အွန်လိုင်း ကျွဲဂိမ်းရှုံးပြီး အကြွေးတင်နေတဲ့ အတွက် အလုပ်အကိုင်ရှာဖွေနေတဲ့ အမျိုးသမီး တစ်ဦးကို ငွေဖြင့် စည်းရုံးပြီး တရုတ်မယား အဖြစ်ရောင်းစားရန် စီစဉ်သူတွေကို ဖမ်းဆီးအရေးယူခဲ့တယ်လို့ မြန်မာနိုင်ငံရဲတပ်ဖွဲ့ မှ သိရပါတယ်။
ဖြစ်စဉ်မှာ ဧရာဝတီတိုင်းဒေသကြီး မအူပင်မြို့ ၊ အမှတ်(၂)ရပ်ကွက်နေ အမျိုးသမီးတစ်ဦးဟာ Online ကျွဲဂိမ်းကစားခဲ့ရာမှ ငွေကျပ်သိန်း ၃၀ အကြွေးတင်ခဲ့သဖြင့် မိခင်၏နေအိမ်အား ပေါင်နှံ၍ အကြွေးဆပ်ခဲ့ရာ ခြောက်လကြာချိန်ထိ အကြွေးပြန်မဆပ်နိုင်သေးတဲ့ အတွက် နေအိမ်အပေါင်ဆုံးတော့မယ့် အခြေနေ ဖြစ်ပေါ်နေတယ်လို့ သိရပါတယ်။
ဒါကြောင့် အလုပ်ရှာဖွေရာမှ မူဆယ်မြို့ မှာ နေထိုင်တဲ့ မချိုမာစိန်(ခ)မဗိုက်၊ မဇင်နွယ်လတ် (ခ)မဇင်တို့နဲ့ ချိတ်ဆက်မိပြီး တရုတ်နိုင်ငံ မှာ တရုတ်ယောက်ျားယူပါက ငွေကျပ်သိန်း ၈၀ ရရှိမှာ ဖြစ်သလို တစ်နှစ်သာ ပေါင်းသင်းနေထိုင်ရမည်ဟု ပြောဆိုစည်းရုံးကာ မူဆယ်မြို့သို့ လာရောက်ရန် လမ်းခရီးစရိတ်များထုတ်ပေး၍ ခေါ်ဆောင်ခဲ့တယ်လို့ သိရပါတယ်။
မူဆယ်မြို့ ကို ရောက်တဲ့ အခါမှာ ၎င်းအမျိုးသမီးကို ဓာတ်ပုံ/ဗီဒီယိုများရိုက်ကူး၍ တရုတ်နိုင်ငံ ရွှေလီမြို့နေ ပွဲစား ဂျာဆိုင်(ခ)ကချင်မထံပို့ပေးခဲ့ပြီး မူဆယ်မြို့၊ ဗဟိုဆေးရုံတွင် ဆေးစစ်ပေးခဲ့ရာ ၎င်းအမျိုးသမီးက တရုတ်နိုင်ငံတွင် တရုတ်ယောက်ျားယူပါက တရုတ်ရဲတပ်ဖွဲ့ဝင်များ ဖမ်းဆီးခံရမည်ကို ကြောက်လန့်ကြောင်း မချိုမာစိန် (ခ)မဗိုက်ကိုပြောခဲ့ရာ တရုတ်ယောက်ျားမယူပါက လမ်းခရီးကုန်ကျစရိတ်များ ပြန်လည်ပေးလျော်ရမည်ဖြစ်ကြောင်းနဲ့ တရုတ်နိုင်ငံ၊ ရွှေလီမြို့နေပွဲစား ဂျာဆိုင်(ခ) ကချင်မထံ ပို့ဆောင်ရန်စီစဉ်ပြီးဖြစ်ကြောင်း ပြန်ပြောခဲ့တယ်လို့ သိရပါတယ်။
ထိုသို့ ပို့ဆောင်ရန်စီစဉ်နေတဲ့ အတွက် ၎င်းအမျိုးသမီးဟာ လူကုန်ကူးမှုတားဆီးနှိမ်နင်းရေးရဲတပ်ဖွဲ့ Hot Line ဖုန်းနံပါတ်သို့ ဆက်သွယ်အကူအညီတောင်းခံခဲ့တဲ့ အတွက် အမှတ်(၁၇)လူကုန် ကူးမှုတားဆီးနှိမ်နင်းရေးရဲတပ်ဖွဲ့စု(မူဆယ်)မှ တရားလိုပြုလုပ်တိုင်တန်းပြီး မူဆယ်မြို့မရဲစခန်း (ပ)၁၉၂/၂၀၂၅၊ လူကုန်ကူးမှုတားဆီးနှိမ်နင်းရေးဥပဒေပုဒ်မ ၃၈(က)/၄၄ ဖြင့် အမှုရေးဖွင့် တရားစွဲတင်ခဲ့တယ်လို့သိရပါတယ်။
၂၀၂၆ ခုနှစ်၊ဖေဖော်ဝါရီ ၁၀ ရက် မှာတော့ မူဆယ်ခရိုင်တရားရုံးမှ ဖမ်းမိတရားခံ မချိုမာစိန်(ခ)မဗိုက်နှင့် မဇင်နွယ်လတ် (ခ)မဇင်တို့နှစ်ဦးကို လူကုန်ကူးမှုတားဆီးနှိမ်နင်းရေး ဥပဒေပုဒ်မ ၃၈(က)အရ အလုပ်နှင့် ထောင်ဒဏ် ၁၀ နှစ်စီ ကျခံစေရန် အမိန့်ချမှတ်ခဲ့ပြီး ထွက်ပြေးတိမ်းရှောင် တရားခံ ဂျာဆိုင်(ခ)ကချင်မကို ရာဇဝတ်ကျင့်ထုံး ဥပဒေပုဒ်မ ၈၇/၈၈ အတည်ပြုထုတ်ဆင့်ခဲ့တယ်လို့ သိရပါတယ်။
