တောင်ကိုရီးယား နိုင်ငံ မှာ ထပ်မံ သွားရောက်အလုပ်လုပ်ကိုင်နိုင်မယ့် ကိုရီးယားဘာသာ အရည်အချင်းစစ် အထူးသီးသန့်စာမေးပွဲ (Special EPS-TOPIK)ကို ဖြေဆိုသူ ၇၀၀ ကျော်သာ ရှိတယ်လို့ အစိုးရပြည်ပအလုပ်အကိုင်အေဂျင်စီ (POEA) ရဲ့ ထုတ်ပြန်ချက်အရ သိရပါတယ်။
ကိုရီယားနိုင်ငံမှ တခေါက်ပြန် EPS လုပ်သားတွေ ဝင်ရောက် ဖြေဆို နိုင်တဲ့ စာမေးပွဲ ဖြစ်ပြီး သတ်မှတ်စည်းကမ်းချက်
တွေနဲ့ ပြည့်မီတဲ့ ဖြေဆိုခွင့်ရှိသူ ၅,၇၀၀ ကျော် ရှိပေမယ့် ဖြေဆိုရန် လျှောက်ထားသူအရေအတွက် ဟာ ၇၇၀ ဦး သာရှိတယ်လို့ သိရပါတယ်။
တောင်ကိုရီးယားနိုင်ငံမှာ အနည်းဆုံး ၃ နှစ်အထက် လုပ်ကိုင်ခဲ့ဖူးပြီး မြန်မာနိုင်ငံကို ၂၀၁၀ ဇန်နဝါရီ ၁ ရက်နောက်ပိုင်း ပြန်လည်ရောက်ရှိခဲ့သူတွေ နောက်တကြိမ် ပြန်လည်သွားရောက်လုပ်ကိုင်နိုင်ရန်အတွက် Special EPS-TOPIK စာမေးပွဲကို ရည်ရွယ်ကျင်းပခြင်းဖြစ်တယ်လို့ အစိုးရပြည်ပအလုပ်အကိုင်အေဂျင်စီ (POEA)က ကြေညာခဲ့ပါတယ်။
လက်တွေ့မှာတော့ EPSစာမေးပွဲအောင်ထားတဲ့ လူသစ်တွေ တောင် အလုပ်ရရှိတဲ့ပမာဏ နည်းနေသလို ယခင်အထူးသီးသန့်စာမေးပွဲ ဖြေဆိုအောင်မြင်ထားပြီး အလုပ်မရရှိသူတွေ ရှိတာကြောင့် အခုလို ဖြေဆိုသူနည်းတာ ဖြစ်တယ်လို့ စာမေးပွဲကိုရီးယားသွားရောက်အလုပ်လုပ်ရန်စောင့်ဆိုင်းနေသူတွေကပြောပါတယ်။
""စာမေးပွဲ အောင်တိုင်လဲ သွားရတာ မဟုတ်ဘူးလေ စာမေးပွဲကြေးတွေ အချိန်တွေ ကုန်တာဘဲ အဖတ်တင်မှာ အရှေ့က စာမေးပွဲအောင်ပြီး မသွားရသေးတဲ့တခေါက်ပြန်တွေ အများကြီး အဲ့တော့ သတ်မှတ်ထားတဲ့ စည်းကမ်းချက်နဲ့ ကိုက်ညီပေမယ့် ဖြစ်နိုင်မဖြစ်နိုင်စဉ်းစားပြီး ဝင်မဖြေကျတော့တာ""လို့ EPSစာမေးပွဲအောင်မြင်ထားသူ တစ်ဦးကပြောပါတယ်။
ကိုရီးယားဘာသာအရည်အချင်းစစ် အထူးသီးသန့်စာမေးပွဲလျှောက်လွှာကို အွန်လိုင်းကနေ စက်တင်ဘာ ၂၂ ရက်နဲ့ ၂၃ ရက်မှာလျှောက်ထားခွင့်ပေးခဲ့ပြီး စာမေးပွဲကို အောက်တိုဘာ ၂၂ ရက်မှ ၂၄ ရက်အထိကျင်းပမှာဖြစ်ကာ အောင်စာရင်းကိုတော့ အောက်တိုဘာ ၃၀ ရက်မှာထုတ်ပြန်ပေးမယ်လို့ ကြေငြာထားပါတယ်။
စားပွဲအောင်မြင်သူများသာ နိုင်ငံခြားသား လုပ်သားခေါ်ယူမူစနစ်အရ အလုပ်လျောက်လွှာတင်ခြင်းလုပ်ငန်းစဥ်များ ဆောင်ရွက်နိင်မှာဖြစ်ပေမယ့် ကိုရီးယားနိုင်ငံမှာ အလုပ်လုပ်ကိုင်ခွင့် ရာနှုန်းပြည့်ရမယ်လို့ အာမ မခံဘူးလို့ POEAက အသိပေးထားပါတယ်။
