ထိုင်းနိုင်ငံထဲကို နယ်စပ်လမ်းကြောင်းအသီးသီးကဝင်ရောက်လာတဲ့မြန်မာရွှေ့ပြောင်းလုပ်သား ၆၀၀၀၀ ခန့်ဟာထိုင်းအကျဥ်းထောင်တွေထဲမှာဖမ်းဆီးခံထားရတယ်လို့ထိုင်းရွှေ့ပြောင်းရေးလုပ်သားကျွမ်းကျင်သူတွေကပြောပါတယ်။
ဖမ်းဆီးခံထားရတဲ့မြန်မာလုပ်သားတွေအနေနဲ့ထိုင်းနိုင်ငံကစွဲဆိုထားတဲ့ဥပဒေတွေနဲ့ရင်ဆိုင်နေရပြီးမြန်မာနိုင်ငံကိုပြန်ပို့ခံရတဲ့သူအနည်းငယ်သာရှိတယ်လို့သိရပါတယ်။
"ခုပဲမိသားစုနဲ့နောက်၂နှစ်လောက်အထိမတွေ့ရတော့မယ့်သူတွေထိုင်းထောင်ထဲမှာအများကြီးပြန်ချပေးနိုင်တာကလဲနဲနဲလေးပါ ဒီမှာရှိတဲ့အလုပ်သမားတွေတောင်အလုပ်လက်မဲ့အများကြီးစက်ရုံတခုကတရာလောက်ခေါ်ရင်တထောင်လောက်ဝိုင်းလျှောက်နေကြရတဲ့အခြေအနေဖြစ်နေတော့ပွဲစားတွေကိုပိုက်ဆံကြိုပေးပြီးအယုံမလွယ်ကြဖို့ပြောချင်တယ်"လို့ထိုင်းရောက်မြန်မာလုပ်သားအရေးဆောင်ရွက်နေသူကိုရဲမင်း(AAC)က MLNကိုပြောပါတယ်။
လက်ရှိထိုင်းနိုင်ငံကိုတရားဝင်လာရောက်အလုပ်လုပ်ဖို့ငွေအကျေသွင်းထားတဲ့လုပ်သားသိန်းဂဏန်းနီးပါးရှိနေပြီးစာရင်းပေးထားတဲ့မြန်မာလုပ်သား၆သောင်းနီးပါရှိနေပါတယ်။
"ရှေ့မှာတန်းစီနေတဲ့သူတွေတောင်အများကြီးပြီးတော့ကြိုစာရင်းပေးထားတဲ့သူတွေလဲအများကြီး ဒီလိုရှေ့ကအများကြီးတောင်ဝင်ခွင့်မရသေးတာသတိထားကြဖို့ပဲပြောချင်ပါတယ်"လို့ကိုရဲမင်းကဆက်ပြောပါတယ်။
ထို့အတူမြန်မာနိုင်ငံကနေထိုင်းနိုင်ငံကိုလာရောက်လုပ်ကိုင်လိုတဲ့အလုပ်သမားတွေအနေနဲ့နှစ်နိုင်ငံနယ်စပ်ဂိတ်ဖွင့်လှစ်မယ်ဆိုတဲ့သတင်းတွေကိုမယုံကြည်ကြဖို့ပြောကြားတာတွေလဲရှိနေပါတယ်။
ဒီကိစ္စတွေနဲ့ပတ်သတ်ပြီးကိုရဲမင်းက"နယ်စပ်ဂိတ်ကထိုင်းဖက်ကသူ့ဟာသူတံမျက်စည်းလှဲလဲဖွင့်မယ်လျောက်ပြောနေတာ ထိုင်းဖက်ကဖွင့်မယ်ဆိုရင်တောင်မြန်မာဖက်ကဘာလို့အဆင်ပြေမလဲ မြဝတီဂိတ်ဆိုခုတိုက်ပွဲဖြစ်နေတဲ့လမ်းကလာရမှာဒီအလုပ်သမားတွေအသက်ဘယ်သူကအာမခံမှာလဲ ဒါတွေရှိသေးတယ် ပြီးတော့ဒီနယ်စပ်ဂိတ်ဖွင့်တာနဲ့စကစကအခွန်တွေရမှာသူတို့ကျည်ဖိုးရမှာဒီကာလမှတော့နှစ်ဖက်မျှတွေးမှရမယ်"လို့ပြောပါတယ်။
မကြာခင်အချိန်ကပဲယခုလ ၅ရက်နေ့နဲ့ ၉ရက်နေ့တွေမှာမယ်ဆိုင်-တာချီလိတ်ဂိတ်၊ မြဝတီ-မဲဆောက်ဂိတ်တွေပြန်ဖွင့်မယ်လို့သတင်းတွေထွက်ပေါ်ခဲ့ပေမယ့်ယခုအချိန်အထိဖွင့်လှစ်ခြင်းမရှိသေးသလိုနှစ်နိုင်ငံနယ်စပ်ဝင်ပေါက်တွေမှာမြန်မာလုပ်သားတွေတရားမဝင်လာရောက်မှု့နဲ့ဆက်လက်ဖမ်းဆီးခံနေရပါတယ်။
