ကိုရီးယားနိုင်ငံ ချွန်နမ်ပြည်နယ် အာဆန်မြို့ရှိ စက်ရုံတစ်ရုံမှာ ဝင်ရောက်လုပ်ကိုင်နေတဲ့ မြန်မာအလုပ်သမားတစ်ဦးဟာ မနေ့ကဒီဇင်ဘာ ၁၂ရက်မှာ မိမိကိုယ်ကိုအဆုံးစီရင်မှုဖြစ်ပွားခဲ့တယ်လို့ သိရပါတယ်။
အဆိုပါ မြန်မာအလုပ်သမားဟာ စစ်ကိုင်းတိုင်းဒေသကြီး ယင်းမာပင်မြို့နယ် ရုံးလေးပင်ကျေးရွာ မှ အသက် ၂၀ အရွယ် ကို --- ဖြစ်ပြီး ၂၀၂၄ ခုနှစ် ဒီဇင်ဘာ ၁၂ ရက် ည ၁၂နာရီအချိန်ခန့်က ဖြစ်ပွားခဲ့တာလို့ ကိုရီးယားက မြန်မာအလုပ်သမားတစ်ဦးကပြောပါတယ်။
ကွယ်လွန်သူအလုပ်သမားဟာ ည ၉ နာရီအချိန်အထိ အချိန်ပို ဆင်းပြီးနောက် မိမိအခန်းကို ပြန်ရောက်မလာတာကြောင့် အခန်းအတူနေ မြန်မာအလုပ်သမား သူငယ်ချင်းက လိုက်လံစုံစမ်း ရှာဖွေရာ ကို ----အလုပ်လုပ်ကိုင်နေတဲ့ စက်ရုံနေရာမှာ မိမိကိုယ်ကို အဆုံးစီရင်ထားတာကို တွေ့ရှိခဲ့ရတာဖြစ်တယ်လို့ သိရပါတယ်။
"ခုဆိုရင် မြန်မာလူမျိုးတွေလည်း ကိုယ့်ကိုကိုယ်အဆုံးစီရင်တာတွေ တွေ့လာရတယ်။ ကိုရီးယားမှာက အလုပ်ရှင်နဲ့အဆင်မပြေရင် အတော်ဆိုးပါတယ်။ ဖိအားတွေလည်းအများကြီးပါ။ စိတ်ညစ်စရာတွေဖိအားတွေ ခွဲခြားဆက် ဆံခံရတာတွေအများကြီးပါ ဒါကိုတောင့်ခံနိုင်မှရမှာပါ။ ကျွန်တော်တို့ကိုယ်တိုင်ကို တစ်လတစ်ကြိမ်လောက်က ငါသေသွားရင်ကောင်းမယ်လို့ ရွတ်မိပါတယ်။ ခုဆိုရင် ဘယ်လောက်တောင် စိတ်ညစ်နေလို့များ ဒီအလုပ်ရှင်ရဲ့စက်ရုံထဲမှာပဲ အဆုံးစီရင်သွားတယ်မသိဘူး။ အသက်ကအရမ်းငယ်တယ်။ ရောက်လာတာကလည်းတစ်နှစ်တောင်မပြည့်သေးဘူး စိတ်မကောင်းဖြစ်မိပါတယ်"လို့ မြန်မာအလုပ်သမားတစ်ဦးက ဆိုပါတယ်။
မိမိကိုယ်ကို အဆုံးစီရင်မှုပြုထားသည်ကို တွေ့ရှိခဲ့ရပြီး မြန်မာလုပ်သားများက စက်ရုံ တာဝန်ရှိသူများထံ ဖုန်းဆက်အကြောင်းကြားပြီးနောက် စက်ရုံကိုရောက်ရှိကာ ရဲစခန်းကို ဖုန်းဆက် တိုင်ကြားလိုက်ရာ ရဲဝန်ထမ်းများ ရောက်လာပြီး အလောင်းကို စစ်ဆေးပြီး အအေးခန်းကို ပို့ထားတယ်လို့သိရပါတယ်။
သက်ဆိုင်ရာ တာဝန်ရှိရဲဝန်ထမ်းများက အလောင်းကိုထပ်မံစစ်ဆေးပြီးနောက် သင်္ဂြိုဟ်ခွင့်ပြုတဲ့အခါ နာရေးကိစ္စဆောင်ရွက်သွားမယ်လို့သိရပြီး မြန်မာအလုပ်သမားကို----- ကိုရီးယားကို ရောက်ရှိလုပ်ကိုင်နေတာ ၇ လ ခန့်သာရှိသေးကာ အလွန်စကားနည်းသူလည်း ဖြစ်သလို စက်ရုံတွင်းပြဿနာနဲ့ အခက်အခဲများနဲ့ပတ်သက်ပြီး တိတိကျကျ မသိရသေးဘူးလို့ နီးစပ်သူတွေထံက သိရပါတယ်။
#MyanmarLabourNews
