ထိုင်းနိုင်ငံအတွင်းသို့ ဝင်ရောက်လုပ်ကိုင်နေကြတဲ့ မြန်မာအလုပ်သမားတွေ ရင်ဆိုင်ကြုံတွေ့ရတဲ့ အခက်အခဲတွေကို ကူညီပေးမဲ့သူရှားပါးလာတယ်လို့ ထိုင်းရောက်မြန်မာအလုပ်သမားရေးကူညီဆောင် ရွက်သူတစ်ဦးက ဆိုပါတယ်။
ထိုင်းရောက်မြန်မာအလုပ်သမားတွေကို ကူညီပေးနေကြ သူတွေအားလုံးဟာ ပရောဂျက်အရ လုပ်ကိုင်နေကြတာလည်းဖြစ်သလို အခုလိုအကူညီတွေရံပုံငွေတွေမရှိတော့တဲ့အခါ အဖွဲ့အစည်းရဲ့ ရံပုံငွေတွေ လျှော့ချလိုက်ရခြင်းတွေ အသုံးစရိတ်တွေမရှိတော့တဲ့အခါ ဥပဒေကြောင်းအရ ရင်ဆိုင်ကြဖို့နဲ့ အလုပ်သမားတွေဖြစ်နေ ရှိနေကြတဲ့ နေရာတွေဆီကိုသွားရောက်ဖို့နဲ့ အဆက်သွယ်တွေလုပ်ရဖို့အတွက် ငွေကြေးအခက်အခဲတွေဖြစ်လာတာကြောင့် အလုပ်သမားတွေကို ကူညီပေးနိုင်ဖို့ခက်ခဲလာတယ်လို့ ဆိုပါတယ်။
"အခုက ဘယ်လမ်းကြောင်းက တရားဝင်ပဲလာလာ တရားမဝင်ပဲ လာလာ အလုပ်သမားတွေအခက်အခဲ ရင်ဆိုင်လာရရင် ကူညီပေးမဲ့သူ ရှားလာကြပြီ။ အစိုးရကလည်းတာဝန်မယူတော့သလို အလုပ်သမား အရေးလုပ်နေကြတဲ့ အဖွဲ့အစည်းတွေကလည်း တာဝန်မယူနိုင်ကြတော့ဘူး။ ပြဿနာ တစုံတရာဖြစ်လာခဲ့ရင် တာဝန်ယူပေးကြမယ့်သူတွေမရှိကြတော့ အလုပ်သမားတွေက စွန့်ပစ်အလုပ်သမားရယ်လို့ဖြစ်လာတယ်" လို့ ဆိုပါတယ်။
ထိုင်းနိုင်ငံအတွင်းရှိတဲ့ မြန်မာအလုပ်သမားတွေကို ကူညီဆောင်ရွက်ပေးနေတဲ့ အဖွဲ့အစည်းတွေဟာ ၎င်းတို့ အဖွဲ့အစည်းက အဖွဲ့ဝင်အလုပ်သမားတွေရဲ့ တရားဝင်မှုကိုပင် ရုန်းကန်နေကြရတာဖြစ်ပြီး ထိုင်းရောက်မြန်မာ အလုပ်သမားတွေရဲ့ အခက်အခဲတွေ ပြဿနာတွေနဲ့အလုပ်ထုတ်ခံရတာတွေ လုပ်ခလစာမရတာတွေစတဲ့ အလုပ်သမားတွေရဲ့အကြောင်းအမျိုးမျိုးသောအလုပ်ရှင် အလုပ်သမားပြဿနာတွေကို ကူညီပေးဖို့ခက်ခဲလာကာ ၎င်းတို့လက်လှမ်းမီသလောက်သာ ကူညီပေးနိုင်တာဖြစ်တယ်လို့လည်း သိရပါတယ်။
လတ်တလောကာလမှာထိုင်းရောက်မြန်မာအလုပ်သမားတွေဟာ အခက်အခဲမျိုးစုံကို ရင်ဆိုင်လာကြရတာ ဖြစ်သလို နိုင်ငံတွင်းကစစ်ကောင်စီရဲ့ နည်းမျိုးစုံသောကန့်သတ်ချက်များစွာနဲ့ ပိတ်ဆို့မှုများစွာကြောင့် ပြည်တွင်းအလုပ်သမားတွေဟာ တရားဝင်ရောက်ရှိလာခြင်းထက် တရားမဝင်ဝင်ရောက်လုပ်ကိုင်ရတာတွေကပိုမိုများပြားလာလို့ အခက်အခဲများစွာလည်း ရင်ဆိုင်ရမှုပိုမိုများပြားလာတဲ့အပြင် ဖမ်းဆီးခံရမှုတွေဟာလည်း ပိုမိုများပြားလာကာ စွန့်ပစ်ခံအလုပ်သမားတွေအဖြစ်ရောက်ရှိလာကြတယ်လို့ သိရပါတယ်။
"အားလုံးက ပရောဂျက်အရ လုပ်နေရတာ။ ရံပုံငွေ မရှိကြတော့ရင် ဝန်ထမ်းတွေ လျှော့ချရတယ် အထွေ ထွေ အသုံးစရိတ်တွေမရှိရင် ဥပဒေအရ ရင်ဆိုင်ကြဖို့ အလုပ်သမားတွေကို ဝန်ဆောင်မှူပေးဖို့ အလုပ်သမားတွေရှိ နေတဲ့နေရာကို သွားရောက်ဖို့ အနည်းဆုံး အဆက်အသွယ် လုပ်ကြဖို့ ဒါတွေအားလုံးက ငွေလိုတယ်။ နောက်ပိုင်းမှာ ကိုယ့်နိုင်ငံကမှ အလေးမထားကြတဲ့ နိုင်ငံသားတွေကို ဒေသခံ အာဏာပိုင်တွေကလည်း နည်းလမ်းမျိုးစုံနဲ့ နှိပ်ကွပ်လာကြတာ။ အဖွဲ့အစည်းတွေ ကိုယ်တိုင်တောင် သူဝန်ထမ်းရဲ့ တရားဝင်မှူကို မနည်းကျားကန်နေရတာ"လို့ ထိုင်းရောက်မြန်မာအလုပ်သမားရေး ကူညီဆောင်ရွက်ပေး တဲ့ အဖွဲ့အစည်းမှ အဖွဲ့ဝင်တစ်ဦးကဆိုပါတယ်။
အဲ့ဒီလိုပြဿနာများစွာကို ရင်ဆိုင်လာရတဲ့ ထိုင်းရောက်မြန်မာအလုပ်သမားတွေ အဆမတန်များပြားလာ တာဖြစ်ပေမဲ့ အဲ့ဒီအလုပ်သမားတွေကို ကူညီပေးနိုင်တဲ့သူနဲ့ အဖွဲ့အစည်းတွေလည်း ၎င်းတို့ကိုယ်တိုင်ရင်ဆိုင်လာရတဲ့ အခက်အခဲတွေကြောင့် ကူညီပေးနိုင်ဖို့ရှားပါးလာတယ်လို့ သိရပါတယ်။
