ထိုင်းနိုင်ငံတွင် ဆေးရုံတက်ပြီး ဆေးကုသမှုခံယူနေတဲ့မြန်မာအလုပ်သမားတစ်ဦးကို ထိုင်းရဲတပ်ကြပ်ကြီးဆိုသူက လူနာမေးဟန်ဆောင်ကာ သေနတ်ဖြင့်၀င်ရောက်ပစ်သတ်မှုဖြစ်ပွားခဲ့တယ်လို့ သိရပါတယ်။
"၀င်ပြီးပစ်သတ်တဲ့သူက ထိုင်းရဲတပ်ကြပ်ကြီးတဲ့။ အဖမ်းခံတယ်။ စိတ်ကျရောဂါဖြစ်နေတယ်တဲ့။ သတင်းတွေအရပေါ့။ အခြားအကြောင်းအရာတွေလည်းရှိနိုင်ပါတယ်"လို့ ထိုင်းရောက်မြန်မာအလုပ်သမားရေးကူညီဆောင်ရွက်သူတစ်ဦးက ဆိုပါတယ်။
အဆိုပါပစ်ခတ်မှုဖြစ်စဉ်မှာ ထိုင်းနိုင်ငံအရှေ့မြောက် ပိုင်း မွမ်ခရိုင်၊ ခွန်ကန်ဒေသရှိ ပြည်သူ့ဆေးရုံတွင် ဇွန် ၇ ရက် နံနက်အစောပိုင်းက ဖြစ်ပွား ခဲ့ခြင်းဖြစ်တယ်လို့ ထိုင်းနိုင်ငံအခြေစိုက်သတင်းတွေအရ သိရပါတယ်။
ပစ်သတ်ခံရမှုကြောင့် သေဆုံးသူမှာ အသက် ၂၉ နှစ်အရွယ်ရှိ မြန်မာရွှေ့ပြောင်းအလုပ်သမားတစ်ဦးဖြစ်သူ ကျော်စိုးအောင်ဆိုသူဖြစ်ပြီး ၎င်းက ဆေးရုံရဲ့ငါးထပ်ရှိအမျိုးသား ခွဲစိတ်လူနာဆောင်မှာ ကျောကုန်းနောက်ကျောရှိ အကြိတ်ဖုတစ်ခုကိုခွဲစိတ်ကုသရန် တက်ရောက်နေခြင်းဖြစ်တယ်လို့ သိရပါတယ်။
ပစ်ခံရသူအလုပ်သမားကျော်စိုးအောင်ဟာ ရန်ညှိုးဖွဲ့ရန်စမရှိဘဲ လုပ်ဖော်ကိုင်ဖက်တစ်ဦးထံသို့ ATM ငွေထုတ်ကတ်စပေါ်ပေးထားကာ ဘတ်ငွေ ၁၂၀၀၀ ချေးယူထားတဲ့ဖြစ်စဉ်သာရှိပြီး ၎င်းခွဲစိတ်ကုသရန် ရက်ချိန်းရထားတဲ့နေ့မှာပင် ပစ်သတ်ခံရခြင်းဖြစ်တယ်လို့ သေဆုံးသူမြန်မာအလုပ်သမားရဲ့ချစ်သူဖြစ်တဲ့ အမျိုးသမီးက ရဲတပ်ဖွဲ့ထံ ထွက်ဆိုထားတယ်လို့လည်း သိရပါတယ်။
မြန်မာအလုပ်သမားကို ပစ်သတ်တဲ့ပြစ်မှုကျူးလွန်သူသေနတ်သမားဟာ ရဲတပ်ကြပ်အရာရှိသူဖြစ်ပြီး ဇွန် ၆ ရက် ညသန်းခေါင်အချိန်(ဇွန်၇ရက်နံနက်အစောပိုင်း) ဆေးရုံသို့ ရောက်ရှိလာပြီး ကျော်စိုးအောင် တက်ရောက်နေသည့်အခန်းကို သူနာပြုများထံ မေးမြန်းခဲ့ကာ ခွဲစိတ်လူနာဆောင်ဆီ တက်လာကာ အိပ်ပျော်နေတဲ့ကျော်စိုးအောင်ရဲ့ ဦးခေါင်း နောက်စေ့ကို သေနတ်ဖြင့် တစ်ချက်တည်း ပစ်ခတ်ထွက်ပြေးခဲ့တာဖြစ်ပြီး ဇွန် ၇ ရက်နေ့ခင်းမှာတော့ကျူးလွန်သူကို ဖမ်းဆီးရမိထားတယ်လို့ သိရပါတယ်။
