ဂျပန်နိုင်ငံသို့ အလုပ်သွားရောက် လုပ်ကိုင်ရမယ်ဆိုပြီး ငွေလိမ်သွားသူကို ထိုင်းနိုင်ငံတွင် ပြန်တွေ့ သဖြင့် မြန်မာအလုပ်သမားသံရုံးကို တိုင်ကြားပြီး ပေးသွင်းထားတဲ့ငွေပြန်တောင်းရာ ပြန်ရခဲ့တယ်လို့ မြန်မာအလုပ်သမားသံအရာရှိရုံးရဲ့ ထုတ်ပြန်ချက်အရ သိရပါတယ်။
ပြီးခဲ့တဲ့ ၂၀၂၃ခုနှစ် က တိုင်ကြားသူရဲ့ ခင်ပွန်းဖြစ်သူဟာ ဂျပန်နိုင်ငံသို့ အလုပ်သွားရောက်လုပ်ကိုင်နိုင်ရန်အတွက်ဗိုလ်တထောင်မြို့နယ်၊ သိမ်ဖြူမှတ်တိုင်အနီးရှိ Five Star အဆောက်အဦးမှာ ရုံးခန်းဖွင့်လှစ်ထားတဲ့ ပြည်ပအလုပ်အကိုင် အကျိုးဆောင်လိုင်စင်ရအေဂျင်စီသို့ ကြား Agent ထံမှတစ်ဆင့်ငွေကျပ်သိန်း၆၀ ပေးသွင်းင်းခဲ့ပေမယ့် ဂျပန်နိုင်ငံသို့ သွားရောက်လုပ်ကိုင်ရခြင်းမရှိခဲ့ဘူးလို့ သိရပါတယ်။
၂၀၂၆ခုနှစ် ဖေဖေါ်ဝါရီ ၂၁ရက်မှာတော့ ငွေလက်ခံခဲ့တဲ့ အေးဂျင့်ဆိုသူကို ထိုင်းနိုင်ငံတွင် အမှတ်မထင် ပြန်တွေ့ခဲ့တဲ့ အတွက် ၎င်းထံ ပေးသွင်းထားတဲ့ ငွေကြေး ကို ပြန်လည်ရရှိ ဖို့ ကူညီပေးရန် ထိုင်းနိုင်ငံရှိ မြန်မာအလုပ်သမားသံအရာရှိရုံး သို့ အမျိုးသမီး ဖြစ်သူက တယ်လီဖုန်းဖြင့် ဆက်သွယ်တိုင်ကြားလာတယ်လို့ သိရပါတယ်။
ဒါကြောင့် အလုပ်သမားသံမှူးနဲ့ အဖွဲ့ဟာ သက်ဆိုင်သူတွေနဲ့ သွားရောက်တွေ့ဆုံခဲ့ပြီး ညှိနှိုင်းပေးခဲ့မှုအရ Agent ဆိုသူမှ ကျပ် သိန်း၃ဝ နဲ့ ညီမျှတဲ့ ထိုင်းဘတ်ငွေ ၂၄,၀၀ဝ ကို ဖေဖေါ်ဝါရီ ၂၁ရက်မှာ ပေးချေခဲ့ပြီး ကျန်ရှိတဲ့ ငွေကျပ်သိန်း၃၀ ကို မတ်လ ၂၀ရက်မှာ ထပ်မံပေးချေရန် နှစ်ဦးနှစ်ဖက် သဘောတူညီမှု ရရှိခဲ့တယ်လို့ အလုပ်သမား သံအရာရှိရုံးက ထုတ်ပြန်ပါတယ်။
