ထိုင်းနိုင်ငံ အတွင်း တရားမဝင် နိုင်ငံခြားသားအလုပ်သမားတွေ ကို ရက်ပေါင်း ၁၂၀ စီမံချက်နဲ့ ဖမ်းဆီးရာ လက်ရှိရက်ပေါင်း၅၀အတွင်း မြန်မာအလုပ်သမား တစ်သိန်းကျော် ဖမ်းဆီးခံရတယ်လို့ ထိုင်းသတင်းဌာနတွေ ထံ က သိရပါတယ်။
ဇွန်လ ၅ရက်မှ ဇူလိုင်၂၅ ရက်နေ့ထိ ရက်ပေါင်း ၅၀ အတွင်းတရားမဝင်ရွှေ့ပြောင်းအလုပ်သမား စုစုပေါင်း ၁၄၇,၇၂၆ ဦးဖမ်းဆီးရမိတယ်လို့ ဆိုပါတယ်။
အခုလို အဖမ်းခံရတဲ့ တရားမဝင်နိုင်ငံခြားသားလုပ်သားတွေထဲ မှာ မြန်မာအလုပ်သမား အများဆုံး ဖြစ်တယ်လို့ သိရပါတယ်။
""စီမံချက် ကာလ ဆိုတော့ အဖမ်းဆီးက ကြမ်းတယ် သွားသတိလာသတိနေရတာပဲ ဒီမှာ ဖမ်းနေတယ် ဆိုလို့ မြန်မာပြည်ပြန်တော့လဲ ရွာလည်း နေလို့မရသလို အိမ်လဲ မရှိတော့ဘူးလေ ဒီဘက်မှာပဲ အဆင်ပြေသလို လုပ်ကိုင်စားသောက်ရင်းနဲ့ နေရတာပဲ ကံမကောင်းလို့ အဖမ်းခံရတော့လဲ မတတ်နိုင်ဘူးပေါ့ ကိုယ်ကတော့ အမြဲ သတိထားနေရတာပဲ ဒီမှာရောက်နေတဲ့ တရားမဝင် လုပ်သားတွေလည်း ဒီလိုပဲ နေနေကြရတာ""လို့ ထိုင်းနိုင်ငံ ရောက်မြန်မာအလုပ်သမားတစ်ဦးကပြောပါတယ်။
ဒါ့အပြင် ထိုင်းအလုပ်သမားဦးစီးဌာန က ထိုင်းနိုင်ငံရှိ လုပ်ငန်းရှင်တွေ အနေနဲ့ မိမိတို့ စက်ရုံ အလုပ်ရုံ တွေ မှာ အလုပ်လုပ်ခွင့်ပါမစ်မရှိတဲ့ အလုပ်သမားတွေ ကို လက်မခံဘို့၊ ရွှေ့ပြောင်းအလုပ်သမားတွေ လုပ်ကိုင်ခွင့်မရှိတဲ့ အလုပ်အမျိုးအစားတွေ မှာ အလုပ်လုပ်ခွင့်မပြုဖို့ နဲ့ တွေ့ရှိပါက ဒဏ်ကြေးငွေ ပေးဆောင်ရမယ်လို့ အသိပေးချက် ထုတ်ပြန်ထားပါတယ်။
လက်ရှိ ရက်ပေါင်း၅၀ အတွင်း ဖမ်းဆီးရမိတဲ့ နိုင်ငံအလိုက်အလုပ်သမားတွေ မှာ မြန်မာ
အလုပ်သမား ၁၁၀,၁၃၀ ဦး ၊ ကမ္ဘောဒီးယားအလုပ်သမား ၂၂,၉၉၉ ဦး ၊ လာအိုအလုပ်သမား၉,၆၇၅ ဦး ၊ ဗီယက်နမ်အလုပ်သမား၁၀၄ ဦး နှင့် အခြားနိုင်ငံသားအလုပ်သမား၄,၈၁၈ ဦးဖြစ်ကြပြီး ၎င်း တို့အနက်
မြန်မာအလုပ်သမား ၆၅၈ ဦး၊ လာအိုအလုပ်သမား ၁၄၇ ဦး ၊ကမ္ဘောဒီးယားအလုပ်သမား ၁၄၁ ဦး ၊ဗီယက်နမ်အလုပ်သမား ၂၁ ဦး၊အခြားနိုင်ငံအလုပ်သမား ၇၀ ဦးတို့ကို အရေးယူဆောင်ရွက်ပြီးသွားပြီးဖြစ်တယ်လို့ သိရပါတယ်။
