မလေးရှား နိုင်ငံသားတွေ ဆန္ဒပြ ချီတက်ခြင်းတွေ ပြုလုပ် မှာဖြစ်တဲ့ အတွက် မလေးရှားရောက် မြန်မာလုပ်သားတွေ အနေနဲ့ ကွာလာလမ်ပူမြို့ အနီးဝန်းကျင် တဝိုက်ကို မလိုအပ်ဘဲ သွားလာတာ တွေ မပြုလုပ်ဖို့ Alliance of Chin Refugees (ACR)နဲ့မြန်မာလူမူကူညီရေးအသင်းတွေက သတိပေးထားပါတယ်။

 

ဇူလိုင်လ ၂၆ ရက်နေ့မှာ မလေးရှားနိုင်ငံသားတွေဟာ Sogo , Pasar, Seni , Masjid India နဲ့ Kg Baru စတဲ့ နေရာအသီးသီးကနေ Merdeka Dataran ထိ ဆန္ဒပြချီတက်ခြင်း ပြုလုပ်မှာဖြစ်ပါတယ်။

 

လုံခြုံရေးအရ ရဲအင်အားတိုးချဲ့ချထားတယ်လို့ ACR အနေနဲ့ သတင်း ရရှိထားတဲ့ အတွက် အထူးသဖြင့် အထောက်ထားမဲ့ မြန်မာအလုပ်သမား တွေအနေနဲ့ Merdeka Dataran နေရာတဝိုက် နဲ့ ကွာလာလမ်ပူမြို့အတွင်း မလိုအပ်ဘဲ သွားလာခြင်း မပြုလုပ်ဖို့ အထူးသတိပေးထုတ်ပြန်ထားပါတယ်။

 

မလေးရှား ရှိ မြန်မာလူမှု့ကူညီရေးအသင်းဖြစ်တဲ့ နှလုံးလှပရဟိတ လူငယ်များ သွေးလှူရှင် အဖွဲ့ မှ လည်း ဇူလိုင်၂၆ရက်နဲ့၂၇ရက်တွေမှာ မြန်မာလုပ်သားတွေအနေနဲ့ ကွာလာလမ်ပူမြို့အတွင်း အရေးကြီးကိစ္စမရှိဘဲ မလာကြဖို့ အသိပေးထားပါတယ်။

 

""မလေးနိုင်ငံသားတွေဆန္ဒပြပွဲ အကြီးအကျယ် လုပ်ဖို့ရှိပါတယ် မာဒေးကားကွင်းဆိုဂိုကုန်တိုက်၊KLCCဝန်းကျင် ပါဆာဆီနေးဘူတာရုံ တွေစုရပ်လုပ်မယ်သိရပါတယ်။

 

ဒါကြောင့် ကျွန်တော်တို့ မြန်မာနိုင်ငံသား တွေ အကြောင်းကိစ္စမရှိဘဲ မလာကြဖို့ သတိပေးချင်ပါတယ်။ဘာကြောင့်လဲဆိုတော့ သူတို့နိုင်ငံဆန္ဒပြပွဲ က ကိုယ်တွေနဲ့ မဆိုင်ပေမယ့် ကျွန်တော်တို့ နိုင်ငံသားတွေ ကြားညှပ် ပါ သွားမှာစိုးရိမ်လို့ပါ ""လို့ နှလုံးလှပရဟိတ လူငယ်များ သွေးလှူရှင် အဖွဲ့မှ ကိုသက်ကပြောပါတယ်။

 

မလေးရှားနိုင်ငံ မှာ အထောက်ထားမဲ့ မြန်မာအပါအဝင် နိုင်ငံခြားသားလုပ်သားတွေကို ယခုနှစ်အစောပိုင်းကတည်းကနေ အခုအချိန်အထိ အဖမ်းအဆီးတွေ တောက်လျှောက်လုပ်နေတာဖြစ်ပါတယ်။

 

ဖမ်းဆီးခံရသူတွေကို နေရပ်ပြန်ပို့တာ၊အရေးယူတာတွေကို မလေးရှားအာဏာပိုင်တွေက ပြုလုပ်နေတဲ့ အတွက် မလေးရှားရောက်မြန်မာလုပ်သားတွေ အထူးသတိထားနေထိုင်နေရတယ်လို့ သိရပါတယ်။