လာမယ့် စက်တင်ဘာလ ၁ ရက်နေ့က စပြီး နိုင်ငံကူးလက်မှတ် စာအုပ်ဖိုးကို ကျပ် လေးသောင်း အဖြစ် ပြောင်းလဲ သတ်မှတ် မယ်လို့ ဩဂုတ် ၂၉ ရက်ထုတ် နိုင်ငံပိုင်သတင်းစာမှာ အသိချက် ထုတ်ပြန်ထားပါတယ်။

 

ယခင်က နိုင်ငံကူးလက်မှတ်လျှောက်ထားရာမှာ စာအုပ်ဖိုးငွေ သုံးသောင်းခွဲကျပ် ပေးသွင်းရပြီး စက်တင်ဘာ၁ရက် မှ စကာ လေးသောင်း ကျပ် ပေးသွင်းရမယ်လို့ သိရပါတယ်။

 

နိုင်ငံကူးလက်မှတ်လျှောက်ထား ဖို့အတွက် အွန်လိုင်းကြိုတင်ရက်ချိန်းရယူတဲ့ စနစ်သစ်ကို ပြီးခဲ့တဲ့ ၂၀၂၃ ခုနှစ် ဖေဖော်ဝါရီ ၂၄ ရက်က စတင်ဆောင်ရွက် ခဲ့ကာ လက်ရှိအချိန် ထိ ရန်ကုန်အပါအဝင် တိုင်းနဲ့ပြည်နယ် တို့ရှိ နိုင်ငံကူးလက်မှတ်ထုတ်ပေးရေးရုံးတွေ မှာ ရက်ချိန်းယူခြင်း ကို အွန်လိုင်းကနေသာ ရယူရတယ်လို့ သိရပါတယ်။

 

""ပတ်စပို့လုပ်ဖို့ အွန်လိုင်း ကနေရက်ချိန်းယူမယ်ဆိုရင် ဘိုကင်တင်ကတည်း ပိုက်ဆံ သုံးသောင်းခွဲကျပ် တခါတည်း သွင်းရတာ၊ အခု ၉ လပိုင်း ၁ ရက်ကစပြီး စာအုပ်ဖိုး သွင်းရမှာ လေးသောင်းကျပ် ပေးရမယ်လို့ကြေညာလိုက်တာ တကယ်တမ်း စာအုပ်သွားလုပ်ရင်အခုကျပ်လေးသောင်းနဲ့ မပြီးသေးဘူး အထဲ မှာ လဝက တို့ ရဲ တို့က ထပ်တောင်းသေးတာပဲ အမျိုးမျိုး ရစ် ပြီးတောင်းတာတွေလည်းရှိတယ် ပတ်စပို့စာအုပ် မထုတ်ပေး မှာ စိုးရိမ်တော့လည်း သူတို့ တောင်းတာ ပေးရတာပေါ့""လို့နိုင်ငံကူးလက်မှတ်ထုတ်ပေးရေးရုံးနဲ့ နီးစပ်သူတစ်ဦးကပြောပါတယ်။

 

နိုင်ငံကူးလက်မှတ် လျှောက်ထားရာမှာ အမျိုးအစား ခွဲ ခြား ထားပြီး အလည်အပတ်သွားရောက်လိုပါက PV၊ အလုပ်ဖြင့်သွားရောက်လိုပါကPJ၊ ပညာသင်အဖြစ်သွားရောက်လိုပါက PE၊ စီးပွားရေးအနေနဲ့ သွားရောက်လိုသူတွေ အတွက် PB၊ ဘာသာရေးအတွက်သွားရောက်သူတွေ အတွက် PR၊ မှီခို အနေနဲ့ သွားရောက်လိုသူတွေ အတွက် PT၊ သင်္ဘောသားအနေနဲ့ PS စသဖြင့် ခွဲခြားထားတယ်လို့ သိရပါတယ်။

 

လက်တလောမှာ အလုပ်ဖြင့် သွားရောက် ရန် လျှောက်ထားတဲ့ PJ နိုင်ငံကူးလက်မှတ် ကို သက်တမ်းငါးနှစ်မပြည့်ခင်အထိ PV နိုင်ငံကူးလက်မှတ် ပြောင်းလဲ လျှောက် ထားခွင့်မပြုသလို အသက် ၁၈ နှစ်က​နေ ၃၁ နှစ်အတွင်း အမျိုးသား​တွေကိုလည်း PJ နဲ့ ပြည်ပထွက်ခွင့်ပိတ်ပင်ထားပါတယ်။

 

ဒါ့အပြင် PV နိုင်ငံကူးလက်မှတ် နဲ့ ပြည်ပ နိုင်ငံ များ ကို ထွက်ရာမှာလဲ ရန်ကုန်လေဆိပ်နဲ့ နယ်စပ်ဂိတ်တွေ မှာ စစ်ဆေးတာတွေ ပိုမိုတင်းကြပ်လျက်ရှိ​နေပါတယ်။