ထိုင်း-မြန်မာနယ်စပ် ကန်ချနဘူရီခရိုင် အတွင်းရှိ တောတွင်းတနေရာမှာ အထောက်အထားမပါဘဲ နယ်စပ်ဖြတ်ကျော်ဝင်ရောက်လာပြီး ပုန်းအောင်းနေတဲ့ မြန်မာလုပ်သား ၁၀၀ ဦး ကို ဩဂုတ်လ ၂၅ရက် မွန်းလွဲ ပိုင်းက ထိုင်းရဲတပ်ဖွဲ့က ဖမ်းဆီးခဲ့တယ်လို့ ထိုင်းသတင်းဌာနတွေမှာဖေါ်ပြထားပါတယ်။

 

Khao Laem National Park မှ တာဝန်ရှိသူတွေဟာ သစ်တောအတွင်း ခြေရာများစွာကို ရှာဖွေတွေ့ရှိတဲ့အတွက် စိစစ်ရှာဖွေရာမှာ Chong Ua ပူးပေါင်းစစ်ဆေးရေးဂိတ်မှ ၅-၆ ကီလိုမီတာအကွာရှိ ရေကန်အနီးတောင်ခြေမှာ မြန်မာနိုင်ငံသား ၁၀၀ ဦး ကိုတွေ့ရှိခဲ့တာလို့ သတင်းမှာဖေါ်ပြထားပါတယ်။

 

အမျိုးသား ၆၂ ဦးနဲ့ အမျိုးသမီး ၃၈ ဦးတို့ ကို ခရီးဆောင်အိတ်နဲ့အတူ တွေ့ရှိရပြီး ပဏာမ စုံစမ်းစစ်ဆေးမှုမှာတာ့ တရားမ၀င် ပစ္စည်း ပါလာတာမရှိဘူးလို့ ဆိုပါတယ်။

 

မြန်မာရွှေ့ပြောင်း အလုပ်သမားတွေဟာ မြန်မာနိုင်ငံရှိ မြို့အများအပြားကနေ လာရောက်ကြသူတွေ ဖြစ်ပြီး ဖရားသွန်စုခရိုင်မှာ ဆုံစည်းကြကြောင်း ထို့နောက် မြန်မာလမ်းပြတစ်ဦးက ၎င်းတို့ကို သဘာဝလမ်းကြောင်းဖြင့် နယ်စပ်ဖြတ်ကျော်ကာ ထိုင်းနိုင်ငံသို့ ခြေလျင်ပို့ဆောင်ခဲ့တယ်လို့ စကားပြန်ကတဆင့်စစ်ဆေးတာမှာ မြန်မာလုပ်သားတွေက ထွက်ဆိုတယ်လို့ သိရပါတယ်။

 

၎င်းတို့ဟာ ထိုင်းအတွင်းပိုင်း ရှိ ပြည်နယ်တစ်ခု ခု မှာ အလုပ်လုပ်ကိုင်ဖို့ ပို့ဆောင်ပေးမယ့် ကားကို စောင့်ဆိုင်းနေစဉ် ဖမ်းဆီးခံရတာဖြစ်ပြီး အဖမ်းမခံရတဲ့အချိန်ထိ လေးရက်ကြာ စစ်ဆေးရေးဂိတ်အသီးသီး ကို တိမ်းရှောင်ခဲ့ရတယ်လို့ဆိုပါတယ်။

 

မြန်မာလုပ်သားတွေကို Sangkhlaburi ရဲစခန်းမှာ စစ်ဆေးမေးမြန်းပြီးနောက် တာဝန်ရှိသူတွေ က ထိုင်းနိုင်ငံအတွင်း တရားမ၀င်ဝင်ရောက်ရန် ဆောင်ရွက်ပေးခဲ့သူတွေကို ဥပဒေအရ ဖော်ထုတ်အရေးယူနိုင်ရန် သက်သေအထောက်အထားများ စုဆောင်းသွားမည်ဖြစ်ကြောင်း ဖမ်းမိတဲ့ မြန်မာလုပ်သားတွေကို မူလနိုင်ငံသို့ ပြန်ပို့မယ်လို့သတင်းမှာဖေါ်ပြထားပါတယ်။

Ref-Naewna News