ထိုင်းနိုင်ငံမှာ အကြောင်းအမျိုးမျိုးနဲ့ ပြစ်ဒဏ်ကျခံပြီးတဲ့ မြန်မာလုပ်သားတွေကို ထိုင်းအာဏာပိုင်တွေက စစ်ကော်မရှင် ထံ ယခု လအတွင်း ဒုတိယအကြိမ် အဖြစ် အယောက်၉၀ ထပ်မံ လွှဲပို့ခဲ့ကြောင်း ရနောင်းခရိုင်ရေကြောင်းဦးစီးဌာန၊ ရေကြောင်းရုံးထုတ်ပြန်ချက်အရသိရပါတယ်။
ပြီးခဲ့တဲ့ နိုဝင်ဘာလ ၅ ရက်ကလည်း မြန်မာလုပ်သား ၄၇ ဦးကို နေရပ်ပြန်ပို့ခဲ့ပြီးနောက် ယခုလအတွင်း ဒုတိယအကြိမ်မြောက် အယောက်၉၀ ထပ်မံနေရပ်ပြန်ပို့ခဲ့ရာ စုစုပေါင်း ၁၃၇ဦး ရှိပြီ ဖြစ်ပါတယ်။
အခုအကြိမ် ပြန်ပို့ခံရတဲ့ မြန်မာလုပ်သား အယောက်၉၀ တွင် အမျိုးသား၇၅ဦး၊အမျိုးသမီး၁၅ဦး တို့ပါဝင်ကာ ရနောင်းမြို့ ပန်နားရပ်ကွက်ရှိ အကောက်ခွန်လှေဆိပ် ကတစ်ဆင့်ကော့သောင်း ဘက်သို့ ပို့ဆောင်ခဲ့တယ်လို့ သိရပါတယ်။
ယခုနှစ် အတွင်း နေရပ်ပြန်ပို့ခံရတဲ့ မြန်မာလုပ်သား ၁၈၉၇ ဦးရှိကာဇန်နဝါရီလတွင် ၁၄၉ ဦး၊ ဖေဖော်ဝါရီလတွင် ၂၀၀ ဦး၊ မတ်လတွင် ၂၅၀ ဦး၊ ဧပြီလတွင် ၂၀၈ ဦး၊ မေလတွင် ၈၁ ဦးနှင့် ဇွန်လ ၂၅ ရက်နေ့က ၁၃၁ ဦး၊ ဇွန်လ ၃၀ ရက်နေ့က ၉၈ ဦး၊ ဇူလိုင်တွင် ၁၆၂ ဦး၊ ဩဂုတ်လတွင် ၉၉ ဦး၊ စက်တင်ဘာလတွင် ၂၉၂ ဦး၊ အောက်တိုဘာလတွင် ၉၀ ဦး လွှဲပြောင်းခဲ့ပြီးဖြစ်တယ်လို့ ပြန်ပို့ခံရတဲ့စာရင်းတွေအရသိရပါတယ်။
ထိုင်းကနေ ပြန်ပို့ခံရတဲ့ မြန်မာလုပ်သား တွေထဲမှ စစ်မှုထမ်းရန်အသက်အကျုံးဝင်သူတွေကို စစ်ကော်မရှင်မှ ဖမ်းဆီးခေါ်ဆောင်တာတွေ ဆက်တိုက် လုပ်ဆောင်နေသလို ထိုင်းနိုင်ငံဘက်မှ လည်း လစဉ် ပြန်လည်လွှဲပို့ လျက်ရှိကြောင်း သိရပါတယ်။
