ရန်ကုန်တိုင်းဒေသကြီး လှည်းကူးမြို့နယ်မှာရှိတဲ့ ငမိုးရိပ် ရေလှောင်တမံ ဟာ ရေပြည့်မှတ်ရောက်ဖို့ ပေဝက်ခန့်သာလိုတော့ကြောင်း စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာနက စက်တင်ဘာ ၂၆ရက်မှာ အသိပေးထားပါတယ်။
ရာဆာဂါမုန်တိုင်းအရှိန်ကြောင့် မိုးရွာသွန်းမှု များခဲ့တဲ့ အတွက်စက်တင်ဘာ၂၄ ရက်မှာ တမံရေမြင့်တတ်လာကာ လက်ရှိမှာတော့ မိုးရွာသွန်းမှု မရှိသေးတဲ့ အတွက် ယခုရေအမှတ်မှာပင် ငြိမ်နေတယ်လို့ဆိုပါတယ်။
"မုန်တိုင်းသတင်းသာ မရှိရင် Shutter တွေကို ပိတ်ချင်ပါပြီ အခုကတော့ စောင့်ကြည့်ရပါအုံးမယ် အရင်ရက်က ရွာထားတဲ့ မိုးရေတွေ စီးဆင်း သွားဖို့ အချိန်ပေးနေသလို မျိုး မိုးဆက်တိုက်မရွာတာဘဲ ကျေးဇူးတင်မိပါတယ်""လို့ ငမိုးရိပ်ရေလှောင်တမံမှတာဝန်ရှိသူတစ်ဦးကပြောပါတယ်။
ငမိုးရိပ်ရေလှောင်တမံ မှာ နှစ်စဥ်ပျှမ်းမျှမိုးရေချိန် ၁၀၀ ဒသမ ၀၀ လက်မ လက်ခံရရှိနေ ပြီး အခု မိုးရေချိန်မှာ ၉၀ ဒသမ ၁၅ လက်မအထိ လက်ခံရရှိပြီးဖြစ်တယ်လို့ ဆိုပါတယ်။
""အခုရက်ပိုင်းက မုန်တိုင်းအရှိန်နဲ့ မိုးရွာတော့ ချောင်းရေလည်းတိုးတယ် မိုးထပ်ရွာရင် ဆည်ရေပြည့်မှတ် မီပြီး ရေပိုလွှဲကနေ ရေဆင်းလာရင် ချောင်းတွေထဲပဲ စီးဝင်မှာ ဆိုတော့ ချောင်းဘေးနေသူတွေ အနိမ့်ပိုင်းနေသူတွေ သတိထားဂရုတစိုက်နေထိုင်သင့်တယ်""လို့ လှည်းကူးမြို့နယ်ဒေသခံတစ်ဦးကပြောပါတယ်။
ဆည်မြောင်းဦးစီးဌာနရဲ့ အသိပေး ထုတ်ပြန်ချက်တွင် ငမိုးရိပ် ရေလှောင်တမံသာမက လှည်းကူးမြို့နယ်အတွင်းမှာရှိတဲ့ မဟူရာရေလှောင်တမံဟာလည်း ရေပြည့်မှတ်ရောက်ဖို့ ၁ ပေကျော်သာလိုတော့ပြီး ပေါင်းလင်းရေလှောင်တမံကတော့ ရေပြည့်မှတ်ရောက်ဖို့ ၁၀ ပေကျော် လိုနေသေးတယ်လို့ အသိပေးဖော်ပြထားပါတယ်။
