စင်္ကာပူနိုင်ငံမှာ အလုပ်လုပ်ကိုင်ဖို့ ပို့ဆောင်ပေးမယ် ဆိုပြီး အမျိုးသမီးတစ်ဦးက လုပ်သား ၇၀ ကျော် ထံကနေ သိန်းပေါင်း ၁၂၀၀၀ ကျော်ကို လိမ်လည်ယူပြီး ထွက်ပြေးတိမ်းရှောင်နေတယ်လို့ နစ်နာသူ တွေထံ က သိရပါတယ်။

 

ထွက်ပြေးတိမ်းရှောင်နေတဲ့ အမျိုးသမီးဟာ ရန်ကုန်တိုင်း အင်းစိန်မြို့နယ် တောင်သူကုန်း မှာ Original Over sea Employment ပြည်ပအလုပ်အကိုင်ရှာဖွေရေး ကုမ္ပဏီ လို့ ရုံးခန်း ဖွင့်လှစ်ပြီး ပြည်ပ သွားရောက်ချင်တဲ့ လူငယ်တွေကို စင်္ကာပူ နိုင်ငံက လုပ်ငန်းအသီးသီးမှာ အလုပ်လုပ်ကိုင်နိုင်ရန် ပို့ဆောင်ပေးမယ်ဆိုပြီး တစ်ဦး ကို ကျပ်သိန်း ၅၀ ကနေ ကျပ်သိန်း၂၀၀ ကျော်အထိ ယူဆောင်သွားတယ်လို့ နစ်နာသူ တွေကပြောပါတယ်။

 

""ညီမက သူ့ဆီမှာ အစောဆုံး အလုပ်အပ်သူလို့ပြောလို့ရတယ်။ အခုနှစ်ဇန်နဝါရီလကထဲ က စင်္ကာပူ ကို သူနာပြုနဲ့သွားဖို့ သိန်း ၅၀ သွင်းထားရတယ်။ စင်္ကာပူရောက်ရင် ၂လစာ ကို ဖြတ်မယ်ဆိုပြီး စာချုပ်ချုပ်ခဲ့တာ ပထမပြောတေ့ာသုံးလ လေးလ လောက်ပဲကြာမယ် ဆိုပြီး ရက်တွေ ဟိုနေ့ ဒီနေ့ ဆိုပြီးရွှေ့လာတာ ပြီးခဲ့တဲ့ ၉လ ပိုင်း၂၉ရက်နေ့မှာ ရုံးကိုလည်း သော့ခတ်ပြီး ပိတ်ထားတယ်။ ဆက်သွယ်တာလည်းမရတော့ဘဲ လိမ်ပြေးသွားတာ ညီမက သိန်း၅၀ ဆိုပေမယ့် ညီမသူငယ်ချင်းတွေဆို သိန်း၂၀၀လောက်ပါသွားတာ။ အတိုးတွေနဲ့ ယူပေးရတာလေ အခုတော့ သူတို့ ဒုက္ခအတော်လေးရောက်နေတယ် ပတ်စပို့ တွေလည်း သူ့ဆီပါသွားတော့ ပိုပြီးခက်ခဲကုန်တာပေါ့""လို့ နစ်နာသူ အမျိုးသမီးတစ်ဦးကပြောပါတယ်။

 

အဆိုပါ Original Over sea Employment ပြည်ပအလုပ်အကိုင်ရှာဖွေရေး ကုမ္ပဏီ အနေနဲ့ ပြည်ပကို ပို့ဆောင်လိုက်တဲ့ လုပ်သားအနည်းငယ်ရှိပေမယ့် ရောက်ရှိသွားသူတွေမှာ အလုပ်အမျိုးအစား ကွဲလွဲတာတွေ စာချုပ်ချုပ်စဉ်ကအတိုင်း မဖြစ်တာတွေ ကြောင့် တစ်ဖက်နိုင်ငံမှာအခက်ခဲတွေ ဖြစ်နေကြတယ်လို့ သိရပါတယ်။

 

""ဦးလေး သူငယ်ချင်းရဲ့ သားက သူ့အေဂျင်စီကနေ စင်္ကာပူကို ရောက်သွားတော့ မှန်ကန်တယ်ထင်ပြီး ဦးသားကို ဟိုတယ် အလုပ်နဲ့ ပို့ဖို့ ၇လပိုင်းက အလုပ်အပ်ခဲ့တာ အခု ၁၀ လပိုင်း ၂ရက်နေ့မှာ လေယာဉ်တတ်ရမယ်ဆိုပြီး ၉လပိုင်း၂၃ရက်မှာအပြီးပိုက်ဆံချေပါဆိုလို့ပေးလိုက်ရတယ် အားလုံးသိန်း၂၀၀ ပေးလိုက်ရတယ်။ အခုဦးလေးသူငယ်ချင်းရဲ့သားလည်း ဒီမှာစာချုပ်ချုပ်တော့၂နှစ်ဆိုပြီး ဟိုရောက်တော့ ၃လ ဘဲ ရတယ် တချို့စင်္ကာပူ ဆိုပြီး ထိုင်းရောက်သွားတာတွေ၅ယောက်လောက်ရှိတယ်။ သူတို့တွေလည်းဟိုမှာဒုက္ခရောက်နေတယ် အခု ရုံးပိတ်ပြီး ထွက်ပြေးတယ်လို့ သတင်းကြားတော့ သူ့ဆီမှာ အလုပ်အပ်ထားတာ ဦးစာရင်းလုပ်ထားတာကိုဘဲ ၅၆ ယောက်ရှိတယ် အလုပ်အမျိုးမျိုးနဲ့ အကြွေးစနစ်နဲ့မို့သိန်း၅၀ပါသွားတာမျိုး အပြည့်ပေးချေတဲ့သူတွေ က သိန်း၁၅၀၊သိန်း၂၀၀ တွေပါသွားကြတာ ""လို့ နစ်နာသူလုပ်သားရဲ့ဖခင်ဖြစ်သူဦးအောင်မင်းကပြောပါတယ်။

 

အခုလို လုပ်သား ၇၀ ကျော်ထံမှ ငွေကြေးကျပ်သိန်း ၁၂၀၀၀ ကျော် လိမ်လည်ပြီး ထွက်ပြေးတိမ်းရှောင်တဲ့ အမျိုးသမီး ကို နစ်နာသူတွေက အင်းစိန်မြို့နယ်ရဲစခန်းနဲ့လူကုန်ကူးမှုတားဆီးနှိမ်နှင်းရေးရဲတပ်ဖွဲ့ထံ တိုင်ကြားထားကြောင်း သိရပါတယ်။

 

""ရုံးခန်းပိတ်တယ်လို့ ကြားတော့ နစ်နာသူတွေ အယောက် ၆၀ လောက်ရောက်လာတယ် သူတို့နေအိမ်ကိုလိုက်သွားတော့ လိမ်သွားတဲ့အမျိုသမီးရဲ့ အမျိုးသားကိုတွေ့တယ်။ ဒါနဲ့သူ့အမျိုးသားနဲ့ဝန်ထမ်းတွေကို ​တွေကို ရဲစခန်းကို ပို့တယ် ၃၀ရက်နေ့ပေါ့ အဲ့နေမှာ လိမ်သွားတဲ့ အမျိုးသမီးနဲ့ ဖုန်းအဆက်သွယ်ရတော့ လာဖြေရှင်းပေးမယ်လို့ပြောတယ်။ နောက်အဲ့ညမှာဘဲ စခန်းမှာ တပ်မတော်ဘက်က အရာရှိတစ်ယောက်က အာမခံနဲ့ သူ့အမျိုးသားနဲ့ဝန်ထမ်းတွေ ကို ထုတ်ပေးလိုက်တယ် သိရတယ်။ လက်ရှိအချိန်ထိ ဘာအဆက်သွယ်မှမရသေးပါဘူး""လို့ ဦးအောင်မင်းကရှင်းပြပါတယ်။

 

လက်ရှိမှာ ငွေကြေးများစွာ လိမ်လည်ခံလိုက်ရတဲ့ လုပ်သား ၇၀ကျော်မှာ အခက်ခဲ ဒုက္ခ များစွာ ရင်ဆိုင်နေရပြီး တိမ်းရှောင်နေတဲ့ အမျိုးသမီး ကို လာရောက်ဖြေရှင်းပေးဖို့ လူမှုကွန်ယက်စာမျက်နှာ တွေကနေတစ်ဆင့် အသိပေးထားပါတယ်။