တောင်ကိုရီးယား သမ္မတနိုင်ငံသို့ အစိုးရပြည်ပအလုပ်အကိုင်အေဂျင်စီ(POEA)မှတစ်ဆင့် EPS စနစ်ဖြင့် မြန်မာလုပ်သား၂၀၀ခန့်ကို စေလွှတ်ခဲ့တယ်လို့ စစ်ကော်မရှင် ရဲ့ မြန်မာသံရုံးဆိုးလ်မြို့ က ထုတ်ပြန်ကြေညာထားပါတယ်။

 

ပြီးခဲ့တဲ့ အောက်တိုဘာ ၂၈ ရက်က EPS စနစ်ဖြင့် စေလွှတ်ခဲ့တဲ့ စိုက်ပျိုးရေးလုပ်သားသစ်(၁၂)ဦး၊ ဆောက်လုပ်ရေးလုပ်သားသစ်(၉)ဦး၊ ဝန်ဆောင်မှုလုပ်သားသစ်(၁၃)ဦး၊ Re-entry လုပ်သား (၁၂)ဦး စုစုပေါင်း လုပ်သား(၄၆)ဦးကို ကိုရီးယားလေကြောင်းလိုင်း KE492 ခရီးစဉ်ဖြင့် စေလွှတ်ခဲ့တယ်လို့ သိရပါတယ်။

 

ထပ်မံပြီး အောက်တိုဘာ ၂၉ ရက် တွင် ကုန်ထုတ်လုပ်သားသစ် (၁၄၇)ဦးကို မြန်မာအမျိုးသားလေကြောင်းလိုင်း UB8301 ခရီးစဉ်ဖြင့် စေလွှတ်ခဲ့တယ်လို့ ထုတ်ပြန်ထားပါတယ်။

 

ဒါ့ အပြင် ၂၀၂၅ ခုနှစ် ကိုရီးယားဘာသာအရည်အချင်းစစ် အထူးသီးသန့်စာမေးပွဲ (Special EPS-TOPIK)ကို ဖြေဆိုသူ ၇၇၀ ဦးတွင် ကျရှုံးသူ ၈၂ဦးရှိတယ်လို့ စစ်ကော်မရှင်ရဲ့ အစိုးရပြည်ပအလုပ်အကိုင်အေဂျင်စီ (POEA) ကထုတ်ပြန်ထားပါတယ်။

 

၎င်းစာမေးပွဲကို EPSစနစ် နဲ့ တောင်ကိုရီးယားတွင်၃နှစ် အလုပ်လုပ်ကိုင်ဖူးပြီးသတ်မှတ်ချက်များနဲ့ ကိုက်ညီသူတွေသာ ဖြေဆိုခွင့်ရရှိတာဖြစ်ကာတောင်ကိုရီးယား နိုင်ငံကို ထပ်မံသွားရောက် အလုပ်လုပ်နိုင်ဖို့ အတွက် ဖြေဆိုတာ ဖြစ်ကြောင်း သိရပါတယ်။

 

ယခုနှစ် EPS အထူးသီးသန့် စာမေးပွဲကို သက်မှတ်ချက်နဲ့ကိုက်ညီတဲ့ ဝင်ရောက်ဖြေဆို နိုင်ခွင့်ရှိ သူဦးရေ ၅၇၀၀ နီးပါးရှိပေမယ့် ယခင်နှစ်တွေက စာမေးပွဲအောင်မြင်ပြီး အလုပ်မရတာမျိုးတွေရှိတဲ့အတွက် ၀င်ရောက် ဖြေဆိုဖို့ လျှောက်ထားသူဟာ ၇၇၀ ဦးသာ ရှိခဲ့တယ်လို့ သိရပါတယ်။

 

တောင်ကိုရီးယားတွင် လက်ရှိ အလုပ်လုပ်ကိုင်နေတဲ့မြန်မာလုပ်သား ၈၀၀၀၀ နီးပါး ရှိကြောင်း သိရပါတယ်။