မလေးရှားနိုင်ငံ၊ ဂျိုဟိုးပြည်နယ်၊ ဂျိုဟိုးမြို့မှာ ဖမ်းဆီးခံရတဲ့ မြန်မာ ရွှေ့ပြောင်းလုပ်သား ၃၂ ဦး ကို နေရပ်ပြန်ပို့လိုက်တယ်လို့ ပြည်နယ်လူဝင်မှု ကြီးကြပ်ရေး ဌာနက စက်တင်ဘာ ၂ရက်နေ့မှာ ထုတ်ပြန်ပါတယ်။

 

၎င်းတို့ဟာ မလေးရှားနိုင်ငံမှာ တရားမဝင် နေထိုင်မှုနဲ့ လူဝင်မှုကြီးကြပ်ရေးဌာနက ဖမ်းဆီးထောင်ချ ပြီး ပြစ်ဒဏ်ကျခံပြီးမှ လွတ်မြောက်လာသူတွေ ဖြစ်ပါတယ်။

 

နေရပ်ပြန်လည်ပို့ဆောင်ခံရသူတွေကို လူဝင်မူကြီးကြပ်ရေးဌာနမှာ အမည်ပျက်စာရင်းသွင်းထားပြီး ၅ နှစ်အတွင်း မလေးရှားနိုင်ငံသို့ဝင်ရောက်ခွင့်ရရှိမှာ မဟုတ်ဘူးလို့ ထုတ်ပြန်ချက်မှာ ဖော်ပြထားပါတယ်။

 

မလေးရှား နိုင်ငံ အတွင်း တရားဝင် အထောက်အထားမရှိဘဲ နေထိုင် အလုပ်လုပ်ကိုင်နေတဲ့ နိုင်ငံခြားသားလုပ်သားတွေ ကို စီမံချက်နဲ့ ဖမ်းဆီး မှု တွေ နေ့စဉ် ပြုလုပ်လျက်ရှိပါတယ်။

 

ဒီလို အဖမ်းခံရတဲ့ နိုင်ငံခြားသား လုပ်သားတွေထဲမှာ မြန်မာရွှေ့ပြောင်းလုပ်သားတွေ နေ့စဉ် ဆယ်ဂဏန်းမှရာဂဏန်း ထိ ဖမ်းခံနေရပြီး ပြစ်ဒဏ်ကျခံ ပြီးပါက မြန်မာနိုင်ငံသို့ ပြန်လည်ပို့ဆောင်ကာ ပြည်နှင်ဒဏ်ပေးကြောင်း သိရပါတယ်။

 

ပြီးခဲ့တဲ့ ဩဂုတ်လ အတွင်းက လည်း မလေးရှားအစိုးရက ပြစ်ဒဏ်ကျခံပြီးတဲ့ မြန်မာရွှေ့ပြောင်းလုပ်သား ၂၀၀ ကျော်ကို မြန်မာနိုင်ငံသို့ ပြန်ပို့ကာ ပြည်နှင်ဒဏ်ပေးခဲ့ပါတယ်။