ထိုင်းနိုင်ငံ အတွင်း မှာ အကြောင်း အမျိုးမျိုးနဲ့ အဖမ်းခံရပြီး ပြစ်ဒဏ် ကျခံ ပြီးတဲ့ မြန်မာနိုင်ငံသား ၁၆၄ဦး ကို ထိုင်းအာဏာ ပိုင်တွေက မြန်မာဘက်သို့ ပြန်လည် ပို့ဆောင်ခဲ့တယ်လို့ ထိုင်းဒေသတွင်း သတင်းတွေ ရဲ့ ဖေါ်ပြချက်အရ သိရပါတယ်။

 

ဇန်နဝါရီ ၂၀ ရက် မနက်၁၁နာရီ ခန့်မှာ လတ်ယား (Lat Ya) စစ်ကြောင်းမှ စစ်ဘက်ဆိုင်ရာ တာဝန်ရှိသူများ၊ ကန်ချနဘူရီခရိုင် လူဝင်မှုကြီးကြပ်ရေး ဌာနတို့ ပူးပေါင်းပြီး နယ်စပ်ကနေတစ်ဆင့် နေရပ်ပြန်ပို့ ခဲ့တယ်လို့ သိရပါတယ်။

 

မြန်မာနိုင်ငံသား ၁၆၄ဦးကို ကန်ချနဘူရီခရိုင်၊ သံဖြူဇရပ်လမ်းကြောင်း ဘက်ရှိ စံခလပူရီမြို့နယ်၊ နောင်လူးကျေးရွာအုပ်စု၊ အမှတ် (၉) ရပ်ကွက်၊ ဘုရားသုံးဆူကျေးရွာရှိ ကူးသန်းရောင်းဝယ်ရေးဂိတ် (၁၁) က​တစ်ဆင့် မြန်မာ ပြည်ဘက်ကို ပြန်ပို့ ခဲ့တာ လို့ သတင်းမှာဖေါ်ပြထားပါတယ်။

 

ထိုင်းနိုင်ငံအတွင်း ပြစ်ဒဏ်ကျခံပြီးတဲ့ မြန်မာနိုင်ငံသားတွေကို မြန်မာပြည်ဘက် ပြန်လည် လွှဲပြောင်းပေးရာမှာ ထိုင်းနိုင်ငံ ရနောင်း ဘက်မှ ရေကြောင်း ကနေ မြန်မာ ပြည် ကော့သောင်း ဘက်ကို ပို့ဆောင်ပေးတာ အများဆုံး ဖြစ်ပြီး ပြီးခဲ့တဲ့ ၂၀၂၅ခု နှစ်ကပင် အယောက် ၂၀၀၀ကျော် ကို ထိုင်းအာဏာပိုင်တွေက လွဲပို့ပေးခဲ့ပါတယ်။

 

လက်ရှိမှာလည်း ထိုင်းနိုင်ငံအတွင်း တရားမဝင် နယ်စပ်ဖြတ်ကျော် လို့ အဖမ်းခံရတဲ့ မြန်မာနိုင်ငံသားတွေ နေ့စဉ် လိုလိုရှိနေပြီး လုပ်ငန်း ခွင်တွေမှာလည်း အထောက်အထား မပြည့်စုံဘဲ အလုပ်လုပ်ကိုင်လို့ အဖမ်းခံရတဲ့မြန်မာလုပ်သားတွေ များစွာ ရှိနေကြောင်း ဒေသတွင်းသတင်းတွေအရသိရပါတယ်။

 

Ref-ข่าวเด่นภูมิภาคทั่วไทย กาญจนบุรี