စက်တင်ဘာလအတွင်း နေထိုင်ခွင့် အထောက်အထားမပြည့်စုံတဲ့ မလေးရှားရောက် မြန်မာ ၅၀၀ ကျော် ဖမ်းဆီးခံရတယ်လို့ မလေးရှား - မြန်မာ လူမှုရေးအသင်းအဖွဲ(MMA)ရဲ့ ထုတ်ပြန်ချက်အရ သိရပါတယ်။

 

လုပ်ငန်းခွင်အတွင်း နဲ့ ပတ်ဝန်းကျင်က တိုင်ကြားမှုကြောင့် ဖမ်းဆီးခံခဲ့ရတဲ့ နိုင်ငံခြားသား ၂၉၀၀ ကျော်ထဲမှာ မြန်မာနိုင်ငံသား ၅၀၁ ဦးပါဝင်တာပါ။

 

ထုတ်ပြန်ချက်အရ ဖမ်းဆီးခံရတဲ့ မြန်မာနိုင်ငံသားအရေအတွက် ဟာ ဒီထက်များနိုင်တယ်လို့လည်း ဆိုထားပါတယ်။

အခုလို မလေးရှားရောက် မြန်မာရွှေ့ပြောင်းအလုပ်သမားတွေအနေနဲ့ အထောက်အထားမရှိဘဲ အဖမ်းခံရပြီး အခက်အခဲကြုံနေရသူတွေ၊ တရားရုံးမှာ အမှုရင်ဆိုင်နေရသူတွေ ရှေ့နေအခက်အခဲရှိသူတွေ၊ ထောင်ဝင်စာ သွားတွေ့ဖို့ အခက်အခဲရှိသူတွေ လူဝင်မှုကြီးကြပ်ရေးကန့် မှာ လူတွေ့ ချင်သူတွေအနေနဲ့ မလေးရှား - မြန်မာ လူမှုရေးအသင်းအဖွဲ(MMA)ကို အကူညီတောင်းခံနိုင်တယ်လို့ သိရပါတယ်။

 

မလေးရှားနိုင်ငံမှာ စာရွက်စာတမ်း အထောက်အထားမပြည့်စုံဘဲ နေထိုင် အလုပ်လုပ်ကိုင်နေတဲ့ နိုင်ငံခြားသားတွေကို စီမံချက်နဲ့ နေ့စဉ် ဖမ်းဆီးတာတွေ လုပ်ဆောင်နေပြီး တိုင်ကြားမှုရှိတဲ့ နေရာ ၂၄၄ နေရာက တရားမဝင်နေထိုင်အလုပ်လုပ်ကိုင်တဲ့သူတွေကို ဖမ်းဆီးသွားမယ်လို့ ကြေညာထားတာကြောင့် သတိထားကြဖို့ကိုလည်း MMAက အထူးအသိပေးထားပါတယ်။

 

မလေးရှားအစိုးရအနေနဲ့ ဖမ်းဆီးထားတဲ့ မြန်မာအပါအဝင် နိုင်ငံခြားသားတွေကို သက်ဆိုင်ရာ နိုင်ငံသံရုံးတွေနဲ့ ပူးပေါင်းပြီး ပြည်နှင်ဒဏ်ပေးကာ နေရပ်ပြန်ပို့နိုင်ရေး စီစဉ်နေပါတယ်။