ထိုင်းနိုင်ငံမှာအလုပ်လုပ်ကိုင်နေတဲ့ MOU မြန်မာအလုပ်သမားတွေရဲ့ဘဏ်စာရင်းနဲ့ဘဏ်စာအုပ်တွေကိုအွန်လိုင်းလောင်းကစားလုပ်ကိုင်သူတွေနဲ့ငွေကြေးခဝါချလိုသူကအသုံးချတာတွေရှိနေတယ်လို့ထိုင်းနိုင်ငံ၊ ဘန်ကောက်မြို့ရှိမြန်မာသံရုံးကဇွန်လ(၆)ရက်နေ့မှာသတင်းထုတ်ပြန်ပါတယ်။
လက်ရှိမှာMOUလုပ်သားတွေဟာဒီအခြေအနေတွေကြောင့်ဘဏ်စာရင်းပိုင်ရှင်တွေကိုဆင့်ခေါ်ဝရမ်းထုတ်ခံရတာ၊ဖမ်းဝရမ်းထုတ်ခံရတာနဲ့အချုပ်ထောင်မှာချုပ်နှောင်ခံရတာတွေရှိနေပါတယ်။
ထိုင်းနိုင်ငံမှာအလုပ်လုပ်ကိုင်မယ့်မြန်မာအလုပ်သမားတွေက MOU ကုမ္ပဏီတွေကစီစဉ်ပေးတဲ့ဘဏ်တွေမှာဘဏ်စာရင်းဖွင့်တာတွေ၊ ဘဏ်စာအုပ်ပြုလုပ်တာတွေလုပ်ဆောင်ရပါတယ်။ဒီအခြေအနေမှာဘဏ်လုပ်ငန်းစဉ်နဲ့မရင်းနှီးတဲ့အလုပ်သမားတွေကကုမ္ပဏီကိုယ်စားလှယ်တချို့ရဲ့ပြောကြားချက်ကိုလိုက်ပါဆောင်ရွက်ရတာ၊ ဘဏ်စာရင်းနဲ့စာအုပ်တို့ကိုက်ုယ်စားလှယ်ကထိန်းသိမ်းတာတွေတွေ့ကြုံနေရပါတယ်။
လက်ရှိမှာတော့ကိုယ်စား လှယ်တွေကအခကြေးငွေရယူကာအွန်လိုင်းကတစ်ဆင့်လောင်းကစားလုပ်သူတွေ၊ငွေကြေးခဝါချသူတွေကိုရောင်းချနေတာဖြစ်ပါတယ်။
ရောင်းချခံရတဲ့ဘဏ်စာရင်းတွေ၊ စာအုပ်တွေကငွေကြေးဝင်ထွက်မှုများတာ၊ စုဆောင်းငွေပမာဏများလွန်းနေတာကြောင့်ထိုင်းအာဏာပိုင်အဖွဲ့အစည်းတွေကအရေးယူတာတွေလုပ်ဆောင်နေတယ်လို့သံရုံးကဖော်ပြထားပါတယ်။
"အရင်ကတည်းကဒီလိုကိစ္စတွေကကြားဖူးတယ်။နောက်တစ်ချို့အလုပ်သမားအရေးကူပေးနေတဲ့အဖွဲ့အစည်းတွေကသတိပေးတာတွေလည်းရှိတယ်။သူများနိုင်ငံမှာအလုပ်လုပ်မယ်ဆိုရင်တော့အရမ်းရိုးလွန်းရင်မကောင်းဘူး။အခုတော့ခံရတဲ့သူတွေကပညာရသွားတာပေါ့"လို့ထိုင်းရောက်မြန်မာအလုပ်သမားတစ်ဦးကပြောပါတယ်။
အလုပ်သမားတွေအနေနဲ့ဘဏ်စာရင်း၊ ဘဏ်စာအုပ်အလွဲသုံးစားအလုပ်ခံရရင်ကာယကံရှင်ရဲ့နိုင်ငံကူးလက်မှတ်မိတ္တူ(ဓာတ်ပုံပါ)၊ တယ်လီဖုန်းနံပါတ်၊ စာရင်းဖွင့်ခဲ့တဲ့ဘဏ်အမည်နဲ့နယ်မြေ၊ ဘဏ်စာရင်းဖွင့်ရာမှာလိုက်ပါဆောင်ရွက်ပေးသူဓာတ်ပုံ(ရှိပါကယူဆောင်လာရန်)စတာတွေကိုကာယကံရှင်ဖြစ်စေမိတ်ဆွေကဖြစ်စေယူဆောင်လာပြီးမြန်မာသံရုံးနဲ့အလုပ်သမားသံအရာရှိရုံးတွေကိုလာရောက်အကူအညီတောင်းခံနိုင်တယ်လို့ထုတ်ပြန်ထားပါတယ်။
