ထိုင်းနိုင်ငံ ချွန်ပူလီမြို့ Won Sinh Technology ( Thailand ) ပါကေးပြား စက်ရုံ မှ လုပ်ငန်းရှင် မှ စက်ရုံ အတွင်း လုပ်သားဦးရေ များနေလို့ဆိုကာ မြန်မာရွှေ့ပြောင်း လုပ်သား ၆၀ကျော်ကို နစ်နာကြေးမပေးဘဲ အလုပ်ဖြုတ်လိုက်တယ်လို့ မြန်မာနိုင်ငံ အလင်းသစ်အလုပ်သမားသမဂ္ဂများအဖွဲ့ချုပ် NLF-Myanmar မှ သိရပါတယ်။
အလုပ်ထုတ်ပယ်ခံလိုက်ရတဲ့ မြန်မာရွှေ့ပြောင်း လုပ်သား ၆၀ ကျော်မှာ ၎င်း စက်ရုံတွင် လုပ်သက် ၆လ အထက် နှင့် တစ်နှစ် ရှိသူတွေ ဖြစ်ကာ MOU ၊CI စတဲ့ အထောက်အထားအပြည့်စုံနဲ့ လုပ်ကိုင်နေတဲ့ လုပ်သားတွေ ဖြစ်တယ်လို့ သိရပါတယ်။
"စက်ရုံ ဘက်မှ မြန်မာရွှေ့ပြောင်း အလုပ်သမား ၆၀ ကျော်ကိုမတ် ၁၈ ရက် မနက်ပိုင်း တွင် အလုပ်ထွက်စာ ကို အတင်းအကြပ် လက်မှတ်ထိုးခိုင်းပြီး HR က မန်နေဂျာ က နစ်နာကြေး မပေးဘဲ အလုပ်သမားအပေါ် တာဝန်ယူမှု မရှိတဲ့အပြင် ခြိမ်းခြောက်မှုများ ပြုလုပ်နေတယ်" လို့ အလုပ်ဖြုတ်ခံရတဲ့ အလုပ်သမားက ပြောပြလာပါတယ်။
""စကားပြန်ကို မေးတော့ အလုပ်ထဲမှာ အပြစ်မရှိဘူး လူများလို့လူ လျှော့တဲ့ အထဲ ပါသွားတယ်လို့ ပြောတယ် အလုပ်ထွက်စာမှာလဲ လက်မှတ် ဇွတ် ထိုးခိုင်းပါတယ် ညီမက ထိုင်းစာတွေ နားမလည်လို့ မထိုးဘဲမေးကြည့်အုံးမယ် မထိုးသေးဘူးပြောခဲ့ပါတယ် ညီမတို့အလုပ်သမားတွေရဲ့ နှစ်နာမှု အတွက် ဘယ်လိုများ တာဝန် ယူပေးမလဲမေးတော့ အရှေ့HR က မန်နေဂျာအမကို ပြန်မေးပေးတော့ မန်နေဂျာက သူတို့တာဝန် မယူနိုင်ဘူး တိုင်ချင်လဲ တိုင်လို့ပြောပါတယ်”လို့ အလုပ်ထုတ်ခံရသူ မြန်မာအလုပ်သမားတစ်ဦးကပြောပါတယ်။
၎င်းစက်ရုံ ထဲ တွင် စက်ရုံပေါင်း ၆ ရုံ ရှိပြီး အလုပ်သမားဦးရေ ၉၀၀ကျော် ရှိတယ်လို့ သိရပါတယ်။
လက်ရှိမှာတော့ ယခုကဲ့သို့ ဥပဒေမဲ့ အလုပ်ထုတ်ခံရတဲ့ အတွက် မြန်မာရွှေ့ပြောင်းအလုပ်သမားတွေ အနေနဲ့ အမျိုးသားညီညွတ်ရေးအစိုးရ(NUG)ရဲ့ အလုပ်သမားဝန်ကြီးဌာနအပါအဝင် သက်ဆိုင်ရာ အလုပ်သမားအဖွဲ့စည်းတွေထံ အကူညီတောင်း တိုင်ကြားထားတယ်လို့ သိရပါတယ်။
