နိုင်ငံခြားသား လုပ်သားတွေဆီက ပန်းရောင်ကတ် ပြုလုပ်တဲ့ ကုန်ကျငွေကို ပိုမိုတောင်းခံတဲ့ ချင်းမိုင်ခရိုင်၊ ဆန်ဆိုင်းခရိုင်မှူးကို အမျိုးသားအဂတိလိုက်စားမှု တိုက်ဖျက်ရေး ကော်မရှင် (NACC)က ဖမ်းဆီးစစ်ဆေးလျက်ရှိတယ်လို့ NACC ရဲ့ ထုတ်ပြန်ချက်အရ သိရပါတယ်။

နိုင်ငံခြားသား လုပ်သားတွေ ကို ပန်းရောင်ကတ် ထုတ်ပေးဖို့ အတွက် ထိုင်းအစိုးရမှသတ်မှတ်ကုန်ကျစရိတ်မှာ ဘတ် ၆၀နဲ့ နိုင်ငံခြားသားမှတ်တမ်းအကျဉ်းချုပ် မိတ္တူကူးယူခြင်း အတွက် ဘတ်၂၀ စုစုပေါင်း ဘတ် ၈၀သာ ကုန်ကျမှာဖြစ်တယ်လို့ သိရပါတယ်။

 

၄င်းခရိုင်မှူးဟာ နိုင်ငံခြားသား လုပ်သားတွေ ထံ ကနေ ပန်းရောင်ကတ်ပြုလုပ်ခ တစ်ဦး ကို ဘတ်၂၀၀ တောင်းခံပြီး တောင်းခံတဲ့ပမာဏ အတိုင်းမပေးပါက အလုပ်သမားတွေကို ပြုလုပ်မပေးဘဲချန်ထားခဲ့တယ်လို့ ဆိုပါတယ်။

 

အခုလို နိုင်ငံခြားသားလုပ်သားတွေအပေါ် အဂတိ လိုက်စားနေတဲ့ ခရိုင်မှူးကို နိုင်ငံခြားသားအလုပ်သမား အကျိုးဆောင်တစ်ဦးက NACC ထံ တိုင်ကြားခဲ့တာလို့ သိရပါတယ်။

 

၄င်းရဲ့ တိုင်ကြားမှုအရ ခရိုင်မှူးဟာ ၂၀၂၃ ခုနှစ် အစောပိုင်း ရာထူးရပြီးကတည်းက အခုလို ပန်းရောင်ကတ်ဖိုး ကို ပိုမိုကောက်ယူနေတာဖြစ်ပြီး စုစုပေါင်း ကောက်ယူထားတဲ့ငွေဘတ်၂ ဒသမ ၄သန်း ကနေ ၃ ဒသမ၆သန်း အထိ ရရှိခဲ့တယ်လို့ ခန့်မှန်းကြောင်း NACCရဲ့ ထုတ်ပြန်ချက်မှာဖေါ်ပြထားပါတယ်။

 

ချင်းမိုင်ခရိုင် ဆန်ဆိုင်းမှာ နိုင်ငံခြားသားလုပ်သား ၁၀၀၀ ကျော် နေ့စဉ် မှတ်ပုံတင် လျှောက်ထားကြပြီး နိုင်ငံခြားသား အလုပ်သမား အကျိုးဆောင် ပေးတဲ့သူဦးရေ ၁၀၀ ကျော်ရှိကာ အခုလို သတ်မှတ်ပမာဏထက် ဘတ်၁၂၀ ကောက်ယူနေတာကို အားလုံးသိကြတယ်လို့ ဆိုပါတယ်။

NACC အနေနဲ့ ယခုတိုင်ကြားမှု ကို သေချာစုံစမ်းစစ်ဆေးပြီး အရေးယူမှုတွေ ပြုလုပ်သွားမယ်လို့ ကြေညာထားပါတယ်။

Ref-Chiangmai News