တရုတ် နိုင်ငံသား မှ မိန်းကလေးငယ်တစ်ဦး ရဲ့ နေအိမ် အထိ လာရောက်ပြီး မိန်းမ တောင်းတဲ့ ဗီဒီယို ဖိုင် တစ်ခုမှာ လူမှုကွန်ယက် တွင် ဝေဖန်မှု မြင့်တက်နေပါတယ်။
၎င်းဗီဒီယို ထဲ တွင် တရုတ်နိုင်ငံသားနဲ့ စကားပြန် မြန်မာအမျိုးသမီး တို့က မိန်းကလေးငယ်ရဲ့ နေအိမ် ကို လာရောက်ကာ မိန်းကလေးငယ် မှာ ချစ်စရာကောင်း ကြောင်း တရုတ်နိုင်ငံသား မှသဘောကျနေကြောင်း မိန်းကလေးငယ်ရဲ့ မိသားစု ထံ ရင်းနှီးအောင် စကားပြောဆို ကာ မိသားစုဝင် တွေ ကို မုန့်ဖိုးဆိုကာ ငွေအနည်းငယ် ပေးနေတာတွေ့ရပါတယ်။
စကားပြန်ဆိုသူနဲ့ လိုက်ပါလာသူက ယခုတရုတ် နိုင်ငံသားမှာ မြန်မာနိုင်ငံကို အိမ်ထောင်ဖက် လာရှာတာ ဖြစ်ကြောင်း အကယ်၍ မိဘများ မှ မိန်းကလေးငယ်နဲ့ ပေးစားရန် သဘောတူပါက ပြောနိုင်ကြောင်းနဲ့ မိဘတွေထံ ကျေနပ်စရာ ဖြစ်အောင် တင်တောင်းပေးမှာ ဖြစ်ကြောင်း နဲ့ နောက်ရက်များတွင် လည်း အိမ်လာလည်မှာ ကို ခွင့်ပြုပေးစေလိုကြောင်း ဗီဒီယိုထဲ မှာ ပြောကြားထားတာတွေ့ရပါတယ်။
ယခုဗီဒီယိုဖိုင် လိုင်းပေါ်မှာ ပျံနှံ့လာပြီး ဝေဖန်သူ ရှုတ်ချသူတွေ များခဲ့ပြီး လက်ရှိကာလ မှာ လည်း တရုတ်မယား အဖြစ် ငွေပေးစည်းရုံးတာတွေ အဖြစ်များနေတဲ့ အတွက် မြန်မာအမျိုးသမီးငယ်များအတွက် စိုးရိမ်သူတွေလည်း များနေပါတယ်။
""ဘယ်သူမှ အလကားသက်သက် ကို့အိတ်ထဲကပိုက်ဆံအကုန်မခံပါဘူး ဒီတရုတ်က သူလိုချင်နေတာရှိလို့ သူသဘောကျနေတာရှိနေလို့ ခလေးမလေးရဲ့မိသားစုကိုပိုက်ဆံတွေပေးပြီးလာစည်းရုံးနေတာပါ မိဘတွေ စဥ်းစားဆင်ခြင်သင့်ပါတယ် ကလေးမလေးတွေကအမျိုးကောင်းသမီးလေးတွေပါ ငယ်ငယ်ရွယ်ရွယ်လေးနဲ့ တရုတ်လက်ထဲမရောက်စေချင်ဘူး""လို့ လူမှုကွန်ယက်သုံးစွဲသူတစ်ဦးကဝေဖန်ရေးသားထားပါတယ်။
ထပ်မံပြီး လူမှုကွန်ယက် တွင် အွန်လိုင်းသုံးစွဲသူတစ်ဦးက""တရုတ် မယားရှာတာ မြန်မာပြည် ထဲထိမဟုတ်ဘူး ရပ်ထဲရွာထဲ ကနေ အိမ်ထဲ ထိ ရောက်လာကြပြီး အခုကိစ္စကို လဝကအက်နဲ့ လူကုန်တားပုဒ်မနဲ့ အရေးယူသင့်တယ် ပါဝင်ပက်သက်တဲ့ စကားပြန်ပေးသူကိုလည်း တာဝန်ရှိသူတွေ ဘယ်လိုအရေးယူမလဲ အရေးမယူဘဲ ဒီတိုင်းဘဲ ထားမှာလား သိချင်မိတယ်""လို့ ဝေဖန်ရေးသားထားပါတယ်။
မကြာသေးခင်ရက်ပိုင်းကလည်း မြန်မာနိုင်ငံ ပြည်နယ်နဲ့တိုင်းဒေသကြီးအချို့က အမျိုးသမီးငယ် ၆ ဦး ကို တရုတ်မယား ပြုလုပ်ရန် အတွက် ငွေပေးစည်းရုံး သွေးဆောင်ဖျားယောင်းသူတွေ ကို နှစ်ရှည်ထောင်ဒဏ် ချမှတ်ခဲ့တယ်လို့ စစ်ကောင်စီရဲ့ ပြန်ကြားရေးက ထုတ်ပြန်ထားပါသေးတယ်။
စစ်အာဏာသိမ်းပြီးနောက်ပိုင်း နိုင်ငံရေးမတည်ငြိမ်ခြင်းကြောင့် အခြေခံလူတန်းစားများမှာ စားဝတ်နေရေး အခက်ခဲ အကြပ်တည်း တွေ ပိုမိုရင်ဆိုင်နေရတာကို အခွင့်ကောင်းယူကာ ပွဲစားများက နည်းအမျိုးမျိုးနဲ့သိမ်းသွင်းပြီး မြန်မာအမျိုးသမီးများ ကို တရုတ်မယားအဖြစ်ရောင်းစားမှု တွေ ယခင်ထက်အဆများစွာ ဖြစ်ပေါ်လျက်ရှိပါတယ်။
