ကရင်နီပြည်နယ်၊ ကရင်နီအမျိုးသားများကာကွယ်ရေးတပ် KNDF- ဆေးဌာနမှ ကြီးမှူးဖွင့်လှစ်ထားတဲ့ ဆေးသင်တန်းမှ သင်တန်းသား တွေ စက်တင်ဘာ ၁၁ ရက်နေ့ ညနေက လေ့ကျင့်ရေးပြုလုပ်စဉ် ချောင်းတစ်ခုကိုဖြတ်ကျော် ရန်ကြိုးစားအားထုတ်ရာ မတော်တဆဖြစ်ပွားကာ ဆေးသင်တန်းသား ၁၈ ဦး ရေထဲမျောပါသေဆုံးသွားတယ်လို့ ထုတ်ပြန်ပါတယ်။
ယင်းမတော်တဆဖြစ်စဉ်ကို ကရင်နီအမျိုးသားကာကွယ်ရေးတပ် ဗဟိုအနေဖြင့် လိုအပ်တဲ့ စုံစမ်းစစ်ဆေးမှုတွေပြုလုပ်သွားမယ်လို့ ဆိုထားပါတယ်။
စက်တင်ဘာ ၁၀ ရက်ခန့်ကစပြီး မြန်မာနိုင်ငံအနှံ့အပြား မိုးရွာသွန်းမှုကြောင့် ရေကြီးနစ်မြုပ်မှုတွေဖြစ်ပေါ်လျှက်ရှိကာ ရှမ်းပြည်နယ်တောင်ပိုင်း ကလောမြို့မှာ လူ ၈ ဦးခန့်၊ မန္တလေးတိုင်း ရမည်းသင်းမြို့နယ်မှာ ၁၇ ဦးခန့် နေပြည်တော်က တပ်ကုန်းမြို့နယ် မှာ ၁၉ ဦး စုစုပေါင်း ၄၀ ကျော် သေဆုံးခဲ့တယ်လို့ တရားဝင်ထုတ်ပြန်ချက်တွေအရသိပါတယ်။
လာမယ့် စက်တင်ဘာ ၁၃ မှ စက်တင်ဘာ ၁၅ ရက်အတွင်း ချင်းပြည်နယ်နှင့် ရခိုင်ပြည်နယ် နေပြည်တော်၊ စစ်ကိုင်းတိုင်း၊ မကွေးတိုင်း၊ ပဲခူးတိုင်း၊ ရန်ကုန်တိုင်း၊ ဧရာဝတီတိုင်း၊ တနင်္သာရီတိုင်း၊ ကရင်ပြည်နယ်နှင့် မွန်ပြည်နယ်တို့တွင် နေရာစိပ်စိပ်မှ နေရာအနှံ့အပြား မိုးထစ်ချုန်းရွာပြီး၊ ဒေသအလိုက် နေရာကွက်၍ မိုးကြီးနိုင်တာကြောင့် နောက်ဆက်တွဲ အန္တရာယ်တွေဖြစ်တဲ့ တောင်ပြို မြေပြိုခြင်းများသတိပြုဖို့ မိုးဇလက ထုတ်ပြန်ထားပါတယ်။
မိုးသည်းထန်စွာရွာသွန်းခြင်းနှင့်အတူ လေပြင်းတိုက်ခတ်ခြင်း၊ လျှပ်တပြက်ရေကြီးခြင်း၊ မြေပြိုခြင်းစသည့် သဘာဝဘေးအန္တရာယ်များဖြစ်ပေါ်နိုင်ပါသဖြင့် ကုန်းမြင့်ဒေသအနီး နေထိုင် ကြသူများအနေနဲ့ မြေပြိုမှုအန္တရာယ်နှင့် မြစ်ငယ်၊ ချောင်းငယ်များအနီး နေထိုင်ကြသူတွေလည်း ရေကြီး ရေလျှံမှုများကို ကြိုတင်သတိပြုကြရန်၊ ပြည်တွင်း ရေကြောင်းသွားလာရေးနှင့် လေကြောင်းပျံသန်းရေးအနေဖြင့်လည်း ကြိုတင်သတိပြုနိုင်ရန် အသိပေးနှိုးဆော်ထားပါတယ်။
