တောင်ကိုရီးယားရှိ မြန်မာနိုင်ငံသားတွေ အနေနဲ့ နိုင်ငံကူးလက်မှတ်(ပတ်စပို့)ကို သက်တမ်းမကုန်ခင် ကြိုတင်သက်တမ်းတိုးထားဖို့ မြန်မာသံရုံး(ဆိုလ်းမြို့)က ဇန်နဝါရီ ၆ရက်မှာ အသိပေး ထုတ်ပြန်ထားပါတယ်။

 

မြန်မာနိုင်ငံကူးလက်မှတ် ကိုင်ဆောင်အသုံးပြုသူ တွေ အနေနဲ့ နိုင်ငံကူးလက်မှတ် ကို သက်တမ်းကုန်ဆုံးမယ့် ရက်မတိုင်မီ (၆) လအတွင်း သက်တမ်းတိုးလျှောက်ထားတာကို ကြိုတင်ဆောင်ရွက်သွားနိုင်တယ်လို့အသိပေးထားပါတယ်။

 

အချို့သော သူတွေက အကြောင်းအမျိုးမျိုးကြောင့် မိမိရဲ့ နိုင်ငံကူးလက်မှတ် သက်တမ်းလွန်ပြီးမှသာ သက်တမ်းတိုး လာရောက်လျှောက်ထားတဲ့ အတွက် သက်တမ်းပြတ်တောက်မှု ကို ပြန်လည်စိစစ်နေရခြင်း၊ဒဏ်ကြေးငွေကောက်ခံရခြင်းစတဲ့ မလိုလားအပ်တဲ့ နှောင့်နှေးကြန့်ကြာမှု တွေ ဖြစ်ပေါ်နေကြောင်း တွေ့ရှိရတယ်လို့ မြန်မာသံရုံးက ထုတ်ပြန်ထားပါတယ်။

 

ဒါကြောင့် တောင်ကိုရီးယား နိုင်ငံ ရောက်ရှိနေတဲ့ မြန်မာနိုင်ငံသားတွေ အနေနဲ့ နိုင်ငံကူးလက်မှတ် ကို သက်တမ်းကုန်ဆုံးမယ့် ရက်မတိုင်မီ ၆ လကြိုတင်၍ သတ်မှတ်ထားတဲ့ စာရွက်စာတမ်းစုံလင်စွာ ဖြင့် သက်တမ်းတိုးဆောင်ရွက်ဖို့ အသိပေးကြေညာထားပါတယ်။