မြန်မာနိုင်ငံသား အဖြစ်မှ စင်္ကာပူ နိုင်ငံသား အဖြစ်သို့ မိမိတို့ သဘောဆန္ဒ အရ ပြောင်းလဲ ခံယူတဲ့ သူ ၂၀၂၄ ခုနှစ် တစ်နှစ် အတွင်း ၃၀၀ခန့်ရှိတယ်လို့ စင်ကာပူနိုင်ငံဆိုင်ရာ မြန်မာသံရုံးရဲ့ ဖေဖော်ဝါရီလ ၃ရက် နေ့ ထုတ်ပြန်ချက်အရ သိရပါတယ်။
မြန်မာနိုင်ငံသား ၂၇၈ ဦးမှာ ၂၀၂၄ ခုနှစ် ဇန်နဝါရီ မှ ၂၀၂၄ ခုနှစ် ဒီဇင်ဘာလ အတွင်း မြန်မာနိုင်ငံသား စိစစ်ရေးကတ်ပြား မူရင်း(မှတ်ပုံတင်) တို့ကို မြန်မာသံရုံး(စင်္ကာပူမြို့) ကို လာရောက် အပ်နှံခဲ့တယ်လို့ ဆိုပါတယ်။
အခုလို မှတ်ပုံတင် မူရင်း လာရောက် အပ်နှံထားသူတွေ အနေနဲ့ သံရုံးရဲ့ ထောက်ခံစာ ကို ၂၀၂၅ခုနှစ် ဖေဖေါ်ဝါရီ ၂၈ရက် မတိုင်မီ မြန်မာသံရုံး ရုံးဖွင့်ရက် တွေ မှာ လာရောက် ထုတ်ယူဖို့ နာမည်စာရင်းဖြင့် ပူးတွဲ ထုတ်ပြန် ထားပါတယ်။
လာရောက်ထုတ်ယူစဉ် မှာ လည်း မြန်မာ နိုင်ငံကူးလက်မှတ် မူရင်းနဲ့ Processing Letter တို့ကို တစ်ပါတည်း ပြန်လည်အပ်နှံရမယ်လို့ အသိပေးကြေညာထားပါတယ်။
ပြီးခဲ့တဲ့ ၂၀၂၅ခုနစ် ဇန်နဝါရီ ၃ ရက် နေ့က လည်း မြန်မာနိုင်ငံသားအဖြစ်မှ စွန့်လွှတ်လိုသူတွေ ကို အထောက်အထားအပြည့်အစုံဖြင့် လျှောက်ထားဖို့ကိုလည်း မြန်မာသံရုံးက ထုတ်ပြန်ကြေညာခဲ့ပါသေးတယ်။
