ထိုင်းနိုင်ငံ မယ်ဟောင်ဆောင်ပြည်နယ်၊မယ်စရိန်ခရိုင်ရှိ ဆောက်လုပ်ရေး လုပ်ငန်း တစ်ခု မှာ အလုပ်လုပ်ကိုင်နေတဲ့ အထောက်အထားမရှိတဲ့ မြန်မာလုပ်သား ၈ဦး နဲ့ အလုပ်ရှင်တို့ကို ထိုင်းအာဏာ ပိုင်တွေ ဖမ်းဆီးခဲ့တယ်လို့ ထိုင်းသတင်းတွေ အရ သိရပါတယ်။
ဇန်နဝါရီလ ၄ ရက်နေ့ မနက်ပိုင်းမှာ ၎င်း ဆောက်လုပ်ရေးခွင်မှာ အထောက်အထားမဲ့ လုပ်သား တွေ ရှိနေတယ်လို့ ထိုင်းရဲတပ်ဖွဲ့ ထံ သတင်းပေးပို့တာကြောင့် လုပ်ငန်းခွင်သို့ သွားရောက် စစ်ဆေးခဲ့တယ်လို့ သိရပါတယ်။
အခုလို စစ်ဆေးရာမှာ ဆောက်လုပ်ရေး လုပ်ငန်းခွင်အတွင်း အလုပ်လုပ်နေတဲ့ မြန်မာလုပ်သား ၈ဦး ကို တွေ့ရှိရပြီး ၎င်း တို့ တွင် တရားဝင် နေထိုင် အလုပ်လုပ်ခွင့် အထောက်အထား မရှိကျဘူးလို့ ဆိုပါတယ်။
ဒါ့အပြင် အထောက်အထားမရှိတဲ့ အလုပ်သမားတွေကို ခိုင်းစေမှုဖြင့် မြန်မာ အလုပ်သမား ၈ ဦးနဲ့အတူ သူတို့ကို အလုပ်ပေးထားတဲ့ ထိုင်းအလုပ်ရှင်ကိုပါ တစ်ပါတည်း ဖမ်းဆီးထိန်းသိမ်းလိုက်တယ်လို့ သိရပါတယ်။
ဖမ်းဆီးခံရတဲ့ မြန်မာလုပ်သားတွေကို တရားမဝင် နေထိုင်မှု၊ အလုပ်လုပ်မှုတွေနဲ့ အမှုဖွင့်ထားပြီး ဒဏ်ငွေ ဘတ် ၅,၀၀၀ ကနေ ၅၀,၀၀၀ အထိ ကျခံရနိုင်သလို နေရပ်ကိုလည်း ပြန်ပို့ခံရမယ်လို့ ဆိုပါတယ်။
ထိုင်းအလုပ်ရှင် ကိုလည်း အလုပ်သမားတစ်ဦးချင်းစီအတွက် ဒဏ်ငွေ ဘတ် ၁၀,၀၀၀ ကနေ ၁၀၀,၀၀၀ အထိ ပေးဆောင်ရမှာဖြစ်ပြီး ထပ်မံကျူးလွန်ရင်တော့ ထောင်ဒဏ်အပြင် အလုပ်သမားခေါ်ယူခွင့် ၃ နှစ် ပိတ်ပင်ခံရမှာဖြစ်တယ်လို့ သိရပါတယ်။
ထိုင်းအာဏာပိုင်တွေအနေနဲ့ နယ်စပ်ဒေသ လုံခြုံရေးနဲ့ တရားမဝင် လုပ်သားတွေ စနစ်တကျဖြစ်စေဖို့ အတွက် ပြည်ထဲရေးဝန်ကြီးဌာနရဲ့ မူဝါဒအရ တင်းတင်းကျပ်ကျပ် ဆောင်ရွက်နေတာဖြစ်တယ်လို့ သတင်းမှာ ဖော်ပြထားပါတယ်။
Ref-Khaosod English
