စစ်ကောင်စီအနေနဲ့အကြမ်းဖက်ဖြစ်စဉ်များကြောင့် ယာယီနေရပ်စွန့်ခွာနေရတဲ့စစ်ဘေးရှောင်ပြည်သူ တွေ အတွက် တစ်ဦးလျှင် ထောက်ပံ့ငွေ ကျပ်နှစ်သောင်းနှုန်းဖြင့် ၁နှစ်ကြာအထိလစဉ် ထောက်ပံ့ပေးသွားမယ်လို့ အသိပေးထားပါတယ်။
သဘာဝဘေးအန္တရာယ်ဆိုင်ရာ စီမံခန့်ခွဲမှုဥပဒေအရ အကြမ်းဖက်မှု၊ လက်နက်ကိုင်သောင်းကျန်းမှု ဖြစ်ပွားခြင်းကြောင့် ပြည်သူတွေရဲ့ ဆုံးရှုံးမှုများကို သဘာဝဘေးအန္တရာယ် သတ်မှတ်ချက်များတွင် အကျုံးဝင်နေတဲ့အတွက် စစ်ဘေးရှောင်ပြည်သူတွေကိုတစ်ဦးလျှင် တစ်လငွေကျပ် နှစ်သောင်းနှုန်းဖြင့် ၂၀၂၅ ခုနှစ် ဇန်နဝါရီလမှ ဒီဇင်ဘာလအထိ လစဉ် ထောက်ပံ့ပေးသွားမယ်လို့ဆိုပါတယ်။
" စစ်ဘေးရှောင်တွေကို စစ်ကောင်စီဘက်က ထောက်ပံ့ငွေပေးမယ်ဆိုတာအမှန်တကယ် ရနေသူအခုထိမရှိသေးဘူး။နောက်တစ်ခုက စစ်တပ်ကပေးတဲ့ဒီထောက်ပံ့ငွေ လေး၂သောင်းက ဗုံးကြဲလို့၊ရွာမီးရှို့နေအိမ်တွေ မီးရှို့လို့ပျက်စီးဆုံးရှုံးခဲ့ရတာ၊မိသားစုတွေ ဆုံးရှုံးတစ်ကွဲတစ်ပြား ဖြစ်ခဲ့ရတဲ့အပေါ် နှစ်သိမ့်မှု မဖြစ်နိုင်ပါဘူး။ ပြည်သူတွေလိုချင်တာ စစ်ဖြစ်ပြီးထောက်ပံ့ငွေရတာမျိုးမဟုတ်ပါဘူး။ငြိမ်းငြိမ်းချမ်းချမ်းနဲ့ကိုယ့်နေရာကိုယ့်ဌာနေမှာနေချင်ကြတာပါ။စစ်ကောင်စီပြောတဲ့သဘာဝဘေးစီမံခန့်ခွဲမှုရံပုံငွေအနေနဲ့ ရပ်ကွက်အုပ်ချုပ်ရေးတွေကပေးတာထက်စာရင် စစ်ဘေးရှောင်စခန်းတွေကတစ်ဆင့်လာပေးရင်တောင် အမှန်တကယ်စစ်ဘေးရှောင်တွေရနိုင်ပါသေးတယ်။အခုဟာက သူတို့ရဲ့ အုပ်ချုပ်ရေးအဆင့်၊ ရပ်ကွက်အုပ်ချုပ်ရေး နေရာတွေမှာတင် စစ်ဘေးရှောင်ထောက်ပံ့တယ်ဆိုတဲ့ပိုက်ဆံတွေက ပျောက်သွားမှာပါ"လို့ ဗုံးဒဏ်ခံရပြီးစစ်ဖြစ်ပွားမှု ဆိုးဝါးခဲ့တဲ့ကရင်နီဒေသ ရှိစစ်ဘေးရှောင်စခန်း မှာနေထိုင်နေသူကပြောပါတယ်။
နေပြည်တော်ကောင်စီနယ်မြေအပါအဝင် တိုင်းဒေသကြီး၊ နဲ့စစ်ကောင်စီရဲ့ပြည်နယ်အစိုးရအဖွဲ့မျာသဘာဝဘေးစီမံခန့်ခွဲမှု ရန်ပုံငွေစာရင်းအမှတ်များကို စစ်ဘေးရှောင်ထောက်ပံ့ ငွေများလွှဲအပ်ပေးသွားမယ်လို့ဆိုထားပါတယ်။
စစ်ကောင်စီကတော့ အဲ့ဒီ့ထောက်ပံ့ငွေ ပေးအပ်ရာတွင် သက်ဆိုင်ရာ နယ်မြေများအလိုက် ယာယီနေရပ်စွန့်ခွာနေရသူများအားလုံး ပါဝင်မှုရှိစေရေး၊ စာရင်းတွင် မပါဝင်ဘဲ ကျန်နေခဲ့ရသူများ မရှိစေရေး၊ စနစ်တကျ ထိထိရောက်ရောက် ထောက်ပံ့ပေးအပ်နိုင်ရေး လုပ်ဖို့ စစ်ဘေးရှောင်စာရင်းကောက်ယူတာတွေလုပ်သွားမယ်လို့လည်းပြောထားပါတယ်။
" စစ်ဘေးရှောင်စာရင်းကောက်ပြီး ထောက်ပံ့ငွေပေးမယ်ဆိုတာ နည်းနည်းတော့လန့်မိတယ်။ တစ်ဖက်လှည့်နဲ့ထောက်ပံ့ငွေပေးတယ်ဆိုပြီး စစ်မှုထမ်းခိုင်းဖို့လူစာရင်းကောက်တာမျိုးဖြစ်မှာလည်းစိုးရိမ်ရတော့ စစ်ဘေးရှောင်တွေလည်း ဒီထောက်ပံ့ငွေလေး၂သောင်းကို မယူဖို့ဆုံးဖြတ်တာတွေတော့များတယ်"လို့ ကရင်နီဒေသကစစ်ဘေးရှောင်စခန်းမှာနေထိုင်သူတစ်ဦးကပြောပါတယ်။
မြန်မာနိုင်ငံမှာ ပြည်တွင်းနေရပ်စွန့်ခွာထွက်ပြေးတိမ်းရှောင်နေရတဲ့ စစ်ဘေးရှောင်အရေအတွက်စုစုပေါင်း၃.၅သန်းရှိနေရာ အဲ့ဒီ့ထဲမှာ အမျိုးသမီးနဲ့ကလေး စစ်ရှောင်အရေအတွက်ကအမျိုးသား ထက်ပိုများပြီး ကလေးအရေအတွက်၃.၃သန်းဟာ စစ်ဘေးရှောင်နေရကြောင်း ကမ္ဘာကုလသမဂ္ဂ ရဲ့အဖွဲ့အစည်းတွေဖြစ်တဲ့UNOCHA နဲ့ Unicef အဖွဲ့တွေကအသိပေးထုတ်ပြန်ထားပါတယ်။
