သောင်းဘက်ကို စက်လှေ ကိုးဆင်းဖြင့် လွှဲပြောင်းပေးခဲ့တယ်လို့ သိရပါတယ်။
မြန်မာလုပ်သား ၁၃၁ဦး တွင် အမျိုးသား ၁၀၄ဦးနဲ့အမျိုးသမီး ၂၇ဦး ပါရှိ ပြီး နေရပ်ပြန်ပို့ရာ တွင် ရနောင်းခရိုင်လဝက နဲ့အတူ စစ်ကောင်စီရဲ့ အလုပ်သမား သံအရာရှိ ဦးမိုးဇော်လည်း ပါရှိတယ်လို့ သိရပါတယ်။
အခုလို ထိုင်းမှ တစ်ဆင့် နေရပ်ပြန်ပို့ ခံရတဲ့ ရွှေ့ပြောင်းမြန်မာလုပ်သားတွေ ကို စစ်ကောင်စီ မှ အတင်းအဓမ္မစစ်မှုထမ်းခိုင်း တာတွေရှိနေတယ်လို့ မြန်မာလုပ်သားအရေးကူညီပေးသူတွေထံ က သိရပါတယ်။
အခုလို စစ်မှုထမ်း ဖို့ အဓမ္မခေါ်ဆောင်တာတွေရှိတဲ့ အတွက် ပြစ်ဒဏ်ကျခံပြီးတဲ့ ရွှေ့ပြောင်း မြန်မာလုပ်သားတွေကို စစ်ကောင်စီထံ ပြန်မပို့ဖို့ ပြည်ပရောက် မြန်မာနိုင်ငံသားတွေ နဲ့ တက်ကြွလှုပ်ရှားသူတွေက ထိုင်းအစိုးရထံတောင်းဆိုမှု ပြုလုပ်ပေမယ့် ယခု၂၀၂၅ခုနှစ် အတွင်းမှာပင် နေရပ်ပြန်ပို့ခံရ တဲ့မြန်မာလုပ်သား ဦးရေ တစ်ထောင်ကျော် ရှိကာ အသက် ၁၈ မှ၃၅နှစ် အတွင်းရှိ အမျိုးသားများ အများဆုံး ပါဝင်ကြောင်း ရနောင်းမြို့လဝကရုံးထုတ်ပြန် တဲ့စာရင်း အရသိရပါတယ်။
