ထိုင်းနိုင်ငံ ချာချင်ဆောင်ခရိုင်က အသားစက်ရုံ တစ်ခုမှ အကြောင်းမု့ အလုပ်ထုတ်ခံ လိုက်ရတဲ့ မြန်မာလုပ်သား ၃၄ဦး အတွက် နစ်နာကြေး ဘတ်၁သန်းကျော် ရရှိမယ်လို့ ၎င်းအမှု ကို ကူညီပေးနေတဲ့ MHACမဟာမိတ်အဖွဲ့ ထံမှ သိရပါတယ်။
ပြီးခဲ့တဲ့ ဖေဖေါ်ဝါရီ ၁၆ရက် က စက်ရုံ သူဌေး ဖြစ်သူက စီးပွားရေးကျဆင်းလာမှုကြောင့် ဆိုကာ ကြိုတင်အကြောင်းမကြားဘဲ လုပ်သက်၁နှစ်မှ၄နှစ်သက်တမ်းရှိတဲ့ မြန်မာလုပ်သား ၂၅ဦး ကို အလုပ်မှ ထုတ်ပယ်ခဲ့တယ်လို့ သိရပါတယ်။
ဒါ့အပြင်နောက်ထပ်မြန်မာ လုပ်သမား ၉ဦး ထံမှ စုငွေလို့ဆိုကာ တစ်လကို တစ်ထောင်နှုန်းနဲ့ ၁၀လစာ အတွက် ဘတ်၁၀၀၀၀ ဖြတ်ခံထားရတယ်လို့ ဆိုပါတယ်။
အခုလို အလုပ်သမားအခွင့်ရေးချိုးဖောက်ခံနေရတာကြောင့် MHACမဟာမိတ်အဖွဲ့ ထံ ကို အလုပ်သမားတွေက ဆက်သွယ်အကူညီတောင်းခံ ခဲ့တယ်လို့ သိရပါတယ်။
အလုပ်သမားတွေရဲ့ အကူညီတောင်းမှု အရ နယ်မြေခံ ထိုင်းအစိုးရ အလုပ်သမားကာကွယ်စောင့်ရှောက်ရေးရုံး တွင် ဖေဖေါ်ဝါရီ ၂၃ရက်မှာ တာဝန်ရှိ အရာရှိတွေနဲ့ အလုပ်ရှင်တို့ တွေ့ဆုံညှိနှိုင်း ပေးခဲ့ရာ စုငွေနဲ့ လုပ်သက်အလိုက် နစ်နာကြေး အဖြစ် ဘတ်ငွေ၁သန်းကျော် ကို သတ်မှတ်ရက်အတွင်း ပေးရန် သဘောတူညီမှုရရှိခဲ့တယ်လို့ သိရပါတယ်။
ဒါ့အပြင် မြန်မာလုပ်သားတွေရဲ့ အထောက်အထားစာရွက်စာတမ်း သက်တမ်းတိုး လုပ်ငန်းစဉ်နဲ့ ဘတ်ရိုက်ထားတဲ့ လုပ်ငန်းစဉ်တွေကိုပါ အလုပ်ရုံဘက်က ဆက်လက် ဆောင်ရွက်ပေးမယ်လို့ ကတိပြုခဲ့ကြောင်း သိရပါတယ်။
