ထိုင်းနိုင်ငံ၊ ပထုံဌာနီခရိုင်၊ လမ်လုကာ ခေါင်(၁၀ ) တွင် ရှိသော (သစ်သားကစားကွင်းလုပ်သည့်စက်ရုံ)မှာ အလုပ်လုပ်နေတဲ့ မြန်မာလုပ်သား ၂၅ ဦးကို သူဌေးဖြစ်သူက လုပ်အားခမပေးတဲ့ အပြင် အလုပ်မဆင်းတဲ့သူတွေ ကို ပုလိပ်နဲ့ဖမ်းခိုင်းမယ်ဆိုကာ ခြိမ်းခြောက်ပြီး အလုပ်လုပ်ခိုင်းတာကြောင့် WAG အဖွဲ့ကို အကူအညီတောင်းခံခဲ့တာလို့သိရပါတယ်။
မြန်မာလုပ်သား ၂၅ဦးကို သူဌေးဖြစ်သူက လုပ်ခမပေးတာ ၃ လစာ ရှိနေပြီ ဖြစ်ပြီး ချေးငွေ ထုတ်သော်လည်း ရက်ချိန်းသာပေးပြီး ချေးငွေမထုတ်ပေးဘူးလို့ အလုပ်သမားတွေထံမှ သိရပါတယ်။
မိမိတို့ရသင့်တဲ့ လုပ်ခမပေးတဲ့ အတွက် ယခု ဩဂုတ်လ ၁ရက်ကစပြီးမြန်မာလုပ်သားတွေက အလုပ်မဆင်းဘဲ နေတာ မှာ စက်ရုံတာဝန်ရှိသူက အလုပ်မဆင်းရင် ပုလိပ်နဲ့ဖမ်းခိုင်းမယ်လို့ခြိမ်းခြောက်တဲ့ အတွက် ချာချင်ဆောင်ဘက်မှာ အလုပ် ၁၀ ရက်ခန့်သွားရောက်လုပ်ကိုင်ခဲ့ရတယ်လို့ ဆိုပါတယ်။
ဒါ့အပြင် လုပ်အားခမပေးသေးဘဲ စက်ရုံ အလုပ်မဟုတ်တဲ့ သူဌေးရဲ့ နွားခြံ မှာ အလုပ်ခိုင်းတဲ့ အတွက် မြန်မာအလုပ်သမားတွေဟာ သူဌေးအပေါ်အယုံအကြည်မရှိတော့တာကြောင့် လုပ်အားခ ပြန်ရဖို့ အတွက် WAG အလုပ်သမား မဟာမိတ်အဖွဲ့ထံ အကူညီတောင်းခံခဲ့တာလို့ဆိုပါတယ်။
WAG အလုပ်သမား မဟာမိတ်အဖွဲ့ အနေနဲ့ မြန်မာအလုပ်သမားတွေရဲ့ အကူညီတောင်းခံမှုကို ဩဂုတ်၂၃ရက်က လက်ခံခဲ့ ပြီး လုပ်အားခ တွေ ပြန်ရဖို့ကူညီပေးသွားမယ်လို့သိရပါတယ်။
မြန်မာအလုပ်သမား ၂၅ဦး မှာ MOU နဲ့ဘတ်အသစ် ကိုင်ဆောင်ထားသူတွေဖြစ်ပြီး ၎င်းစက်ရုံမှာ အလုပ်လုပ်နေတာ ၂နှစ်ခန့်ရှိပြီဖြစ်တယ်လို့သိရပါတယ်။
