ထိုင်းနိုင်ငံ အတွင်း အလုပ်လုပ်ကိုင်ဖို့ အတွက် နယ်စပ်ဖြတ်ကျော် လာတဲ့ မြန်မာအလုပ်သမား ၃၀ကျော် အဖမ်းခံရတယ်လို့ ထိုင်းဒေသတွင်းသတင်းတွေအရသိရပါတယ်။
မေလ ၂ရက် ညနေ ပိုင်းမှာ ထိုင်းနိုင်ငံ ဘန်ကောက် မြို့မှာ အလုပ်လုပ်ကိုင်ဖို့ အတွက် ဟင်းသီးဟင်းရွက်ကားပေါ် ပုန်းအောင်းလိုက်လာတဲ့ မြန်မာအလုပ်သမား ၄ ဦး ကို ထိုင်းအာဏာပိုင်တွေက စစ်ဆေးဖမ်းမိခဲ့တယ်လို့ သိရပါတယ်။
ဒါ့အပြင် မေလ ၂ရက် ည ၁၁နာရီ အတွင်းမှာ မြ၀တီဘက်ခြမ်းမှ ထိုင်းနိုင်ငံအတွင်း ဝင်ရောက်လာတဲ့ မြန်မာ ရွှေ့ပြောင်းလုပ်သား ၂၉ ယောက်ကို ထိုင်း နယ်ခြားစောင့်တပ် က တာ့ခ်ခရိုင်၊ ဖုပ်ဖရခရိုင်ခွဲ ဟွိုင်နမ်နက်ရွာအနီး မှာ ဖမ်းဆီးခဲ့ တယ်လို့ သတင်းမှာဖေါ်ပြထားပါတယ်။
အဖမ်းခံခဲ့ရတဲ့ မြန်မာလုပ်သား ၃၀ ကျော်ဟာ ထိုင်းနိုင်ငံ အတွင်း အလုပ်လုပ်ကိုင်ရန် တရားမဝင်နယ်စပ်ဖြတ်ကျော်နိုင် ဖို့ အတွက် ပို့ဆောင်ပေးတဲ့ ပွဲစားဆိုသူကို လုပ်သားတစ်ဦး လျှင် ထိုင်းဘတ်ငွေ ၁၅၀၀၀မှ ၂၀၀၀၀ ဘတ် ပေးဆောင်ရတယ်လို့ သိရပါတယ်။
လက်ရှိမှာ မြန်မာလုပ်သား၄ဦး ကိုတော့ မဲဆောက်လူဝင်မှုကြီးကြပ်ရေးဦးစီးဌာန က ဖမ်းဆီးထိန်းသိမ်းထားကာ မြန်မာလုပ်သား ၂၉ဦးကိုတော့ ဖုပ်ဖရ ရဲစခန်း တွင် အမှုဖွင့်အရေးယူ ထားတယ်လို့ သိရပါတယ်။
ပြီးခဲ့တဲ့ ဧပြီလနောက်ဆုံးပတ်ကလည်း ထိုင်းနိုင်ငံ အတွင်း အလုပ်လုပ်ကိုင်ဖို့ နယ်စပ်ဖြတ်ကျော် ဝင်ရောက်လာတဲ့ မြန်မာရွှေ့ပြောင်းလုပ်သား၅၀ခန့် အဖမ်းခံခဲ့ရပါသေးတယ်လို့သိရပါတယ်။
Ref:Addy Chaiyadech
