ထိုင်းနိုင်ငံ အတွင်းဝင်ရောက်ဖို့ အတွက် ကွန်တိန်နာ ကား အောက်ကနေ ပုန်းအောင်းလိုက်လာတဲ့ မြန်မာနိုင်ငံသား ၈ ဦး ကို ဖမ်းမိခဲ့တယ်လို့ တာ့ခ်ခရိုင် လူဝင်မှုကြီးကြပ်ရေး က ထုတ်ပြန်ထားပါတယ်။
နိုဝင်ဘာ ၁၆ရက် ညနေ ၃နာရီ ခန့်မှာ တာ့ခရိုင် လဝကမှူးရဲမှူးကြီး နဲ့ တာ့ခရိုင် လူဝင်မှုကြီးကြပ်ရေးရုံးမှ ရဲတပ်ဖွဲ့ ဝင်များဟာ ယာဉ်စစ်ဆေးရေး လုပ်ငန်း ကို လုပ်ကိုင် နေစဉ် မဲဆောက်-မြဝတီ အမှတ်၂ ချစ်ကြည်ရေး တံတား ရှိ စစ်ဆေးရေး ဂိတ်မှာ အဖမ်းခံရတာ ဖြစ်တယ်လို့ဆိုပါတယ်။
၎င်း မြန်မာနိုင်ငံသား ၈ဦး ဟာ ကွန်တိန်နာ ကား ရဲ့ အောက်ဘက် လွတ်တဲ့နေရာ မှာ အိပ်ပြီး လိုက်လာတာ ဖြစ်တယ်လို့ သိရပါတယ်။
အခုလို တရားမဝင် ပုန်းအောင် ဝင်ရောက်လာတဲ့ အတွက် မြန်မာနိုင်ငံသား ၈ ဦး ကို ထိုင်းဥပဒေအရ အရေးယူသွားမယ်လို့ တာခ့်ခရိုင်လူဝင်မှုကြီး ကြပ်ရေး က ထုတ်ပြန်ထားပါတယ်။
ယခု လ အတွင်း ထိုင်းနိုင်ငံရှိ စစ်ဆေးရေးဂိတ်တွေ မှာ တရားမဝင် နိုင်ငံခြားသားတွေကို စစ်ဆေးမှုတွေ တင်းကြပ်လျက်ရှိပြီး ပြီးခဲ့တဲ့ရက်ပိုင်းကလည်း မြန်မာနိုင်ငံကို ပြန်လာ ဖို့ အတွက် ဘတ်စ်ကားစီးလာတဲ့ မြန်မာနိုင်ငံသား ၇ ဦးဟာ စန်ခရာဘူရီ ဒေသရှိစစ်ဆေးရေးဂိတ်မှာ အဖမ်းခံရတယ်လို့ ထိုင်းသတင်းတွေအရသိရပါတယ်။
