ထိုင်းနိုင်ငံ ကန်ချနဘူရီခရိုင်၊ စံခလပူရီမြို့နယ်ထဲ ရှိ တောထဲ မှာ ပုန်းအောင်းနေတဲ့ တရားမဝင် ဝင်ရောက်လာကြသော မြန်မာနိုင်ငံသား ၄၃ဦးကို ဒီဇင်ဘာ ၁၈ ရက် မနက်ပိုင်းမှာ ထိုင်းလုံခြုံရေး ပူးပေါင်းအဖွဲ့တွေက စီးနင်းဖမ်းဆီးခဲ့တယ်လို့ ထိုင်းသတင်းတွေရဲ့ ဖေါ်ပြချက်အရသိရပါတယ်။

 

စံခလပူရီ မြို့နယ် ထဲ က တောတွင်း တနေရာမှာ လူစိမ်းတွေ ပုန်းအောင်းနေကြောင်း သတင်း ပေးတဲ့ အတွက် ထိုင်း အာဏာပိုင်တွေက စုပေါင်းပြီး စစ်ဆေးရှာဖွေရာ တောလမ်းအတိုင်း တောင်ပေါ်ကို ၁ ကီလိုမီတာကျော်ကျော် ခြေကျင်ခရီးနဲ့ ခက်ခက်ခဲခဲ တက်ခဲ့ပြီးနောက် ပုန်းအောင်းနေတဲ့နေရာကို ရောက်တဲ့အခါမှာတော့ မြန်မာနိုင်ငံသား ၄၃ ဦးကို စုပြုံပြီး တွေ့ရှိခဲ့တယ်လို့ သတင်းမှာဖေါ်ပြထားပါတယ်။

 

မြန်မာနိုင်ငံသား ၄၃ဦး တွင် အမျိုးသား ၃၀ ဦး၊ အမျိုးသမီး ၉ ဦး၊ ကလေးငယ် ၄ ဦး တို့ ပါဝင် ပြီး စစ်ဆေးမေးမြန်းရာမှာ ထိုင်းနိုင်ငံ အတွင်းပိုင်းသို့ သွားရောက် ဖို့ အတွက် ပို့ဆောင်ပေးမယ့်သူတွေကို စောင့်ဆိုင်းနေတာ ဖြစ်တယ်လို့ ဆိုပါတယ်။

 

မြန်မာလုပ်သား တွေဟာ မြန်မာနိုင်ငံ ဘုရားသုံးဆူမြို့ ကနေ စံခလပူရီ မြို့ နယ် အတွင်း ကို နယ်စပ် လမ်းကြောင်းကနေ ခိုးဝင် လာကျတာဖြစ်ကာ အထောက်အထားစာရွက်စာတမ်း တစ်ခု မှ မရှိကျဘူးလို့ သတင်းမှာဖေါ်ပြထားပါတယ်။

ဖမ်းဆီးခံရသူအားလုံး ကို လူဝင်မှုကြီးကြပ်ရေးဥပဒေအရ အရေးယူဖို့ ရဲစခန်းကို ပို့ဆောင်ထားပြီး မြန်မာနိုင်ငံသို့ ပြန်ပို့ ဖို့ ညှိနှိုင်းဆောင်ရွက်မယ်လို့ သိရပါတယ်။

 

အခုလို တရားမဝင် ခိုးဝင်မှုတွေနဲ့ ရာဇဝတ်မှုတွေကို တားဆီးဖို့အတွက် နယ်စပ်ဂိတ်စစ်ဆေးရေးဂိတ်အားလုံးကို ဆက်လက် တင်းကြပ်စွာ စောင့်ကြည့် စစ်ဆေးတာတွေကို အရှိန်မြှင့်ပြီး ဆက်လုပ်သွားမယ်လို့ တာဝန်ရှိသူတွေက ပြောထားပါတယ်။

 

လက်ရှိအချိန်ကာလ ဟာ ထိုင်းနိုင်ငံ အတွင်းက အထောက်အထားမရှိတဲ့ နိုင်ငံခြားသား လုပ်သားတွေကို ထိုင်းအစိုးရက ပန်းရောင်ကတ်(ဘတ်) ပြုလုပ်ပေးချိန် ဖြစ်သလို အထောက်အထားမရှိသူတွေ နဲ့ တရားမဝင် ဝင်ရောက်သူတွေကို ဖမ်းဆီး တာ ကိုလည်း ပိုမိုတင်းကြပ်စွာ လုပ်ဆောင်နေတာကြောင့် အထောင်အထားမရှိသူတွေ နဲ့ နယ်စပ်ကတစ်ဆင့် ဝင်ရောက်လာတဲ့ မြန်မာနိုင်ငံသား တွေ အဖမ်းခံရမှုဟာ လည်း ယခုရက်ပိုင်း နေ့တိုင်းနီးပါး ဖြစ်ပေါ်လျက်ရှိကြောင်း သိရပါတယ်။

HTH

Ref-ကန်ချနဘူရီဒေသဆိုင်ရာသတင်း