ကဏ္ဍအလိုက် ဒဏ်ကြေးပေးဆောင်ဖို့ပျက်ကွက် တဲ့ပြည်ပအလုပ်အကိုင်အေဂျင်စီ ၁၂၀ ကျော်ရှိပြီး လစဉ် တစ်သိန်းကျပ်နှုန်း တိုးမြှင့် ပေးဆောင်ရမယ်လို့ အလုပ်သမားဝန်ကြီးဌာန လက်အောက်ရှိ Safe Migration မှ ဖေဖော်ဝါရီ ၃ ရက် မှာ အသိပေးထုတ်ပြန်လိုက်ပါတယ်။
ထုတ်ပြန်ထားတဲ့စာရင်း အရ ကဏ္ဍအလိုက် ဒဏ်ကြေးပေးဆောင် ဖို့ ကျန်ရှိတဲ့ လိုင်စင်ရ အေဂျင်စီ ၁၂၃ ခု ရှိ ကာ အချို့ အေဂျင်စီ တွေ မှာ သတ်မှတ်ရက် တွင် ဒဏ်ကြေး မပေးဆောင် တဲ့ အတွက် လစဥ် ၁သိန်းကျပ် နှုန်း တိုးမြှင့် ပေးဆောင်ရမယ်လို့ ထုတ်ပြန် သတိပေးထားပါတယ်။
ကဏ္ဍအလိုက် ဒဏ်ကြေးပေးဆောင်ဖို့ပျက်ကွက်တဲ့အေဂျင်စီ ၁၂၃ ခုစာရင်းထဲ တွင် သတ်မှတ်ရက်မပေးလို့ လစဉ် တစ်သိန်းနှုန်းတိုးကောက်ခံရတဲ့ ကုမ္ပဏီ မှာ ၁၆ ခု ၊ ဒုတိယအကြိမ်ထိ ပျက်ကွက်ခဲ့တဲ့ ကုမ္ပဏီ မှာ ၃ ခု နဲ့ တတိယအကြိမ်ထိ ပျက်ကွက်ခဲ့တဲ့ ကုမ္ပဏီ ၃ ခုရှိတယ်လို့သိရပါတယ်။
""အဓိက ဒဏ်ရိုက် ခံရတာက မိသားစုထံ လွှဲ ပို့ငွေ စိစစ်မှု မှာ မတင်ပြ နိုင်တာ တွေ များတယ် တစ်ချို့က သူတို့ သတ်မှတ်ထားတဲ့ နှုန်းထားမပြည့်တာ အဲ့တော့ အေဂျင်စီ တွေ အနေနဲ့ လစဉ် တိုင်း လွှဲပို့ငွေ အထောက်အထားစာရင်း ပို့နေရပေမယ့် အလုပ်သမားတွေ ဆီက မရတော့ ဒဏ်ရိုက်ခံရတာတွေ ဖြစ်ကုန်တာ ဒဏ်ကြေး မဆောင်ရင်လည်း နောက်လ ဆို တစ်သိန်း နှုန်းနဲ့ တစ်လ စီ တိုးကောက်သွားမှာ""လို့ လိုင်စင်ရအေဂျင်စီ မှ တာဝန်ရှိသူတစ်ဦးကပြောပါတယ်။
ဒဏ်ကြေးငွေ မပေးသွင်းမီ ကာလ အတွင်း Demand Letter (အလုပ်ခေါ်စာ)အသစ် တင်ပြခွင့် ကိုပါ ဆိုင်းငံ့ထားတယ်လို့ သိရပါတယ်။
အလုပ်သမားဝန်ကြီးဌာနရဲ့ ထုတ်ပြန်အသိပေးချက်မှာလည်း အလုပ်သမားစေလွှတ်တဲ့ လချုပ်စာရင်းတွေ ကို အချိန်မီ ပေးပို့တင်ပြရန်၊ မိသားစုလွှဲပို့ငွေ စိစစ်မှုကို ၄လ တစ်ကြိမ် စိစစ်မှု ပြုလုပ်နေ တဲ့ အတွက် အလုပ်သမားလွှဲပို့ထားတဲ့ အထောက်အထားရှိသည်ဖြစ်စေ မရှိသည် ဖြစ်စေ သတင်းပို့ဖို့ကို လည်း အသိပေးထားပါတယ်။
