တရုတ်နိုင်ငံက စက်ရုံလုပ်ငန်းတွေအတွက် မြန်မာအလုပ်သမားတွေကို လစာသိန်းဆယ်ချီပေးမယ်ဆိုကာ ခေါ်ယူမှုများလာပြီး လုပ်ငန်းခွင်တွင်းမှာ ချိုးဖောက်မှုတွေ လုပ်ဆောင်နေတယ်လို့ တရုတ်နိုင်ငံက အထည်ချုပ် စက်ရုံတွေမှာ လုပ်ကိုင်နေတဲ့ အလုပ်သမားတွေက ပြောပါတယ်။
လက်ရှိမှာ တရုတ်နိုင်ငံကစက်ရုံတွေအတွက် အလုပ်သမားခေါ်ယူတာတွေကို တွင်တွင်ကျယ်ကျယ် လုပ်ဆောင် နေပြီး အလုပ်သမားဝန်ကြီးဌာနကတော့ တစ်စုံတစ်ရာ တားမြစ်အရေးယူတာ၊ အသိပညာပေးတာတော့ လုပ်ဆောင်မှု မရှိသေးပါဘူး။
“စက်ရုံထဲမှာလည်း အချင်းချင်းပေါ့။ သွားလုပ်ကြမယ်။ လူစုတယ်။ အဲဒီလိုမျိုးရှိတယ်။ နောက်ပြီး စက်ရုံရှေ့မှာ လာပြောပြတာလည်း ရှိတယ်။ ကြေညာတွေ ကပ်တာလည်း တွေ့ပါတယ်။ လစာကလည်း စရိတ်ငြိမ်းကို (၁၀) သိန်းကျော် ပေးမယ်ဆိုပြီး ခေါ်ကြတာ ”လို့ ရွှေပြည်သာက စက်ရုံအလုပ်သမား အမျိုးသမီးတစ်ဦးက ပြောပါတယ်။
ပြည်တွင်းအလုပ်သမားတွေကို ဒီလိုမက်လုံးပေးပြီး ခေါ်ယူနေပေမယ့် လက်တွေ့သွားရောက် လုပ်ကိုင်သူတွေက တော့ လုပ်ငန်းခွင်ထဲမှာ အဆင်မပြေတာတွေ၊ အခွင့်အရေး ချိုးဖောက်ခံရတာတွေ ရှိနေပြီး နေရပ်ပြန်နိုင်ဖို့ကို ခက်ခဲနေတယ်လို့ သိရပါတယ်။
“အလုပ်ရှင်ဘက်က သူတို့အဆမတန် သတ်မှတ်ထားတဲ့ တစ်ကဒ်ကို ပြည့်အောင်မချုပ်နိုင်ရင် အောလင်း၊ အောနိုက်တွေကော တနင်္ဂနွေနေ့တွေကော အချိန်ပိုအိုတီတွေ အလကားဆင်းခိုင်းပါတယ်။ ကျွန်မတို့က အချိန် ပိုတွေ လုပ်ပေးနေရပေမယ့် ပိုက်ဆံမရပါဘူး။ နောက်ပြီး အချိန်ပိုတွေ မတရားဖြစ်လာတော့ အလုပ်သမားတွေ လည်း ကျန်းမာရေး ထိခိုက်လာပါတယ်။ အခုဆို စက်ရုံမှာ ပြည်တွင်းကိုပြန်ချင်တဲ့ အလုပ်သမားတွေ အများကြီး ရှိပါတယ်။ အလုပ်ရှင်က မြန်မာနိုင်ငံကို ပြန်မယ်ဆိုရင် တရုတ်ပြည်ကို လာတုန်းက လမ်းစရိတ်တွေ ပြန်တောင်းပါတယ်။ နောက်ပြီး တော်ရုံနဲ့ ပြန်မလွှတ်ပါဘူး။ အကြောင်းပြချက်တွေပေးပြီး ဆွဲထားပါတယ်”လို့ တရုတ်ပြည်လုံချမ်းခရိုင်၊ ကျန်ဖုံမြို့မှာ ဖွင့်လှစ်ထားတဲ့ Longhuan DEPlN Garment Limited က အလုပ်သမား တစ်ဦးက ပြောပါတယ်။
ပြည်တွင်းမှာ ကုန်ဈေးနှုန်း မြင့်တက်လာပေမယ့် သတ်မှတ်ထားတဲ့ အခြေခံလုပ်ခလစာဟာ နေထိုင်စားသောက် စရိတ်နဲ့ မလုံလောက်တာကြောင့် အလုပ်သမားအများစုဟာ ပြည်ပမှာ သွားရောက်လုပ်ကိုင်လိုသူ များနေတာပဲ ဖြစ်ပါတယ်။ လက်ရှိမှာ သွားရောက်လုပ်ကိုင်သူတွေလည်း ရှိနေပြီး အခက်အခဲတွေ ဖြစ်ပေါ်နေတာပဲ ဖြစ်ပါတယ်။
တရုတ်နိုင်ငံ၊ ရွှေလီမြို အခြေစိုက် အောကယ်(AOHE) အထည်ချုပ်စက်ရုံမှာ အလုပ်လုပ်ကိုင်ခဲ့တဲ့ မြန်မာအလုပ်သမားတွေဟာလည်း လူဦးရေအလိုက် စံချိန်တောင်းဖို့၊ အချိန်ပိုကြေးကို အလုပ်ဆင်းတဲ့ ရက်အတိုင်း ပုံမှန်ပေးဖို့၊ အစိုးရ ရုံးပိတ်ရက်တွေမှာ စက်ရုံပိတ်ပေးဖို့နဲ့ အခြေခံလုပ်ခလစာ နဲ့ ရက်မှန်ကြေး တိုးမြှင့်ပေးဖို့ကို တောင်းဆိုခဲ့ကြပါတယ်။ ဒီလိုတောင်းဆိုတာကြောင့်လည်း တရုတ်လုပ်ငန်းရှင်က မြန်မာအထည်ချုပ်အလုပ်သမားတွေဆန္ဒပြတောင်းဆိုတယ်ဆိုပြီး လုပ်ခလစာမပေးဘဲ တရုတ်လုံခြုံရေး ရဲတပ်ဖွဲဆီ အပ်နှံခဲ့တယ်လို ကိုယ်တိုင် ဖမ်းဆီးခံရတဲ့ အမျိုးသမီး အလုပ်သမားတဦးက ပြောပါတယ်။
လက်ရှိမှာ တရုတ်နိုင်ငံရောက် မြန်မာအလုပ်သမားတွေဟာ လုပ်ငန်းခွင်တွင်းမှာ ချိုးဖောက်မှုတွေကို များစွာခံနေရပေမယ့် ဥပဒေရဲ့ အကာအကွယ်ကို ရရှိမှု မရှိတဲ့အပြင် တောင်းဆိုမှုတွေလုပ်လို့ ရဲလက်အပ်ခံရတာ၊ လုပ်ခလစာမရတာနဲ့ နေရပ်ပြန်ဖို့ကို ခက်ခဲနေတယ်လို့ အလုပ်သမားတွေဆီက သိရပါတယ်။
