ထိုင်းနိုင်ငံ ချင်းမိုင်မြို့ တွင် တရားမဝင် နေထိုင်နေတဲ့ နိုင်ငံခြားသားတွေကို စစ်ဆေးဖမ်းဆီးမှု တွေ ပြုလုပ်ရာမှာ အထောက်အထားမရှိတဲ့ မြန်မာနိုင်ငံသား ၈ဦး ကို မူးယစ်ဆေးဝါးနဲ့အတူ စစ်ဆေးတွေ့ရှိခဲ့တယ်လို့ ချင်းမိုင်၊ လူဝင်မှုကြီးကြပ်ရေးဌာနက ယနေ့မှာ သတင်းထုတ်ပြန်ထားပါတယ်။
ချင်းမိုင်ခရိုင် လူဝင်မှုကြီးကြပ်ရေးမှူး ဒုတိယရဲမှူးကြီး Sutheerthep Phonaruemit ဦးဆောင်တဲ့ စုံစမ်းစစ်ဆေးရေးအဖွဲ့ ဟာ နယ်မြေအတွင်း စီပွားရေးလုပ်ငန်းတွေ အပါအဝင် နိုင်ငံခြားသား တွေ ကို စစ်ဆေးမှုများ ပြုလုပ်နေရာ ဖေဖော်ဝါရီ ၂၀ ရက် က မြန်မာနိုင်ငံသား ၈ ဦး ကို ဖမ်းဆီးခဲ့တာလို့ ဆိုပါတယ်။
ဖမ်းမိသူတွေကို မူးယစ်ဆေးဝါးလက်ဝယ်တွေ့ရှိခြင်း၊ သုံးစွဲခြင်း၊ ဖြန့်ဝေခြင်းစတဲ့သံသယရှိသဖြင့် စစ်ဆေးရာမှာ မြန်မာနိုင်ငံသား၈ဦးအနက် ၆ဦးမှာ ဝန်ခံ ခဲ့တယ်လို့ သိရပါတယ်။
၎င်းတို့ကို တရားမဝင် ဝင်ရောက်နေထိုင်မှု ၊မူးယစ်ဆေးဝါး လက်ဝယ်တွေ့ရှိမှု စတဲ့ ပြစ်မှု တွေ နဲ့ ဖမ်းဆီးအရေးယူသွားမယ်လို့ သိရပါတယ်။
လက်တလောမှာ ထိုင်းနိုင်ငံ အတွင်း နိုင်ငံခြားသားတွေ တရားမဝင် ဝင်ရောက် နေထိုင်မှု အခြေနေတွေ ကို စောင့်ကြည့်ကြပ်မတ်ဖို့ အတွက် ထိုင်းရဲချုပ် Kitrat Panphet က ဖေဖော်ဝါရီ ၁၇ ရက်တွင် အမိန့်ထုတ်ခဲ့ပြီးနောက် ချင်းမိုင်တွင် လည်း စစ်ဆေးဖမ်းဆီးတာတွေ ပိုမိုပြုလုပ်လာတယ်လို့ သိရပါတယ်။
