ထိုင်းနိုင်ငံ ၊လယောင်မြို့နယ်၊နိခွန်းဖတ်ထနာတွင်ရှိသော ခြေသုတ်၊ဖော့ဖျာထုတ်လုပ်သည့်စက်ရုံမှာ လုပ်ကိုင်နေတဲ့ မြန်မာလုပ်သား ၇၇ဦး ကို ရှယ်ယာရှင်သူဌေးမှ အလုပ်ကနေ မောင်းထုတ်ခံရမှု ဖြစ်ပေါ်ခဲ့တယ်လို့ ၎င်းအမှု ကို ကူညီပေးနေတဲ့ WAG အလုပ်သမားမဟာမိတ်အဖွဲ့ထံမှ သိရပါတယ်။
မြန်မာအလုပ်သမား အမျိုးသား ၇၇ဦးဟာ ၄င်း အလုပ်ရုံ မှာ အလုပ်လုပ်ကိုင်နေတာ ၃လမှ ၁နှစ်ကျော် သက်တမ်းအထိရှိကျပြီးပြီးခဲ့တဲ့ ဖေဖေါ်ဝါရီ ၁၈ရက်မှာရှယ်ယာရှင်သူဌေးမှ လာရောက်ကြည့်ရှုပြီး မြန်မာအလုပ်သမားတို့ကိုအလုပ်မှမောင်းထုတ်ခဲ့တယ်လို့ ဆိုပါတယ်။
အခုလို အကြောင်းမဲ့ အလုပ်ထုတ်ခံရတဲ့ အတွက် မြန်မာအလုပ်သမားတွေဟာ စားဝတ်နေရေးအခက်ခဲ ဖြစ်သလို အလုပ်သစ်ရှာဖွေ ဖို့အတွက်ပါ ခက်ခဲနေတာကြောင့်WAGအလုပ်သမားမဟာမိတ်အဖွဲ့ထံ အကူအညီတောင်းခံလာတယ်လို့ သိရပါတယ်။
အလုပ်သမားတွေရဲ့အကူညီတောင်းခံမှုအရ WAGအလုပ်သမားမဟာမိတ်အဖွဲ့ ဟာ ဖေဖေါ်ဝါရီ ၂၀ရက် မှာ အလုပ်သမားတွေနဲ့အလုပ်ရှင်သူဌေးတို့ကို နယ်မြေခံ စဝပ်ဒီကန်ရုံးသို့သွားရောက်တိုင်ပင် ညှိနှိုင်းခဲ့ရာ အလုပ်ရှင်မှအလုပ်သမားတို့ကို အလုပ်ပြန်ခေါ်မယ်လို့ သဘောတူ ညှိနှိုင်းမှုရခဲ့တယ်လို့ WAGအဖွဲ့ထံမှ သိရပါတယ်။
ဒါ့အပြင် လုပ်ငန်းခွင်အတွက် စဝပ်ဒီကန်မှချမှတ်ထားသောစည်းကမ်းချက်များကို ပြန်လည်လုပ်ဆောင်ပေးမယ်လို့ အလုပ်ရှင်ဘက် က တာဝန်ရှိလူကြီးများရှေ့မှာ ကတိပြုခဲ့တယ်လို့ သိရပါတယ်။
ထိုင်းနိုင်ငံအတွင်း က အလုပ်ရှင်အချို့ဟာ ရွှေ့ပြောင်း မြန်မာ လုပ်သားတွေ ကို အလုပ်ဝင်ပြီ လအနည်းငယ်အတွင်းမှာဘဲ အလုပ်ဖြုတ်တာတွေ မကြာခဏ လုပ်ဆောင်နေပေမယ့် အလုပ်သမားတွေဟာမြန်မာအလုပ်သမားသံရုံးထက် ထိုင်းရှိ မြန်မာအလုပ်သမားအဖွဲ့စည်းတွေကတစ်ဆင့် သက်ဆိုင်ရာကို တိုင်ကြားပြီးမိမိတို့ရဲ့ နစ်နာမှု အတွက် ညှိနှိုင်းတောင်းဆိုနေကျရတယ်လို့ သိရပါတယ်။
