ထိုင်းနဲ့မလေးရှား နိုင်ငံမှာ တရားမဝင် နေထိုင်မှုနဲ့ အဖမ်းဆီး ခံရတဲ့ မြန်မာအလုပ်သမားတွေ ကို ထိုင်းနဲ့မလေးရှား အာဏာပိုင်တွေ က စစ်ကောင်စီ ထံ ပြန်ပို့ပေးခြင်း အပေါ်  ကန်ကွက်သောအားဖြင့် ငြိမ်းချမ်းစွာ ဆန္ဒဖော်ထုတ် မှု ပြုလုပ်မယ်လို့ Stars of Myanmar Friendship UK အဖွဲ့ ထံ မှ သိရပါတယ်။ 

ဆန္ဒထုတ်ဖော်မှု ကို ၂၀၂၅ ခုနှစ် မတ်လ ၄ ရက် နေ့ တွင် လန်ဒန်မြို့ရှိ ထိုင်းသံရုံးရှေ့ တွင် နေ့လည် ၁နာရီခွဲ မှ ၂နာရီအထိ လည်းကောင်း လန်ဒန်မြို့ရှိ မလေးသံရုံးရှေ့ တွင် နေ့လည် ၂နာရီ ခွဲ မှ ၃နာရီ အထိ လုပ်ဆောင်မယ်လို့ သိရပါတယ်။ 

တရားမဝင် နေထိုင်မှုနဲ့ သက်ဆိုင်ရာ နိုင်ငံတွေက ဖမ်းဆီးပြီး   မြန်မာစစ်အာဏာရှင်လက်အောက်သို့ ပြန်လည်ပို့ဆောင်ခံရတဲ့အလုပ်သမားတွေဟာ  အတင်းအဓမ္မ စစ်သားစုဆောင်းခံရခြင်း၊ လူသားဒိုင်းအဖြစ် အသုံးချခံရခြင်းနဲ့  စစ်မြေပြင်တွင် သေဆုံးရခြင်းတွေ နဲ့  ရင်ဆိုင်နေရပါတယ်။ 

 ၁၉၅၁ ခုနှစ် ဒုက္ခသည်များဆိုင်ရာ ကွန်ဗင်းရှင်းနှင့် နိုင်ငံတကာဥပဒေအရ မည်သည့်နိုင်ငံကမျှ ညှင်းပန်းနှိပ်စက်ခြင်း၊ ထိခိုက်နစ်နာခြင်း သို့မဟုတ် သေဆုံးခြင်းတို့ကို ရင်ဆိုင်ရနိုင်တဲ့  နေရာသို့ လူများကို ပြန်ပို့ခြင်း မပြုသင့်ဘူးလို့ ဆိုပါတယ်။ 

ထိုင်းနိုင်ငံအနေနဲ့  ဒုက္ခသည်များဆိုင်ရာ ကွန်ဗင်းရှင်း မှာ လက်မှတ်ရေးထိုးထားခြင်း မရှိပေမယ့်  အတင်းအဓမ္မ လုပ်အားပေးခိုင်းစေခြင်းနှင့် မတရား ဖမ်းဆီးထိန်းသိမ်းခြင်းကို တားမြစ်သည့် ICCPR (International Covenant on Civil and Political Rights) ကဲ့သို့သော လူ့အခွင့်အရေးဆိုင်ရာ စာချုပ်များ ကို လက်မှတ်ရေးထိုးထားတယ်လို့ သိရပါတယ်။ 

ဒါ့အပြင် မလေးရှားနိုင်ငံဟာ လည်း  ICCPR  စာချုပ်ကို လက်မှတ်ရေးထိုးထားခြင်း မရှိပေမယ့် မလေးရှားနိုင်ငံသည် ကုလသမဂ္ဂ အဖွဲ့ဝင်နိုင်ငံတစ်နိုင်ငံဖြစ်ပြီး၊ နိုင်ငံတကာ လူ့အခွင့်အရေးဆိုင်ရာ အခြေခံမူများကို လိုက်နာရန် မျှော်လင့် တယ်လို့Stars of Myanmar Friendship UK အဖွဲ့ကဆိုထားပါတယ်။ 

ဒါကြောင့် ထိုင်း နှင့် မလေးရှား နိုင်ငံအနေ နဲ့ လူ့အခွင့်အရေးစံနှုန်းများကို လိုက်နာပြီး မြန်မာရွှေ့ပြောင်းလုပ်သားများ၏ ဂုဏ်သိက္ခာနှင့် လုံခြုံရေးကို ချိုးဖောက်ခြင်းကို ရပ်တန့်ပေးရန် တောင်းဆို၊ ဆန္ဒပြပွဲကို လည်း စိတ်ပါ ဝင်စားသူတွေ အတူပူးပေါင်းပါဝင်ရန် ဖိတ်ခေါ်ထားကာ ဆန္ဒပြပွဲ ကို လာရောက်လိုသူတွေ အနေနဲ့ SMFC ရဲ့  page messanger မှာလာရောက် ပြောကြားပေးဖို့ ကြေညာထားပါတယ်။