ထိုင်းနိုင်ငံ၊ စမူပကန်ခရိုင်၊ ဘန်ပါရပ်ကွက်မှာရှိတဲ့ စားသောက်ကုန်စက်ရုံ(မုန့်ရုံ)က လုပ်ခလစာ ကို နေ့စားရှင်းစနစ်ကနေ ပုတ်ပြတ်စားစနစ် နဲ့ အတင်းအကျပ် ပြောင်းလဲ ခိုင်းစေတာကို မြန်မာလုပ်သားတွေက လက်မခံတဲ့ အတွက် မြန်မာလုပ်သား ၁၆၉ဦးကို အလုပ်ထုတ်ပစ်လိုက်တယ်လို့နစ်နာသူလုပ်သားတွေကို ကူညီပေးနေတဲ့ WAG အလုပ်သမားမဟာမိတ်အဖွဲ့ထံမှ သိရပါတယ်။
နိုဝင်ဘာ ၈ရက် နေ့ မနက် ပိုင်းမှာ စက်ရုံမှ တာဝန်ရှိသူများက စက်ရုံရှိ အလုပ်သမား တွေ ကို နေ့စားမှပုတ်ပြတ်စား သို့အတင်းအကျပ်ပြောင်းလဲခိုင်းစေရာ အလုပ်သမားတွေက မလုပ်နိုင်ကြောင်းပြောပေမယ့် စက်ရုံဘက်မှ မလုပ်နိုင်လျှင်အလုပ်မှ ထွက်ကြဟုပြောပြီးအလုပ်မှထုတ်ပစ်လိုက်တယ်လို့ ဆိုပါတယ်။
အလုပ်ထုတ်ခံရတဲ့ မြန်မာလုပ်သား အမျိုးသား၈၅ဦး၊ အမျိုးသမီး ၈၄ ဦးတို့ဟာ MOU/CI အထောက်အထားတွေရှိပြီး ၎င်းစက်ရုံ မှာ အလုပ်လုပ်ကိုင်လာတာ ၁နှစ်မှ၆နှစ်အထိ သက်တမ်းရှိပြီ ဖြစ်တယ်လို့ သိရပါတယ်။
အလုပ်မှ ထုတ်လိုက်ချိန် မှာလည်း မြန်မာလုပ်သားတွေရဲ့ လုပ်အားခ(၁)ဦးလျှင် ဘတ် ၄၄၆၄ ဘတ်နှုန်းဖြင့် (၁၆၉)ဦးစာ ၇၅၄၄၁၆ ဘတ်နဲ့ အချိန်ပိုကြေး၁၆၉ဦးစာ ဘတ် ၁၅၈၀၀၀ရဖို့ ကျန်ရှိတယ်လို့ သိရပါတယ်။
ဒါ့အပြင် အလုပ်သမား တွေရဲ့ သဘောတူညီမှု မပါဘဲ လစာထဲမှ စုကြေးငွေ အဖြစ် ၃၅၀၀၀၀ ဘတ် ကို လည်း စက်ရုံဘက်ကဖြတ်တောက်ထားတယ်လို့ WAG အလုပ်သမားမဟာမိတ်ထံမှသိရပါတယ်။
အလုပ်ထုတ်ခံရတဲ့ မြန်မာလုပ်သားတွေဟာ WAG အလုပ်သမားမဟာမိတ်အဖွဲ့ထံအကူညီတောင်းခံခဲ့ကာ လုပ်ငန်းခွင်ပြန်လည်လုပ်ကိုင်လိုခြင်း၊အလုပ်သမားခံစားခွင့်များကို ဥပဒေအတိုင်းရရှိလိုခြင်း၊ အလုပ်ပြန်လည်ဝင်ရောက်ခွင့်မရပါကထိုက်သင့်သည်နစ်နာကြေးရရှိလိုခြင်း၊စာရွက်စာတမ်းကိစ္စများပြီးမြောက်သည်အထိဆောင်ရွက်ပေးစေလိုခြင်းစတဲ့ အခွင့်အရေးများပြန်လည်ရရှိလိုတယ်လို့ ဆိုပါတယ်။
WAG အလုပ်သမားမဟာမိတ်အဖွဲ့ ကလည်း ယခုကိစ္စ ကို နိုဝင်ဘာ၁၂ရက်က လက်ခံခဲ့ပြီး ဆက်လက်ကူညီဆောင်ရွက်ပေးသွားမယ်လို့ အသိပေးထားပါတယ်။
