မြန်မာနိုင်ငံတွင် စစ်ကောင်စီ၏ အာဏာသိမ်းမှုနှင့် ကိုဗစ်-၁၉ ကမ္ဘာ့ကပ်ရောဂါကြောင့် အလုပ်လက်မဲ့များ တိုးပွားလာပြီး ထိုင်းနှင့် မလေးရှားနိုင်ငံများသို့ တရားမဝင်အလုပ်သွားရောက် လုပ်ကိုင်မှုများပိုမိုများပြားလာကြောင်း ပြည်ပအလုပ်အကိုင်ဝန်ဆောင်မှုအေဂျင်စီနှင့်ပွဲစားများထံမှ သိရပါတယ်။
မြန်မာနိုင်ငံတွင် ကိုဗစ်-၁၉ ကမ္ဘာ့ကပ်ရောဂါကြောင့် ပြည်တွင်းအလုပ်သမားများ အလုပ်အကိုင်အခွင့်အလမ်းများ ဆုံးရှုံးကာ အလုပ်လက်မဲ့များ ဖြစ်ပေါ်လာကြောင်း၊ ၂၀၂၁ ဖေဖော်ဝါရီလတွင်လည်း စစ်တပ်က တရားမဝင်အာဏာသိမ်း၍ ပြည်ပရင်းနှီးမြုပ်နှံမှုအချို့ ပြန်လည်ထွက်ခွာသွားခြင်း၊ စစ်ပွဲများ ပိုမိုများပြားလာခြင်းနှင့်အတူ မလုံခြုံမှုများကြောင့် လူငယ် လူရွယ်များ ထိုင်းနိုင်ငံနှင့် မလေးရှားနိုင်ငံသို့ တရားမဝင် ပိုမိုသွားရောက်လာခြင်းဖြစ်ကြောင်း မလေးရှားနိုင်ငံသို့ တရားမဝင်ပို့ဆောင်နေသော ပွဲစားတစ်ဦးက Myanmar Labour News ကိုပြောပါတယ်။
“ဒီမှာက ဘာမှလုပ်လို့ ကိုင်လို့ မဖြစ်တော့ဘူးလေ။ လက်ရှိလုပ်နေရတဲ့ သူတွေကလည်း စားဖို့ သောက်ဖို့တောင် အနိုင်နိုင်လုပ်နေရတာ။ လစာတွေကလည်း နည်းတယ်။ အညာဘက်ကလူတွေ ပိုသွားကြတယ်။ အဲ့မှာက မလုံခြုံကြတော့ တချို့ဆို ငွေချေးပြီးတော့ သွားကြတယ်။ တချို့ကတော့ ရှိတာ ရောင်းချပြီး သွားကြတာပဲ။ ဒီမှာက ဘာမှအဆင်မပြေကြဘူး။ အခုတောင် သွားချင်တဲ့ သူတွေ အများကြီး။ တန်းစီစောင့်နေကြတာပဲ” ဟု ၎င်းက ဆက်လက်ပြောပါတယ်။
“ကျွန်တော်ကတော့ အခုထိုင်းကိုအောက်လမ်းက သွားမှာပါ။ မြိတ်ဘက်နေသွားမှာ။ သူငယ်ချင်းတွေလည်း ဟိုမှာ ရောက်နေကြပြီ။ ကျွန်တော်ပဲ ကျန်တော့တယ်။ ဒီမှာက အလုပ်လည်း မရှိဘူး။ စစ်တပ်ကလည်း လူငယ်တွေဆိုရင် ဖမ်းချင်နေကြတာ။ ကျွန်တော်တို့ နယ်ဘက်မှာ ကျွန်တော်အပါအဝင် လူငယ်နည်းနည်းပဲ ရှိတော့တယ်။ ဒီမှာက ဘာမှ လုပ်မရတော့တာ။ သွားဖို့ပဲ ရှိတာပေါ့”ဟု ထိုင်းနိုင်ငံကို တရားမဝင်သွားရောက်လုပ်ကိုင်ရန်ပြင်ဆင်နေသော မကွေးတိုင်းမှ အသက် (၂၂)နှစ်အရွယ် ကိုလွင်မောင်က ပြောပါတယ်။
ထိုင်နိုင်ငံနှင့် မလေးရှားနိုင်ငံသို့ တရားမဝင်သွားရောက်လုပ်ကိုင်ရန် ကြိုးစားမှုကြောင့် မြန်မာနိုင်ငံမှ ရာနှင့်ချီသော တရားမဝင်ရွေ့ပြောင်းအလုပ်သမားများသည် မကြာခဏ ထိုင်းနယ်စပ်တွင် ဖမ်းဆီးခံနေရတာလည်း ဖြစ်ပါတယ်။
ကိုဗစ်-၁၉ ကမ္ဘာ့ကပ်ရောဂါကြောင့် အလုပ်အကိုင်အခွင့်အလမ်းများ ဆုံးရှုံးလာမှုနှင့် အလုပ်လက်မဲ့ဖြစ်မှုသည် စစ်တပ်၏ အာဏာသိမ်းမှုကြောင့် အလုပ်လက်မဲ့များ ပိုမိုတိုးလာပြီး ၂၀၂၁ ခုနှစ်တွင် မြန်မာနိုင်ငံ၌ အလုပ်အကိုင် ၁.၆ သန်းဆုံးရှုံးခဲ့ရကြောင်း အပြည်ပြည်ဆိုင်ရာအလုပ်သမားရေးရာရုံး (အိုင်အယ်လ်အို)၏ ထုတ်ပြန်ချက်အရ သိရပါတယ်။
