ဂျပန်နိုင်ငံ သို့ ကာလတိုဗီဇာ လျှောက်ထား ပြီး သွားရောက် ကာ ဝင်ငွေရရှိတဲ့ အလုပ် လုပ်ကိုင်ပါက ဂျပန်နိုင်ငံအတွင်းမှာ ရာဇဝတ်ပြစ်မှုအဖြစ် အပြစ်ပေးခံရနိုင်တယ်လို့ ရန်ကုန်ရှိ ဂျပန် သံရုံးက အသိပေးထုတ်ပြန်ထားပါတယ်။
ကာလတိုနေထိုင်ခြင်း ဆိုတာဟာ ဂျပန်နိုင်ငံရဲ့ လူဝင်မှုကြီးကြပ်ရေးနှင့် ဒုက္ခသည်များအသိအမှတ်ပြုရေးဥပဒေအရ ဂျပန်နိုင်ငံမှာ ကာလတိုနေထိုင် ဆောင်ရွက်ရတဲ့ Sightseeing အလည်အပတ်၊ ကျန်းမာရေးအတွက် အနားယူအပန်းဖြေခြင်း၊ အားကစား၊ ဆွေမျိုးသားချင်း/အသိမိတ်ဆွေထံ အလည်အပတ်သွားခြင်း၊ လေ့လာရေး၊ သင်တန်း သို့မဟုတ် ဆွေးနွေးပွဲ အတွက် တက်ရောက်ခြင်း၊ လုပ်ငန်းပိုင်းဆိုင်ရာဆက်သွယ် ဆောင်ရွက်ခြင်း တို့ အတွက် သာ ဖြစ်တယ်လို့ဆိုပါတယ်။
ဒါကြောင့်ဂျပန်နိုင်ငံမှာ နေထိုင်မည်ဆိုပါက ဝင်ငွေရရှိနိုင်တဲ့ အလုပ်လုပ်ခြင်းများကို လုံးဝခွင့်မပြုဘဲ ချိုးဖောက်ပါက ဂျပန်နိုင်ငံအတွင်းတွင် ရာဇဝတ်ပြစ်မှုအဖြစ် အပြစ်ပေးခံရနိုင်တယ်လို့ အသိပေးထားပါတယ်။
ကာလတိုဗီဇာ လျှောက်ထားတာမှာလည်း မှန်ကန်တဲ့ စာရွက်စာတမ်းတွေကိုသာ တင်ပြရန်၊ ဗီဇာ လိမ်လည်လျှောက်ထားတာမျိုး မပြုလုပ်ဖို့အသိပေးထားပြီး စစ်ဆေးတွ့ရှိပါက ဗီဇာထုတ်ပေးမှာမဟုတ်ဘူးလို့ ရန်ကုန်ရှိ ဂျပန်သံရုံးက ကြေညာထားပါတယ်။
ဒါ့အပြင် ဗီဇာလိမ်လည်လျှောက်ထားသူနဲ့ လျှောက်ထားမှုကို ကူညီပေးတဲ့ ကုမ္ပဏီအဖွဲ့အစည်း တွေကို နောက်နောင်မှာ လျှောက်ထားလာတဲ့ မည်သည့်ဗီဇာ လျှောက်ထားမှုမျိုးကိုမဆို ယခင်ကမလျော်ကန်တဲ့ လျှောက်ထားမှု ပြုလုပ်ခဲ့ ကြောင်း မှတ်တမ်းဝင်ထားခြင်းရှိပါက ကြီးမားတဲ့ အကျိုးသက်ရောက်မှုကို ဖြစ်ပေါ်စေမယ်လို့ လည်းဆိုပါတယ်။
အလုပ်လုပ်ခြင်း၊ ကျောင်းတက်ခြင်းစတဲ့ ရည်ရွယ်ချက်နဲ့ ဂျပန်နိုင်ငံသို့ ကာလလတ်၊ ကာလရှည် သွားရောက်ရန်ဆန္ဒရှိသူတွေဟာ ဂျပန်နိုင်ငံ လူဝင်မှုနေထိုင်ခွင့်ကြီးကြပ်ရေးဌာနမှာ ကြိုတင်၍ ကာလရှည်နေထိုင်ခွင့်လက်မှတ် (COE)ကို ရယူပြီး မှသာ ဗီဇာလျှောက်ထားရမယ်လို့ ဂျပန်သံရုံးကအကြံပြုထားပါတယ်။
