တရုတ်နိုင်ငံဘက်မှာ မြန်မာအလုပ်သမားတွေ လစာလျှော့ချခံရပြီး အလုပ်ထုတ်ခံတာတွေ အခုရက်ပိုင်းအတွင်း ဆက်တိုက် ဖြစ်ပေါ်နေတယ်လို့ အလုပ်သမားတဦး က ပြောပါတယ်။ လုပ်သားနည်းပါးချိန်က လုပ်ခလစာကောင်းပေမဲ့ လက်ရှိ လျှော့ချနေတယ်လို့ အလုပ်သမားတွေက ပြောပါတယ်။
“လုပ်သားတွေ သိပ်မရှိတုန်းက တလယွမ် ၂၀၀၀ ကျော်ရနေသူတဲ့သူတွေ၊ အခု ၁၇၀၀ လောက်ပဲ ပေးတယ်။ အကြောင်းအမျိုးမျိုးပြပြီး အလုပ်ထုတ်တယ်၊ လစာလျှော့တယ်၊ အလုပ်ချိန်တိုးပြီး အချိန်ပိုကြေး မပေးတာတွေ လုပ်တယ်။ တစ်ခုမဟုတ်တစ်ခု ကြုံတွေ့နေရတယ်။”လို့ တရုတ်နိုင်ငံ အထည်ချုပ်စက်ရုံမှာ လုပ်ကိုင်နေတဲ့ မြန်မာအလုပ်သမားတဦးက ပြောပါတယ်။
လက်ရှိ မန့်စီ၊ ရင်ကျန်း၊ ရွှေလီနဲ့ ကျန်းဖုန်းမြို့တွေက အထည်ချူပ်စက်ရုံတွေနဲ့ တခြား စက်ရုံအလုပ်ရုံတွေမှာ အခြေခံလုပ်သား များပြားလာတာကြောင့် စက်ရုံတွေဘက်က အချိန်ပိုကြေးမပေးတော့တာ၊ လုပ်ခလစာတွေကို လျှော့ချတာနဲ့ တပတ်ကတ်နဲ့ လုပ်ကိုင်နေသူတွေကို အလုပ်ထုတ်တာတွေပါ ပြုလုပ်လာတယ်လို့ ပြောဆိုပါ တယ်။ ဒါ့အပြင် အလုပ်ချိန် မနက် ၈ နာရီကနေ ည ၉ နာရီအထိ ခိုင်းစေတာတွေနဲ့ လုပ်ငန်းခွင်အတွင်း အဆင်မပြေသူတွေကို အလုပ်ထုတ်တာတွေ ပြုလုပ်လာတယ်လို့ အလုပ်သမားတွေက ပြောပါတယ်။
တစ်ပတ်ကတ်နဲ့ ဝင်ရောက်လုပ်ကိုင်သူတွေ ရက်လွန်ပါက တရုတ်အာဏာပိုင်တွေက ဖမ်းဆီးမှုတာတွေ ရှိလာပြီး ရာဇဝတ်မှု ကျူးလွန်သူတဦး တရုတ်နိုင်ငံဘက်ကို ဝင်ရောက်သွားတယ်ဆိုတဲ့သတင်းတွေကြောင့် တပတ်ကတ်နဲ့ ၀င်ရောက်သူ အနည်းငယ်လောက်သာ ခွင့်ပြုနေတယ်လို့ သိရပါတယ်။ ဒါပေမဲ့ စာအုပ်အနီနဲ့ ဝင်ရောက်သူတွေ ကို ဦးစာပေး ဝင်ခွင့်ပေးနေတယ်လို့လည်း မူဆယ် ဒေသခံ ပရဟိတအသင်း အဖွဲ့ဝင်တဦးက ပြောပါတယ်။
ပြီးခဲ့တဲ့ ဖေဖော်ဝါရီလ ၂၆/၂၇ ကတည်းက တရုတ်နိုင်ငံထဲ တခါသုံးကတ်နဲ့ ၀င်ရောက်ခွင့်ရထားသူတွေမှာ မတ် လ ၃ ရက်အထိ ဝင်ခွင့်မရသေးဘူးလို့ သိရပါတယ်။ ပြီးခဲ့တဲ့ကာလတွေက တခါသုံးကတ်နဲ့ ဝင်ရောက်ခွင့် ရသူ တွေဟာ အလုပ်ရှင်ထောက်ခံချက် နဲ့ QR လုပ်ပေးပြီး တစ်နှစ်အထိ နေထိုင်ခွင့်ပြုပေးပါတယ်။ အခုရက်ပိုင်းမှာ တော့ QR လုပ်ပေးတာ မရှိတော့လို့ လတ်တလော တရုတ်နိုင်ငံဘက် ဝင်မလာကြဖို့ကို မြန်မာ အလုပ်သမားတွေ နဲ့ ဒေသခံတွေက သတိပေး ပြောဆိုထားပါတယ်။
Photo - မြန်မာနိုင်ငံဘက်မှ တရုတ်နိုင်ံဘက် သို့ ဝင်ရောက်ဖို့ တန်းစီးနေစဉ် (ပုံဟောင်း)
