ယူအေအီးနိုင်ငံ၊ ဒူဘိုင်းတွင် အိမ်အကူအဖြစ် လုပ်ကိုင်ရန် အလည်ဗီဇာဖြင့် သွားရောက်ကြသော မြန်မာရွှေ့ပြောင်းအလုပ်သမား ၃၀ ကျော်သည် လေဆိပ်တွင် ဒုက္ခရောက်လျှက်ရှိကြောင်း သတင်းရရှိပါတယ်။
မြန်မာနိုင်ငံတွင် အလုပ်အကိုင်အခွင့်အလမ်း နည်းပါး၍ အိမ်အကူအဖြစ် ဒူဘိုင်းတွင် လုပ်ကိုင်ခွင့် ရရန်အတွက် အလည်ဗီဇာဖြင့် သွားရောက်ကြသော မြန်မာရွှေ့ပြောင်းအလုပ်သမား (၃၀) ကျော်သည် ယခုလ ၄ရက်က ဒူဘိုင်းလေဆိပ်တွင် ထွက်မရဘဲ ဖြစ်နေပြီး တာဝန်ခံ ခေါ်ယူသော ပွဲစားမှာလည်း ထွက်ပြေး၍ ဒုက္ခရောက်လျက်ရှိ ကြောင်း ဒူဘိုင်းတွင် ရွှေ့ပြောင်းအလုပ်သမားများကို ကူညီနေသူများနှင့် KH Job Services က ပြောပါတယ်။
“ဒီလိုပုံစံမျိုးတွေဖြစ်လာတော့ တကယ်လုပ်ချင်တဲ့ ကလေးတွေ အနေနဲ့ အရမ်းနစ်နာတယ်။ ထိထိရောက်ရောက် အလုပ်ပေးနိုင်တဲ့ လူတွေအနေနဲ့ အလုပ်လုပ်ကြရတဲ့ အချိန်မှာ ဒီနိုင်ငံနဲ့ ပူးပေါင်း အလုပ်လုပ်ရတဲ့အချိန်မှာ ဒီလို လူမျိုးတစ်ယောက် ခဏခဏ လုပ်နေတဲ့ အပေါ်မှာ အက်ရှင်ကလည်း ဘယ်သူမှ မယူကြဘူး။ တားဆီးမဲ့ သူလည်း မရှိတော့ သူလုပ်လိုက်တဲ့ အပေါ်မှာ ကောင်းတဲ့ သူတွေအနေနဲ့ အတော်ထိခိုက်နစ်နာရတယ်”လို့ KH Job Services မှ တာဝန်ရှိသူ ဦးအာကာဆန်းကျော်က Myanmar Labour News ကို ပြောပါတယ်။
ဒူဘိုင်းတွင် အိမ်အကူဖြင့် အလုပ်သွားရောက် လုပ်ကိုင်သူ ၃၀ ကျော်သည် ကုမ္ပဏီ ၄/၅ ခုမှ အေဂျင့်များနှင့် နယ်ဒေသများမှ ကြားပွဲစားများဖြင့် ဆက်သွယ်၍ လာကြသူများဖြစ်ပြီး ဝန်ဆောင်ခအဖြစ် သိန်း ၃၅ သိန်း မှ သိန်း ၄၀ ကျော် ပေးရကြောင်း သိရပါတယ်။
ဒူဘိုင်းတွင် အလုပ်လုပ်ကိုင်ခွင့် ရရန် ခေါ်ယူလျက်ရှိသော ပွဲစားများသည် ပုံစံမျိုးစုံဖြင့် ရွှေ့ပြောင်းအလုပ်သမားများကို ခေါ်ယူလျက်ရှိပြီး လက်တွေ့တွင် လိမ်ညာမှုများနှင့် အဆင်မပြေမှုများကြောင့် ရွှေ့ပြောင်းအလုပ်သမားများ ပုံစံမျိုးစုံဖြင့် ဒုက္ခရောက်လျက်ရှိနေတယ်လို့ သိရပါတယ်။
(အသေးစိတ်ကို ထပ်မံစုံစမ်းနေပြီး ဆက်လက်ဖော်ပြပေးသွားမှာ ဖြစ်ပါတယ်)
