ဂျပန်နိုင်ငံက ဂျပန်ကုမ္ပဏီ သုံးရာကျော်က မြန်မာအလုပ်သမား အယောက်တစ်ထောင်ကျော် ထပ်ခေါ်ယူသွားမယ်လို့ တိုကျိုမြို့မှာရှိတဲ့ မြန်မာသံရုံးရဲ့ ထုတ်ပြန်ချက်အရ သိရပါတယ်။
တိုကျိုမြို့မြန်မာသံရုံးအနေနဲ့ ယခုလနှစ်ပတ်တာအတွင်းမှာ ဂျပန်လုပ်ငန်းရှင်ကုမ္ပဏီတွေရဲ့ အလုပ်အကိုင်ကမ်းလှမ်းစာတွေကို စီစစ်ပြီး ကုမ္ပဏီသုံးရာကျော်အလုပ်ကမ်းလှမ်းစာ ၃၁၉ ခုအတွက် မြန်မာအလုပ်သမား ကျား လေးရာခန့်နဲ့ အမျိုးသမီးလုပ်သား ခြောက်ရာကျော်၊ စုစုပေါင်း အလုပ်သမားတစ်ထောင်ကျော်ကို ခေါ်ယူဖို့ ကမ်းလှမ်းထားတာလို့ သိရပါတယ် ။
"ဂျပန်ကတော့ ပြန်ဖွင့်ကတည်းက ပုံမှန်သွားနေကြတာပါပဲ။ အလုပ်သမားစိတ်ဝင်စားမှုလည်းများတယ်။ အလုပ်ခေါ်တာလည်းဆက်တိုက်ပါပဲ"လို့ ပြည်ပအလုပ်အကိုင်အေဂျင်စီလုပ်ငန်းရှင်တစ်ဦးက ဆိုပါတယ်။
ဂျပန်နိုင်ငံက မြန်မာအလုပ်သမားတွေ ခေါ်ယူတာကို ၂၀၂၀ ကိုဗစ်ရောဂါ ဖြစ်ပွားချိန်က စတင်ရပ်ဆိုင်းခဲ့ပြီး ၂၀၂၂ ခုနှစ်မတ်လမှာ ပြန်လည်လက်ခံခေါ်ယူခဲ့ရာ လစဥ်ပျမ်းမျှအလုပ်သမားတစ်ထောင်ခန့်နဲ့အထက် ခေါ်ယူနေတာလို့သိရပါတယ်။
ဂျပန်က သက်ကြီးရွယ်အိုစောင့်ရှောက်ရေး၊ ဆောက်လုပ်ရေး၊ ကုန်ထုတ်လုပ်ငန်း ၊ စိုက်ပျိုးရေး ၊ စားသောက်ကုန်လုပ်ငန်းနဲ့ အထည်ချုပ်လုပ်ငန်းတွေမှာ မြန်မာအလုပ်သမားတွေ အများဆုံးသွားရောက်လုပ်ကိုင်နေကြတာဖြစ်ပါတယ်။
ဂျပန်နိုင်ငံက ပြီးခဲ့တဲ့ မေလတစ်လအတွင်းက အလုပ်သမားဦးရေ ၁၈၆၅ ဦးအထိ စေလွှတ်ဖို့ အလုပ်ခေါ်စာရရှိခဲ့ပြီး ၊ ဇွန်လကလည်း အလုပ်ကမ်းလှမ်းစာ ၂၉၃ ခုမှ မြန်မာအလုပ်သမား စုစုပေါင်းတစ်ထောင်ခန့်အထိ ခေါ်ယူဖို့ကမ်းလှမ်းထားတယ်လို့ သိရပါတယ်။
#MyanmarLabourNews
