စင်္ကာပူ နိုင်ငံ မှာ ရောက်ရှိနေတဲ့ မြန်မာ နိုင်ငံသားတွေ အနေနဲ့ နိုင်ငံကူးလက်မှတ် သက်တမ်းတိုးရာမှာ မိမိရဲ့ နိုင်ငံသားစိစစ်ရေးကတ်ပြား(မှတ်ပုံတင်)ကို မူရင်း(သို့မဟုတ်)မိတ္တူ ယူဆောင်လာရမယ်လို့ စင်္ကာပူရှိ မြန်မာသံရုံးက အောက်တိုဘာ ၉ရက်နေ့မှာ ထုတ်ပြန်ထားပါတယ်။
စင်္ကာပူရှိ မြန်မာနိုင်ငံသားတွေ နိုင်ငံကူးလက်မှတ် သက်တမ်းတိုးရာ မှာ ဝင်ငွေခွန် ပေးဆောင် ပြီးမှ မြန်မာသံရုံးက ဆောင်ရွက်ပေးတယ်လို့ သိရပါတယ်။
ဝင်ငွေခွန် ပေးဆောင်မှု စာရင်းသွင်းရာမှာ မြန်မာနိုင်ငံသား အချို့မှာ နိုင်ငံသားစိစစ်ရေးကတ်ပြား အမှတ် (နံပတ်) တွေ မှားယွင်းခြင်း အခြားသူတစ်ဦးရဲ့ နိုင်ငံသား စိစစ်ရေးကတ်ပြား ကို အသုံးပြု ခြင်း တွေ ကို တွေ့ရတယ်လို့ မြန်မာသံရုံး(စင်္ကာပူမြို့)ရဲ့ ကြေညာချက်မှာဖေါ်ပြထားပါတယ်။
ဒါကြောင့် နိုင်ငံကူးလက်မှတ် သက်တမ်းတိုး ခြင်း လုပ်ဆောင်ရာ မှာ နိုင်ငံသားစိစစ်ရေးကတ်ပြား မူရင်း(သို့မဟုတ်)မိတ္တူ ကိုမဖြစ်မနေ ယူဆောင်လာဖို့ မြန်မာသံရုံးက အသိပေးထားပါတယ်။
""အခု မှတ်ပုံတင်ပါမှ ပတ်စပို့သက်တမ်းတိုးပေးမယ်ဆိုရင် မြန်မာနိုင်ငံမှာကတည်းက အသက်ပြောင်းပြီး သူများ မှတ်ပုံတင်နဲ့ စာအုပ် လုပ်လာတဲ့ သူတွေ အခက်ခဲ ဖြစ်ပြီ သက်တမ်း ဆက်တိုးလို့မရတော့ဘူးပေါ့ ""လို့ စင်္ကာပူရောက်မြန်မာအလုပ်သမားတစ်ဦးကပြောပါတယ်။
မြန်မာသံရုံးရဲ့ ကြေညာချက်ထဲ တွင် နိုင်ငံသားစိစစ်ရေးကတ်ပြား ပျောက်ဆုံးခဲ့ပါက နိုင်ငံသားစိစစ်ရေးကတ်ပြား အသစ်ပြုလုပ်ထားဖို့နဲ့ အခြားသူရဲ့ နိုင်ငံသား စိစစ်ရေး ကတ်ပြား အမှတ် ကို အသုံးပြု ပြီး ဝင်ငွေခွန် ရှောင်ရှားတာမျိုး မပြုလုပ် ဖို့ အသိပေးထားပါတယ်။
