ထိုင်းနိုင်ငံအတွင်းသို့ရောက်ရှိလုပ်ကိုင်နေကြတဲ့ မြန်မာအလုပ်သမားများရဲ့ ဘဏ်ငွေစာရင်းများအသုံးပြုကာ အွန်လိုင်းငွေကြေးလိမ်လည်မှုတွေမှာ အသုံးချခံရနေရတယ်လို့ ထိုင်းရဲတပ်ဖွဲ့ရဲ့ဖော်ထုတ်လိုက်တဲ့သတင်း တွေအရ သိရပါတယ်။
"ဒါကအရင်ကလည်းရှိတယ်။ ခုကပိုများလာတာပေါ့။ပြီးတဲ့လကတည်းက ဒီလိုလိမ်လည်မှုတွေရှိနေလို့ ဘဏ်စာရင်းလုပ်ပေးမယ် အကောင့်ဖွင့်ပေးမယ်ဆိုတာတွေ သတိထားဖို့သံရုံးကလည်းသတိပေးခဲ့တယ်။ နောက်ပြီးပွဲစားတွေ အလုပ်သမားတွေရဲ့အထောက်အထားတွေနဲ့ ဘဏ်စာအုပ်တွေသိမ်းထားတာတွေရှိ တတ်တယ်။ ဒါတွေကမလုပ်ရဘူး။ လုပ်ခွင့်လည်းမရှိဘူး။ဒီလိုလုပ်လာရင် တိုင်ကြားဖို့ သံရုံးကထုတ် ပြန်ထားသေးတယ်"လို့ ထိုင်းရောက်မြန်မာအလုပ်သမားတစ်ဦးကဆိုပါတယ်။
ထိုင်းနိုင်ငံအတွင်းရှိ အယုဒ္ဓယ၊ နသွန်ဘူရီနှင့် နသွန်ပထုံစတဲ့ဒေသများမှာ ရွှေ့ပြောင်းအလုပ်သမားတွေရဲ့ ငွေစာရင်း တွေကို အွန်လိုင်းလိမ်လည်မှုနှင့် အခြားလိမ်လည်မှုများတွင် အသုံးပြုခဲ့သူများကို တွေ့ရှိရပြီး ဖမ်းဆီးရမိခဲ့တာလို့ ထိုင်းရဲတပ်ဖွဲ့က ဇူလိုင်၁၂ ရက် ထုတ်ပြန်ခဲ့တယ်"လို့ အဲ့ဒီနိုင်ငံအခြေစိုက်သတင်းတွေရဲ့ ဖော်ပြချက်တွေအရ သိရပါတယ်။
ထိုင်းရဲတပ်ဖွဲ့ရဲ့သတင်းထုတ်ပြန်ချက်အရ ရွှေ့ပြောင်းလုပ်သား ၅၀ ကျော်မှာ ဘဏ်အကောင့်ပေါင်း ၁၀၀ ကျော် ဖွင့်လှစ်ရန် လိမ်လည်လှည့်ဖျားခံခဲ့ရတာဖြစ်ပြီး အဆိုပါဘဏ်အကောင့်တွေနဲ့ လည်ပတ်နေတဲ့ ငွေကြေးပမာဏမှာ ထိုင်းဘတ်ငွေ သန်း ၃၀၀၀ နီးပါးအထိရှိတယ်လို့လည်း သိရပါတယ်။
အဲ့ဒီလိုအသုံးချခံရတဲ့ မြန်မာအလုပ်သမားတွေဟာ တရား၀င်ရောက်ရှိလုပ်ကိုင်နေကြတဲ့ MOU မြန်မာလုပ်သားများပါ၀င်နေပြီး အဆိုပါအလုပ်သမားတွေဟာ MOU ကုမ္ပဏီများက စီစဉ်ပေးတဲ့ဘဏ်တွေမှာ ဘဏ်စာရင်းဖွင့်လှစ်ခြင်း၊ ဘဏ်စာအုပ်ပြုလုပ်ခြင်းတို့ဆောင်ရွက်ရာမှာ ထိုင်းနိုင်ငံရဲ့ဘဏ်လုပ်ငန်းစဉ်များနှင့် မရင်းနှီးတာကြောင့် MOU ကုမ္ပဏီမှ ကိုယ်စားလှယ်အချို့၏ ပြောကြားချက်များအတိုင်း လိုက်ပါဆောင်ရွက်ရခြင်းနဲ့ ဘဏ်စာရင်းနှင့် စာုပ်တွေကို ကိုယ်စားလှယ်အချို့က ထိန်းသိမ်းထားခြင်း ပြုလုပ်ခံရတာလို့ သိရပါတယ်။
မြန်မာလုပ်သားအချို့ရဲ့ဘဏ်စာရင်းနှင့် ဘဏ်စာအုပ်ထိန်းသိမ်းထားသူ ကိုယ်စားလှယ်တွေက အွန်လိုင်းမှတစ်ဆင့်လောင်းကစားလုပ်သူများ၊ ငွေကြေးခဝါချလိုသူများထံ မြန်မာလုပ်သားများ၏ ဘဏ်စာရင်းနှင့် ဘဏ်စာအုပ်များကို အခကြေးငွေရယူပြီး ပေးအပ်ခဲ့ခြင်းများရှိခဲ့သလို ဘဏ်စာရင်းများတွင် ငွေကြေးဝင်/ထွက်မှုများခြင်း၊ စုဆောင်းငွေများပြားခြင်းစတဲ့ မသင်္ကာဖြစ်ဖွယ်ကိစ္စများကြောင့် ဘဏ်စာရင်းစာအုပ်ပိုင်ရှင် မြန်မာလုပ်သားများကိုဆင့်ခေါ်ဝရမ်းထုတ်ခြင်း၊ ဖမ်းဝရမ်းထုတ်ခြင်း၊ အချုပ်ထောင်တွင် ချုပ်နှောင်ထားခံရခြင်း၊ ထွက်ပြေးတိမ်းရှောင်ခြင်း စတဲ့ဖြစ်စဉ်များ တွေ့ကြုံနေရတာကြောင့် ထိုင်းရောက်မြန်မာသံရုံးအနေနဲ့ ကူညီဖြေရှင်းပေးလျက်ရှိပြီး ဘဏ်စာအုပ်တွေ ပြန်လည်အပ်နှံခဲ့တာတွေလည်းရှိတယ်လို့ သိရပါတယ်။
ထိုင်းရောက်မြန်မာလုပ်သားများအနေဖြင့် ဘဏ်စာရင်း၊ ဘဏ်စာအုပ်နှင့် PIN နံပါတ်များကို မိမိတစ်ဦးတည်း၊ သို့မဟုတ်ဘဲ မိသားစုထံတွင်လည်း သိမ်းဆည်းထားရန်လိုအပ်တယ်လို့လည်း ဆိုထားပါတယ်။