ထိုင်းနိုင်ငံသို့ တရားမဝင် ဝင်ရောက် လာလို့ အဖမ်းခံရတဲ့ မြန်မာရွှေ့ပြောင်း လုပ်သား ဒီဇင်ဘာ ၁၆ ရက် တစ်ရက် ထဲ မှာ တင် အယောက် ၇၀ကျော် ရှိကြောင်း ထိုင်းသတင်းတွေရဲ့ ဖေါ်ပြချက်အရ သိရပါတယ်။

 

ကန်ချနဘူရီမြို့ အမှတ် ၃၂၃ အဝေးပြေးလမ်းမကြီးပေါ် မှာ မြန်မာရွှေ့ပြောင်း လုပ်သား ၁၉ဦး ကို တင်ဆောင် လာတဲ့ ပစ်ကပ်ကားတစ်စီး ကို ထိုင်းရဲတပ်ဖွဲ့က စစ်ဆေးရန် ရပ်တန့် ခိုင်းရာ ကားမောင်းသူက စစ်ဆေးမခံဘဲ ကားကို လမ်းကြောင်းပြောင်း၍ မောင်းပြေးစဉ် ကန်ချနဘူရီမြို့ဝမ်ယန်ဒေသရှိ ကြံခင်းထဲအရောက် လမ်းဘေးမြောင်းဘောင်နှင့် တိုက်မိပြီး ရပ်တန့်သွားကာ ယာဉ်မောင်း ဖြစ်သူထွက်ပြေးသွားတယ်လို့ ထိုင်းသတင်းတွေ မှာ ဖေါ် ပြထားပါတယ်။

 

၎င်းယာဉ်ပေါ်မှ မြန်မာ လုပ်သား အချို့လည်း ထွက်ပြေးခဲ့တဲ့ အတွက် ထိုင်း ရဲတပ်ဖွဲ့က လိုက်လံဖမ်းဆီးရာ အမျိုးသား ၈ဦး အမျိုးသမီး ၂ဦးနဲ့အသက်၁၈နှစ်အောက် ကလေးကိုးဦးတို့ ဖမ်းဆီးရမိခဲ့ပြီး ယာဉ်မောင်းဖြစ်သူကတော့ လွတ်မြောက်သွားတယ်လို့ ဆိုပါတယ်။

 

ထပ်မံ ပြီး ဒီဇင်ဘာလ ၁၆ ရက် ည မှာလည်း စူဖန်ဘူရီခရိုင် တွင် ပစ်ကပ်ကား သုံးစီးဖြင့် တရားမဝင် လာတဲ့ မြန်မာနိုင်ငံသား ၅၂ ဦး ဖမ်းဆီးခံရကြောင်း သိရပါတယ်။

 

၎င်းခရိုင် အတွင်း တောတွင်းတနေရာမှာ မုန့်ထုတ်အခွံတွေ နဲ့ စွန့်ပစ်အမှိုက် တွေကို တွေ့ရတဲ့ အတွက် ထိုင်းရဲတပ်ဖွဲ့က မင်္သာကာ တာကြောင့် စောင့်ကြည့် ဖမ်းဆီးရာ ပစ်ကပ်ကားသုံးစီးနှင့်အတူ မြန်မာနိုင်ငံသား အမျိုးသား ၂၇ ဦး၊ အမျိုးသမီး ၂၂ ဦး၊ ကလေး ၃ ဦး စုစုပေါင်း ၅၂ ဦးတွေ့ရပြီး ကားသမားသုံးဦးကိုလည်း ဖမ်းဆီးခဲ့ကြောင်း ထိုင်းသတင်းမှာဖေါ်ပြထားပါတယ်။

 

အဖမ်းခံရသူတွေ ထဲ မှာ အချို့ဟာ ထိုင်းနိုင်ငံ အတွင်း အလုပ်လုပ်ရန်ရည်ရွယ်ပြီး ဝင်ရောက် ကျတာဖြစ်သလို အချို့ကလည်း မလေးရှားအထိ သွားရန် ရည်ရွယ်ထားကြပြီး ခရီးစရိတ် ဘတ် ၁၀၀၀၀ မှ ၂၀၀၀၀ အထိ ကုန်ကျတယ်လို့ ဆိုပါတယ်။

 

ဖမ်းဆီးခံရ တဲ့ မြန်မာ ရွှေ့ပြောင်းလုပ်သားတွေနဲ့ကားသမား တွေကို သက်ဆိုင်ရာ ရဲစခန်းများသို့ ပို့ဆောင်ခဲ့ပြီး ဥပဒေအရ ဆက်လက်အရေးယူမယ် လို့ သတင်း မှာ ဖော်ပြထားပါတယ်။

 

ထိုင်းနိုင်ငံအတွင်း က အထောက်ထားမရှိတဲ့ မြန်မာအပါအဝင် နိုင်ငံခြားသားလုပ်သားတွေကို အလုပ်လုပ်ကိုင်ခွင့် ပန်းရောင်ကတ် လျှောက်ထား ခွင့်ကို ယခု ဒီဇင်ဘာ ၁၂ ရက်မှဒီဇင်ဘာ၂၆ရက်အထိ ထိုင်းအစိုးရမှ လျှောက်ထား ခွင့်ပေးထားရာ ၎င်းကာလ အတွင်း မြန်မာရွှေ့ပြောင်း လုပ်သားတွေ ထိုင်းနိုင်ငံ အတွင်းသို့ နည်းလမ်းအမျိုးမျိုးနဲ့ ဝင်ရောက်လာသလို ထိုင်းအာဏာပိုင်တွေဘက်က လည်း နယ်စပ် ဂိတ်တွေမှာ ယခင်ထက် စစ်ဆေးရေးတင်းကြပ်စွာ ဖမ်းဆီးမှု တွေ ပြုလုပ်လျက်ရှိကြောင်း သိရပါတယ်။

HTH

Ref-CH7News,CIB