မြန်မာအပါအဝင် ကိုရီးယားနိုင်ငံရောက် နိုင်ငံခြားသားအလုပ်သမားအများစုက အလုပ်ရှင်နဲ့ လုပ်ခလစာအငြင်းပွားတာတွေကို လစဉ် တိုင်ကြားမှု ရှိနေတယ်လို့ မြန်မာအလုပ်သမား လူမှုဖူလုံရေးစင်တာ(ကိုရီးယား)က ရရှိထားတဲ့ သတင်းအချက်အလက်တွေအရ သိရပါတယ်။
တိုင်ကြားမှုတွေကို ကုန်ထုတ်လုပ်ငန်း၊ စိုက်ပျိုးရေးလုပ်ငန်း၊ မွေးမြူရေး၊ ရေလုပ်ငန်းနဲ့ ဆောက်လုပ်ရေး လုပ်ငန်းခွင်တွေက နိုင်ငံခြားသား အလုပ်သမားတွေက လုပ်ဆောင်ကြတာ ဖြစ်ပါတယ်။
ဒီလို ငွေကြေးအငြင်းပွား တာကြောင့် တိုင်ကြားမှုတွေ လစဉ် အနည်းဆုံး (၁၀)မှုကနေ အများဆုံး (၃၀) နီးပါးထိ ရှိနေပါတယ်။
“လုပ်ခလစာပြဿနာက တိုင်ကြားမှု အများဆုံးပါပဲ။ အချိန်ပိုကြေးကို မှန်မှန်ကန်ကန် မတွက်ပေးတာ၊ လစာပုံမှန် မပေးတာတွေတွေ တိုင်ကြပါတယ်။ ဒီအမှုတွေကို ဖြေရှင်းဖို့ကလည်း အချိန်သုံးလ၊ ခြောက်လ၊ တစ်နှစ် အာ့လောက်ထိ ကြာတတ်တယ်။ စင်တာအနေနဲ့ ၂၀၂၃ခုနှစ်ထဲမှာဆို ခြောက်လတာတွင်း အလုပ်သမား (၉၈)ဦး မရခဲ့တဲ့ လုပ်အားခ ဝမ်သိန်းလေးထောင်ကျော် ရရှိအောင်လည်း လုပ်ဆောင်နိုင်ခဲ့ပါတယ်။ လက်ရှိ ညှိနှိုင်းနေဆဲ အမှုတွေလည်း ရှိပါတယ်”လို့ မြန်မာအလုပ်သမား လူမှုဖူလုံရေးစင်တာ(ကိုရီးယား) လုပ်ငန်းကော်မတီ ဥက္ကဌ ကိုစိုးမိုးသူက ပြောပါတယ်။
ကိုရီးယားနိုင်ငံရဲ့ ဥပဒေအရ ရွှေ့ပြောင်းအလုပ်သမားတွေအနေနဲ့ လုပ်သက်တစ်နှစ်ပြည့်ပြီးသူတိုင်း တစ်လတာ လုပ်ခလစာ ခံစားခွင့်ရရှိမှာဖြစ်ပြီး အလုပ်ထွက်ချိန်မှာ လုပ်သက်သုံးနှစ်ရှိပါက သုံးလစာ ရရှိမှာဖြစ်ပါတယ်။ ဒါ့အပြင် တစ်နှစ်တာလုံး အလုပ်ဆင်းရက်ရဲ့ (၈၀) ရာခိုင်နှုန်းကျော်ကို အလုပ်ဆင်းခဲ့ပါက ရက်ပြည့်ခံစားခွင့်အဖြစ် ခွင့်ရက်ဖြစ်စေ၊ ငွေသားဖြစ်စေ ခံစားခွင့် ရရှိနိုင်တယ်လို့ သိရပါတယ်။
“အခုကတော့ ကိုရီးယားသွားဖို့ လုပ်နေတာပါ။ ဘာသာစကားအတွက် သင်တန်းတက်တာကလွဲရင် သူ့နိုင်ငံရဲ့ ဥဒေအကြောင်းတော့ မလေ့လာဖြစ်ဘူး။ အခြေခံလစာ ဘယ်လောက်ရမလဲ။ အချိန်ပိုဆင်းရင် ဘယ်လောက်ရမလဲ ဆိုတာတော့ ဟိုမှာရောက်နေတဲ့သူတွေကို မေးဖြစ်တယ်။ တစ်ခြားခံစားခွင့်တွေ မသိပါဘူး"လို့ ကိုရီးယားနိုင်ငံမှာ အလုပ်လုပ်ဖို့ ပြင်ဆင်နေသူတစ်ဦးက ပြောပါတယ်။
ဒီလိုနိုင်ငံခြားသား အလုပ်သမားတွေ လုပ်ခလစာအငြင်းပွားမှုတွေနဲ့ ပတ်သက်ပြီး ကိုရီးယားလူ့အခွင့်အရေး ကော်မရှင်ကလည်း ရွှေ့ပြောင်းအလုပ်သမားတွေဟာ လုပ်အားခ နှစ်စဉ် ဒေါ်လာသိန်း(၈၀၀)ကျော် မရရှိဘူးလို့ ထုတ်ပြန်ထားပါတယ်။
ကိုရီးယားရောက် နိုင်ငံခြားသားအလုပ်သမားတွေအနေနဲ့ လုပ်ငန်းခွင်တွင်း အခွင့်အရေး ချိုးဖောက်ခံရတာတွေကို မြန်မာအလုပ်သမား လူမှုဖူလုံရေးစင်တာ (ကိုရီးယား) ကို ဆက်သွယ်နိုင်မှာဖြစ်ပြီး လက်ရှိမှာလည်း စင်တာအဖွဲ့ဝင် (၆၀၀) ကျော် ရှိနေတယ်လို့ သိရပါတယ်။
#MyanmarLabourNews
