ထိုင်းနိုင်ငံ ချွန်ပူလီခရိုင် ဘော်ထောင်းမြို့ရှိ (မီးကြိုးစက်ရုံ) မှာ အလုပ်လုပ်ကိုင်နေတဲ့ မြန်မာလုပ်သား ၅၀ ကျော်ကို ရသင့်တဲ့နစ်နာကြေး မပေးဘဲ စက်ရုံဘက်မှ အလုပ်ဖြုတ်လိုက်ကြောင်း မြန်မာလုပ်သားတွေကို ကူညီပေးနေတဲ့ WAG မဟာမိတ်အလုပ်သမားအဖွဲ့ ထံ မှ သိရပါတယ်။
မြန်မာရွှေ့ပြောင်းလုပ်သား ၅၁ ဦးဟာ MOU/Name list ကိုင်ဆောင်ထားသူတွေ ဖြစ်ပြီး ၎င်းစက်ရုံ မှာ အများဆုံး ၃ နှစ်အထိ လုပ်သက်ရှိသူတွေ ဖြစ်တယ်လို့ သိရပါတယ်။
စက်ရုံ ကို ဇွန်လ ၂၅ရက်က စစ်ဆေးရေး ဝင်စစ်ခံရပြီးနောက် စက်ရုံကို အကန့်သတ်မရှိ ပိတ်လိုက်ရပြီး စက်ရုံရှိ လုပ်သားတွေကို နားရက်တွေမှာ ဒေးကြေး ဘတ် ၄၀၀ ပေးမယ်လို့ ပြောခဲ့တယ်လို့သိရပါတယ်။
ပြီးခဲ့တဲ့ ဇူလိုင် ၁၁ရက် က လုပ်သားတွေကို အစည်းဝေးခေါ်ကာ အလုပ်နားရက်များအတွက် ဒေးကြေးပေးမယ့် ကိစ္စကို ပြန်လည်ရုတ်သိမ်းသွားသလို နစ်နာကြေး အတွက် တစ်ဦးကို ဘတ် ၄၀၀၀ ပေးပြီး စာရွက်စာတမ်းနဲ့ကျန့်အော် ထုတ်ပေးမယ်လို့ စက်ရုံ မှ တာဝန်ရှိသူတွေက ပြောကြောင်း သိရပါတယ်။
အခုလို ထိုက်သင့်တဲ့နစ်နာကြေးမရဘဲ အလုပ်ဖြုတ်ခံရတဲ့ အတွက် မြန်မာလုပ်သားတွေ မှာ အခက်ခဲဖြစ်ပေါ်တာကြောင့် WAGအလုပ်သမားမဟာမိတ်အဖွဲ့ထံ အကူညီတောင်းခံပြီး ဇူလိုင် ၂၂ရက်မှာ နယ်မြေခံဆာဝါဒီကန်ရုံးကို သွားရောက် တိုင်ကြားခဲ့တယ်လို့ သိရပါတယ်။
""စက်ရုံဘက်က အလုပ်ပိတ်တယ်ဆိုပြီး အလုပ်သမားတွေကို အလုပ်ဖြုတ်လိုက်တဲ့ အတွက် နယ်မြေခံဆာဝါဒီကန်ရုံးမှာတိုင်စာတင်ထားတယ် ဆာဝါဒီကန်ရုံးဘက်က သူဌေးကိုဆက်သွယ်မေးမြန်းပေးမယ် ပြီးရင် အကြောင်းပြန်ကြားပေးမယ်လို့ပြောပါတယ်""WAGမဟာမိတ်အဖွဲ့မှတာဝန်ရှိသူတစ်ဦးကပြောပါတယ်။
ယခုဇူလိုင် လ အတွင်း WAG အလုပ်သမားမဟာမိတ်အဖွဲ့ထံ လုပ်ခလစာမရသူတွေနဲ့နစ်နာကြေးမရဘဲ အလုပ်ဖြုတ်ခံရလို့ဆက်သွယ်အကူညီတောင်းခံလာတဲ့ မြန်မာလုပ်သား ၃၀၀ နီးပါးရှိကြောင်း WAG အလုပ်သမားမဟာမိတ်အဖွဲ့ရဲ့ ထုတ်ပြန်တဲ့ မှတ်တမ်း တွေ အရသိရပါတယ်။
