ဂျပန်နိုင်ငံက ကုမ္ပဏီ ၃၁၀ က မြန်မာအလုပ်သမား ၁၂၀၀ ကျော် ခေါ်ယူမယ်လို့ တိုကျိုမြို့ မြန်မာသံရုံးက ထုတ်ပြန်ထားပါတယ်။ မြန်မာအလုပ်သမား တွေကို ခေါ်ယူဖို့ ဂျပန်နိုင်ငံ ကုမ္ပဏီနဲ့ စက်ရုံ အလုပ်ရုံတွေက ကမ်းလှမ်းစာတွေ ရရှိခဲ့တယ်လို့ သိရပါတယ်။
အဲဒီ ကမ်းလှမ်းစာတွေထဲက မြန်မာလုပ်သား ၁,၂၆၃ဦးကို ခေါ်ယူထားပြီး အမျိုးသားလုပ်သား ၄၀၀ကျော်နဲ့ အမျိုးသမီး လုပ်သား ၈၀၀ ကျော် ပါဝင်ပါတယ် ။
"ဂျပန် အလုပ်ခေါ်စာ တွေ က တောက်လျှောက် ခေါ်လာတာ၊ ထောင်ချီတော့ထုတ်ပြန်နေတာပဲ။ ခက်တာက အေဂျင်စီတွေမှာ ပြည်ပလုပ်သားတွေကို အသက်ကန့်သတ်ချက်နဲ့ပိုနေရတော့ ၊ ဝယ်လိုအားရှိပြီး ရောင်းလို အားမရှိတဲ့ ထုတ်ကုန်လိုမျိုး ဖြစ်နေတယ်။ ပြည်ပခေါ်စာတွေကတော့ ခုနောက်ပိုင်းများလာတယ်။ ပြည်တွင်းမှာက အကြောင်းအမျိုးမျိုးနဲ့ သွားရဖို့ အခက်ခဲတွေလည်း ဖြစ်နေတယ်"လို့ ပြည်ပ အလုပ်အကိုင်အေဂျင်စီ တာဝန်ရှိသူတစ်ဦးကပြောပါတယ်။
လက်ရှိ မြန်မာနိုင်ငံကနေ ပြည်ပထွက် အလုပ်လုပ်နိုင်ဖို့ စစ်မှုထမ်းဥပဒေရဲ့ အသက်ကန့်သတ်ချက်၊ OWIC ကတ် ရရှိဖို့ အခက်အခဲတွေ ကြုံတွေ့နေရတဲ့ အပြင် ပြည်ပပို့ဆောင်မဲ့ အလုပ်သမားအရေအတွက် ကန့်သတ်ချက်တွေပါ အကျိုးဆောင်အေဂျင်စီတွေ ရင်ဆိုင်နေရတာပါ။ ဒီလို အခက်အခဲတွေကို ဖြေလျှော့ဖို့ အေဂျင်စီတွေ စုပေါင်းတောင်းဆိုထားပေမဲ့ ဝန်ကြီးဌာနက အကြောင်းပြန်ကြားတာ မရှိသေးပါဘူး။
အခု အလုပ်ကမ်းလှမ်းထားတဲ့ ဂျပန်ကုမ္ပဏီ ၃၁၀ ရဲ့ နောက်ကြောင်းအချက်အလက်တွေကို နိုင်ငံခြားရေးဝန်ကြီးဌာန ကနေ စိစစ်ပြီး အလုပ်သမားဝန်ကြီးဌာနကို ပေးပို့ခဲ့တာလို့လည်း ထုတ်ပြန်ထားတာပါ။
